އެމްޓީސީސީން "މާލެ ޓެކްސީ އެޕް" ތަރައްގީ ކުރުމަށް 13 މިލިއަން ރުފިޔާއަށް ތަޖުރިބާއެއް ނެތް ކުންފުންޏަކާ ހަވާލުކޮށް ކޮރަޕްޝަންގެ ބޮޑެތި އަމަލުތަކެއް ހިންގާފައިވާ ކަމުގެ ތުހުމަތު!
މާލެ ޓެކްސީ އެޕް ތަރައްގީކުރުމުގެ މަޝްރޫއު ބިޑަކާ ނުލައި، އެ ދާއިރާގެ ތަޖުރިބާ ނެތް ކުންފުންޏަކާ ހަވާލުކޮށްފައިވާތީ ބޮޑެތި ކަންބޮޑުވުންތަކެއް ވަނީ އުފެދިފައި. މިއެޕް ހަވާލުކޮށްފައިވަނީ "ފިކްސްޑް މޯލްޑިވްސް" ކިޔާ ކުންފުންޏަކާ. ގާތްގަނޑަކަށް 13 މިލިއަން ދިވެހި ރުފިޔާ އަށް މި އެޕްލިކޭޝަންގެ މަސައްކަތް ކުރުމަށް ހަވާލުކުރިއިރު، ފިކްސްޑް މޯލްޑިވްސް އަކީ 2022 ވަނަ އަހަރު ރަޖިސްޓްރީކޮށްފައިވާ އަމިއްލަ ފަރުދުންގެ ވިޔަފާރިއެއް. މި ވިޔަފާރީގެ ދަށުން އެއްވެސް ވިޔަފާރި ނަމެއް، މަސައްކަތް ކުރުމުގެ ހުއްދައެއް ނުވަތަ މިފަދަ މަސައްކަތަކާ ގުޅޭ އެއްވެސް ލައިސަންސެއް ލިސްޓުކުރެވިފައެއް ނުވޭ.
150 ކާރާއެކު ސަރުކާރުގެ ޓެކްސީ ލައިން ބުރާސްފަތި ދުވަހުގެ ރޭ ވަނީ އިފްތިތާހް ކޮށްފައި. | އެމްޓީސީސީ
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން "މާލެ ޓެކްސީ އެޕް" ތަރައްގީ ކުރުމަށް 13 މިލިއަން ރުފިޔާއަށް ތަޖުރިބާއެއް ނެތް ކުންފުންޏަކާ ހަވާލުކޮށް ކޮރަޕްޝަންގެ ބޮޑެތި އަމަލުތަކެއް ހިންގާފައިވާ ކަމަށް ތުހުމަތު ކޮށްފި އެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި، "މާލެ ޓެކްސީ އެޕް" ހަވާލުކޮށްފައިވަނީ "ފިކްސްޑް މޯލްޑިވްސް" ކިޔާ ކުންފުންޏަކާ އެވެ. އެއީ އާންމުކޮށް ބިޑަށް ހުޅުވާލުމެއް ނެތި، ވަކި ބަޔަކަށް ދައުވަތު ދީގެން ކުރިއަށް ގެންދިޔަ މަޝްރޫއެކެވެ.
ގާތްގަނޑަކަށް 13 މިލިއަން ދިވެހި ރުފިޔާ އަށް މި އެޕްލިކޭޝަންގެ މަސައްކަތް ކުރުމަށް ހަވާލުކުރިއިރު، ފިކްސްޑް މޯލްޑިވްސް އަކީ 2022 ވަނަ އަހަރު ރަޖިސްޓްރީކޮށްފައިވާ އަމިއްލަ ފަރުދުންގެ ވިޔަފާރިއެކެވެ. މި ވިޔަފާރީގެ ދަށުން އެއްވެސް ވިޔަފާރި ނަމެއް، މަސައްކަތް ކުރުމުގެ ހުއްދައެއް ނުވަތަ މިފަދަ މަސައްކަތަކާ ގުޅޭ އެއްވެސް ލައިސަންސެއް ލިސްޓުކުރެވިފައެއް ނުވެ އެވެ.
އެ ކުންފުނީގެ ޕޯޓްފޯލިއޯއިން ދައްކާގޮތުގައި، އެއީ ހާޑްވެއާ، ކެމެރާ އަދި ނެޓްވޯކިންގެ ދާއިރާގައި ތަޖުރިބާ ހުރި ބައެކެވެ. ނަމަވެސް ސޮފްޓްވެއާ ޑިވެލޮޕްމަންޓް ނުވަތަ އެޕްލިކޭޝަން ތައްޔާރުކުރުމުގެ ތަޖުރިބާއެއް ނެތެވެ.
މައުލޫމާތު ލިބިފައިވާ ގޮތުގައި މި މަޝްރޫއު ނިންމަންޖެހޭ ތާރީޚަކީ މިދިޔަ ނޮވެމްބަރު މަސް ނަމަވެސް ބުރާސްފަތި ދުވަހާ ހަމައަށް މި އެޕްލިކޭޝަންގެ މަސައްކަތް ނިމިފައެއް ނުވެ އެވެ. ނަމަވެސް މި މަސައްކަތަށް ދައްކަންޖެހޭ ފައިސާގެ ބޮޑު ބައެއް މިހާރު ވެސް ދައްކާފައިވާ ކަމަށް މައުލޫމާތު ލިބެ އެވެ.
މާލޭގައި ޓެކްސީ ލައިންގެ ޚިދުމަތް ރަސްމީކޮށް ބުރާސްފަތި ދުވަހުގެ ރޭ ފަށާފައިވާއިރު، މި ޚިދުމަތް ދިނުމަށް ގެނެސްފައިވަނީ ޗައިނާގެ ޗަންގަން އޮޓޯމޮބިލް ބްރޭންޑުގެ ލުމިން އަދި S05 އާއި S07 މޮޑެލްގެ ކާރެވެ.
އެޕްލިކޭޝަނެއް ހެދުމަށް 13 މިލިއަން ރުފިޔާ ހަރަދުކޮށްފައިވާތީ ގިނަ ބައެއްގެ ފާޑު ކިޔުން ވެސް އެމްޓީސީސީއަށް ވަނީ އަމާޒުވެފަ އެވެ. މިއީ ކޮރަޕްޝަންގެ ބޮޑު އަމަލެއް ކަމަށާއި، މިމަސައްކަތް ކުރިއަށް ގެންދިޔަ ޕްރޮކިއުމަންޓް ޕްރޮސެސް ސާފުކޮށް ދިނުމަށް ވެސް ގިނަ ބަޔަކު ގޮވާލާފައިވެ އެވެ. އަދި ބޭރު ދުނިޔޭގެ ގައުމުތަކުގައި ވެސް ބޭނުންކުރާ މިފަދަ އެޕްލިކޭޝަންތައް ތަރައްގީ ކުރުމަށް ވެސް މިއަދަދަށް ހަރަދު ނުކުރާކަން ފާހަގަކޮށް ގިނަ ބަޔަކު މިމައްސަލަ ބެލުމަށް އެދިފައިވެ އެވެ.
