ފަލާހު އާއްމުންނަށް ރިޝްވަތު ހުށަހެޅުމާއި، ހޯރަފުށީގައި ބޭއްވި ޖަލްސާ އަށް އުސޫލުން ބޭރުން އާރްޓީއެލް ފެރީ ބޭނުން ކުރި މައްސަލަ އީސީ އާއި އޭސީސީ އަށް ހުށަހަޅައިފި
31 މާރިޗު 2026 | އަންގާރަ 07:54ޕީއެންސީގެ ޕީޖީ ލީޑަރު އިބްރާހިމް ފަލާހު ވަކި ރަށެއްގެ ކެންޑިޑޭޓުން ހޮވައިދީފިނަމަ ފައިސާގެ އިނާމު ދޭނެ ކަމަށް ބުނެ ރިޝްވަތު ހުށަހެޅި މައްސަލައެއް އޭސީސީ އާއި އީސީ އަށް ވަނީ ހުށަހަޅާފަ. ފެންނަ ނުފެންނަ ވޯޓަށް ސަރުކާރުން މިދަނީ ފާޅުގައި ނުފޫޒު ފޯރުވަމުން ކަމަށް އެ މައްސަލައިގައި ވަނީ ބުނެފަ.
އަހުމަދު ސަލީމް އޭސީސީ އަށް މައްސަލަ ހުށަހަޅުއްވަނީ، ހުށަހެޅުއްވީ ކުރިއަށް އޮތް ކައުންސިލް އިންތިޚާބާއި ދިމާކޮށް ރިޝްވަތު ހުށަހަޅާ މައްސަލަ އެއް. | ރާއްޖެ އެމްވީ
ޕީއެންސީގެ ޕީޖީ ލީޑަރ އިބްރާހީމް ފަލާހު އާއްމުންނަށް ރިޝްވަތު ހުށަހެޅުމާއި، ހޯރަފުށީގައި ބޭއްވި ޖަލްސާ އަށް އުސޫލުން ބޭރުން އާރްޓީއެލް ފެރީ ބޭނުން ކުރި މައްސަލަ އިލެކްޝަންސް ކޮމިޝަނާއި އެންޓިކޮރަޕްޝަން ކޮމިޝަނަށް ހުށަހަޅައިފި އެވެ.
އަންގާރަ ދުވަހު އެ މައްސަލަ ހުށަހަޅުއްވާފައި ވަނީ އެމްޑީޕީގެ ގައުމީ މަޖިލީހުގެ މެމްބަރު އަޙުމަދު ސަލީމް އެވެ.
ސަރުކާރުން ރިޝްވަތު ހުށަހަޅާ ވޯޓަށް ނުފޫޒު ފޯރުވަމުންދާ ކަމަށް އެ މައްސަލައިގައި ވަނީ ފާހަގަކޮށްފަ އެވެ. މިގޮތުން ޕީއެންސީގެ ޕާރލަމެންޓުރީ ގުރޫޕުގެ ލީޑަރ، އަދި މި އިންތިޚާބުގެ ޕީއެންސީގެ ކެމްޕެއިން މެނޭޖަރ އިބްރާހީމް ފަލާޙް ވަނީ ކުރިޔަށް މި އޮތް ލޯކަލް ކައުންސިލް އިންތުޚާބުގައި ކުރިމަތިލާފަ ތިބި ވަކި ރަށެއްގެ 6 ކެންޑިޑޭޓަކު ހޮވައިދީފި ނަމަ އެޕްރިލް 5 ވަނަ ދުވަހު އެއްލައްކަ ރުފިޔާގެ ފައިސާގެ ޢިނާމް އެ ރަށަށް ދެއްވާނެކަމަށާއި އަދި އޭގެ އިތުރުން އެރަށުގެ އަންހެން ބޭފުޅުންނަށް އަމާޒުކޮށް ދޮޅުލައްކަ ރުފިޔާގެ ވޮލީ މުބާރާތެއް ބާއްވާދޭނެ ކަމަށް ވަޢުދުވެ ވަޑާއިގެންފަ އެވެ. މީގެ އިތުރުން ހއ. ހޯރަފުށީގައި ބޭއްވި ޕީއެންސީގެ ޖަލްސާއަށް ރަށްރަށުން މީހުން އުފުލުމަށްޓަކައި، ޤަވާޢިދުތަކާއި އުސޫލުތަކާ ޚިލާފަށް އާރްޓީއެލް ފެރީ ވަނީ ބޭނުންކޮށްފަ އެވެ.
އެގޮތުން 20 މާރޗް 2026 ވަނަ ދުވަހުގެރޭ ހއ. ހޯރަފުށީގައި ބޭއްވި ޕީއެންސީގެ ޖަލްސާއަށް ހއ. އަދި ހދ. އަތޮޅުގެ ރަށްރަށުގެ މީހުން އުފުލުމަށް އެމްޓީސީސީ އިން ވަނީ އާންމު ޝެޑިއުލް އިން ބޭރުން ހާއްސަ ދަތުރުތަކެއް ކޮށްފަ އެވެ. އެމްޓީސީސީ އިން އޮޕަރޭޓުކުރަމުންދާ ފެރީތަކަކީ ހަވީރު ފަހެއްގެ ފަހުން އޮޕަރޭޓުކުރާ ފެރީތަކެއްނޫނެވެ. ފެރީގެ ޝެޑިއުލްގެ ބޭރުން ދަތުރު މިކުރީ ހއ. ހޯރަފުށީގައި ބޭއްވި ޕީއެންސީގެ ޖަލްސާގައި މީހުންގިނަކަމަށް ދައްކައިގެން ވޯޓަށް ނުފޫޒު ފޯރުވުމުގެ މަޤުސަދުގައެވެ. އަދި މިކަމަކީ ދައުލަތުގެ ވަސީލަތްތައް ނަހަމަގޮތުގައި ބޭނުންކޮށްގެން މި އިންތިޚާބަށް ނުފޫޒު ފޯރުވުމަށް ކުރި ކަމަކެވެ. ސަބަބަކީ އެމްޓީސީސީން އޮޕަރޭޓުކުރާ އާރުޓީއެލް ފެރީތަކުގެ އުސޫލު އޮންނަނީ، ޝެޑިއުލްގެ ބޭރުން އެއްވެސް ދަތުރެއް ނުކުރެވޭ ގޮތަށް ކަމަށް ވުމެވެ.
ސަލީމް ހުށަހެޅުއްވި މައްސަލައިގައި ބުނެފައި ވަނީ މިއުޅަނދުތަކަކީ އެހެން ފަރާތްތަކަށް ކުއްޔައް ދޫކުރާ އުޅަނދު ތަކެއް ނޫން ކަމަށެވެ. މިއީ ރާއްޖޭގެ ތާރީޚުގައި ވެސް އާރުޓީއެލް ފެރީތައް ސިޔާސީ މަޤުޞަދެއް ޙާޞިލު ކުރުމަށް ބޭނުންކުރި ފުރަތަމަ ފަހަރު ކަމަށް އޭނާ ވިދާޅުވި އެވެ. ފައިސާ އާއި ދައުލަތުގެ ވަސީލަތްތައް ނަހަމަ ގޮތުގައި ބޭނުންކޮށް ލޯކަލް ކައުންސިލް އިންތިޚާބާއި އަދި ފެންނަ ނުފެންނަ ވޯޓަށް ސަރުކާރުން މި ދަނީ ފާޅުގައި ނުފޫޒު ފޯރުވަމުން ކަމަށް އެ މައްސަލައިގައި ވަނީ ބުނެފައެވެ.
