150 ކާރާއެކު ސަރުކާރުގެ ޓެކްސީ ލައިން އިފްތިތާހްކޮށްފި
އެމްޓީސީސީން 24 ގަޑިއިރު ޚިދުމަތް ދޭ މި ޓެކްސީތައް ޚާއްސަ މޮބައިލް އެޕްލިކޭޝަނެއް މެދުވެރިކޮށް ފަސޭހަކަމާއެކު ހޯދޭނެ އިންތިޒާމު ވަނީ ހަމަޖައްސާފަ.
ސަރުކާރުގެ ޓެކްސީ ލައިންގެ ހިދުމަތް އިފްތިތާހުކުރަން ބޭއްވި ހަފްލާގެ ތެރެއިން | ރައީސް އޮފީސް
ސަރުކާރުން އަލަށް ތައާރަފުކުރި "މާލެ ޓެކްސީ ލައިން" ގެ ޚިދުމަތް 150 އިލެކްޓްރިކް ކާރާ އެކު ރަސްމީކޮށް އިފްތިތާހްކޮށްފި އެވެ. ބުރާސްފަތި ދުވަހުގެރޭ ހުޅުމާލެ ސެންޓްރަލް ޕާކްގައި ބޭއްވި ޚާއްސަ ރަސްމިއްޔާތެއްގައި މި ޚިދުމަތް އިފްތިތާހްކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ.
މާލެ ސަރަހައްދުގެ ދަތުރުފަތުރުގެ ނިޒާމު ހަރުދަނާކުރުމަށް ފެށި މި ޚިދުމަތުގައި ބޭނުންކުރާނީ ތިމާވެއްޓާއި ރައްޓެހި، ސައްތައިން ސައްތަ އިލެކްޓްރިކް އުޅަނދުތަކެވެ. މި ޓެކްސީ ލައިންގެ ޚިދުމަތަށް ގެނެސްފައިވާ ކާރުތަކުގެ ތެރޭގައި މާލޭގެ ހަނި މަގުތަކުގައި ދުއްވުމަށް ފަސޭހަ ކުދި ކާރުތަކާއި، މާލެ އާއި ހުޅުމާލެއާ ދެމެދު ދަތުރުކުރުމަށް އެކަށީގެންވާ ބޮޑެތި ސައިޒުގެ ކާރުތައް ހިމެނެއެވެ.
މި ޚިދުމަތަށް ގެނައި އުޅަނދުތަކުގެ ތަފްސީލަށް ބަލާއިރު، ޗަންގަން އޮޓޯމޮބައިލް ބްރޭންޑުގެ "އެސް.ސުމެއް.ފަހެއް" މޮޑެލްގެ 60 ކާރާއި، "ލުމިން" އަދި "އެސް.ސުމެއް.ހަތެއް" މޮޑެލްގެ 90 ކާރު ހިމެނެ އެވެ. މިއީ މާލެ ސަރަހައްދުގައި އެއްފަހަރާ މިހާ ގިނަ އަދަދެއްގެ އިލެކްޓްރިކް ކާރު ޓެކްސީގެ ޚިދުމަތަށް ނެރުނު ފުރަތަމަ ފަހަރެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނި ގޮތުގައި، މި ޓެކްސީ ލައިންގެ ޚިދުމަތް 24 ގަޑިއިރު އާންމުންނަށް ލިބޭނެ އެވެ. މި ޚިދުމަތް ހޯދުމަށްޓަކައި ޚާއްސަ މޮބައިލް އެޕްލިކޭޝަނެއް ބޭނުންކުރެވޭނެ ކަމަށާއި، އެ އެޕް މެދުވެރިކޮށް ޓެކްސީއަށް އެދޭ ފަރާތުގެ ލޮކޭޝަނާއި އެންމެ ގާތުގައިވާ ޓެކްސީ ހުރި ތަން ފަސޭހަކަމާއެކު ބަލާލެވޭނެ ކަމަށް އެ ކުންފުނިން މައުލޫމާތުދެ އެވެ.
މީގެ އިތުރުން، ކަސްޓަމަރުންނަށް ދަތުރުކުރުމުގައާއި އެޕްލިކޭޝަން ބޭނުންކުރުމުގައި ދިމާވާ އެކި މައްސަލަތަކަށް އެހީތެރިކަން ފޯރުކޮށްދިނުމަށްޓަކައި އެމްޓީސީސީން ވަނީ ޚާއްސަ ހޮޓްލައިން ނަންބަރެއްވެސް ގާއިމުކޮށް ފައެވެ. އެގޮތުން 1655 އަށް ގުޅައިގެން ޓެކްސީގެ ޚިދުމަތާ ގުޅޭ މައުލޫމާތާއި އެހީތެރިކަން ހޯދޭނެ ކަމަށް އެ ކުންފުނިން ބުނެފައިވެ އެވެ.
