ފޭކް ބަދުއަޚުލާގީ މަންޒަރުތައް ފެތުރުމުގެ ނުރައްކާ އޮތުމުން "ގްރޮކް" ޗެޓްބޮޓް ބްލޮކްކުރި ދުނިޔޭގެ ފުރަތަމަ ގައުމަކަށް އިންޑޮނޭޝިއާ ވެއްޖެ

އޭއައި ބޭނުންކޮށްގެން އުފައްދާ ފޭކް ބަދުއަޚުލާގީ މަންޒަރުތައް ފެތުރުމުގެ ނުރައްކާ އޮތުމުން، އީލޮން މަސްކްގެ "ގްރޮކް" (Grok) ޗެޓްބޮޓް ބްލޮކްކުރި ދުނިޔޭގެ ފުރަތަމަ ގައުމަކަށް އިންޑޮނޭޝިއާ ވެއްޖެ އެވެ.

އިންޑޮނޭޝިއާގެ ކޮމިއުނިކޭޝަން އެންޑް ޑިޖިޓަލް އެފެއާޒް މިނިސްޓަރު ހޮނިހިރު ދުވަހު ވިދާޅުވި ގޮތުގައި، މީހުންގެ ނުރުހުމުގައި އޭއައި ބޭނުންކޮށްގެން އުފައްދާ ބަދުއަޚުލާގީ "ޑީޕްފޭކް" (deepfakes) ތަކަކީ އިންސާނީ ހައްގުތަކާއި، އިންސާނީ ކަރާމާތާއި، އަދި ޑިޖިޓަލް މާހައުލުގައި ރައްޔިތުންގެ ސަލާމަތަށް އޮތް ބޮޑު ނުރައްކަލެކެވެ.

"އޭއައި ޓެކްނޮލޮޖީ ބޭނުންކޮށްގެން އުފައްދާ ފޭކް ބަދުއަޚުލާގީ މަންޒަރުތަކުގެ ނުރައްކަލުން އަންހެނުންނާއި، ކުޑަކުދިން އަދި އާންމު ރައްޔިތުން ރައްކާތެރިކުރުމަށްޓަކައި، ސަރުކާރުން މިވަނީ 'ގްރޮކް' އެޕްލިކޭޝަނަށް ވަދެވޭ މަގު ވަގުތީ ގޮތުން ބަންދުކޮށްފައި،" މިނިސްޓަރު މިއުތިއާ ހާފިޒް ނެރުއްވި ބަޔާނެއްގައި ވިދާޅުވި އެވެ.

އިންޑޮނޭޝި އާ އިން މި ފިޔަވަޅު އަޅާފައި މިވަނީ، ޑީޕްފޭކްތަކާ ގުޅިގެން ކުރިމަތިވަމުންދާ ފާޑުކިޔުންތައް ކުޑަކުރުމުގެ ގޮތުން، އެކްސް ގައި ގްރޮކް މެދުވެރިކޮށް ފޮޓޯ އުފެއްދުމާއި އެޑިޓްކުރުމުގެ ފުރުސަތު ހަމައެކަނި ފައިސާ ދައްކައިގެން ސަބްސްކްރައިބް ކުރާ މީހުންނަށް މަސްކް ހަނިކުރިތާ އެއް ދުވަސް ފަހުންނެވެ.

ފޮޓޯތަކުގައި ތިބޭ މީހުންގެ އަންނައުނު ވަކިކޮށްލެވޭ ގޮތަށް ފޮޓޯ ބަދަލުކުރުމުގެ ފުރުސަތު ގްރޮކް އިން ދޭތީ، ބައެއް ގައުމުތަކުން ދަނީ އެކަމާ ދެކޮޅަށް ފާޅުގައި އަޑުއުފުލައި، މަސްކް ޖޫރިމަނާ ކުރާނެ ކަމުގެ އިންޒާރު ދެމުންނެވެ. މަސްކް ބުނާ ގޮތުގައި ގްރޮކް ބޭނުންކޮށްގެން ޣައިރުގާނޫނީ އެއްޗެއް އުފައްދާ ކޮންމެ މީހަކަށް ވެސް، އެފަދަ އެއްޗެއް ސީދާ އިންޓަނެޓަށް އަޕްލޯޑް ކުރުމުން ލިބޭ ފަދަ ހަރުކަށި އަދަބު ލިބޭނެ އެވެ.

ނަމަވެސް، ޔޫރަޕްގެ އިސް އޮފިޝަލުންނާއި ޓެކްނޮލޮޖީގެ ދާއިރާގައި މަސައްކަތްކުރާ ފަރާތްތަކުން ވަނީ، ފައިސާ ދައްކާ މީހުންނަށް އެކަނި މި ޚިދުމަތް ހަނިކުރުމަކީ އެ މީހުންގެ ކަންބޮޑުވުންތަކަށް އޮތް ހައްލެއް ނޫން ކަމަށް ބުނެ، މި ހަފުތާގައި އެކަމަށް ވަރަށް ބޮޑަށް ފާޑުކިޔާފަ އެވެ.

އިނގިރޭސި ބޮޑުވަޒީރު ކިއަރ ސްޓާމާގެ އޮފީހުން ބުނި ގޮތުގައި، މިއީ މިފަދަ ކަންކަމުގެ ޝިކާރައަކަށްވާ މީހުންނަށް ކުރެވޭ "މަލާމާތެއް" ކަމަށާއި، މިއީ އެއްވެސް ހައްލެއް ނޫން ކަމަށެވެ. ޑައުނިންގް ސްޓްރީޓްގެ ތަރުޖަމާނަކު ހުކުރު ދުވަހު ވިދާޅުވީ، "މީގެ މާނަ އަކީ ޣައިރުގާނޫނީ ފޮޓޯ އުފެއްދުމަށް މަގުފަހިކޮށްދޭ އޭއައި ވަސީލަތެއް 'ޕްރީމިއަމް' ޚިދުމަތަކަށް ބަދަލުކުރުމެވެ. 

އިންޑޮނޭޝިއާގެ މިނިސްޓްރީން ބުނީ މި މައްސަލައިގައި މަޝްވަރާ ކުރުމަށް އެކްސްގެ އޮފިޝަލުން ހާޒިރުކޮށްފައިވާ ކަމަށެވެ. 285 މިލިއަން މީހުންގެ އާބާދީ އެއް އޮންނަ އިންޑޮނޭޝިއާ ގައި، ބަދުއަޚުލާގީ ކަންކަން ހިމެނޭ އެއްޗެއް އިންޓަނެޓްގައި ފެތުރުމާ ދެކޮޅަށް ވަރަށް ހަރުކަށި ގަވާއިދުތަކެއް އޮވެ އެވެ.