ތައިވާނަށް 7.0 ގެ ބާރު މިނުގެ ބިންހެލުމެއް އަތުވެއްޖެ
ތައިވާނުގެ އިރުއުތުރުގައި އައި 7.0 މެގްނިޓިއުޑްގެ ބިންހެލުން ހުރިހާ ހިސާބަކަށް އިހުސާސްކުރެވުނު ނަމަވެސް ބޮޑެތި ގެއްލުންތަކެއް ލިބިފައެއް ނުވޭ. ގޭސް ލީކުވުމާއި ފެން ލީކުވުންފަދަ ކުދި ގެއްލުންތަކާއި 3،000 އަށް ވުރެ ގިނަ ގެއަށް ވަގުތީ ގޮތުން ކަރަންޓު ކެނޑިފައިވޭ. އާފްޓަރ ޝޮކް ބިންހެލުންތަކަށް ސަމާލުވުމަށް މޫސުމާބެހޭ އިދާރާ އިން އިލްތިމާސްކޮށްފައިވޭ.
2024 އޭޕްރީލް 3 ވަަނަ ދުވަހު ތައިވާންގެ ހުއާލިއަން އަށް އައި 7.5 ބާރުމިނުގެ ބިން ހެލުމެއްގައި އިމާރާތެއް އަޅިއަރާލާފައި (ފައިލް)
ހޮނިހިރު ދުވަހު ތައިވާނުގެ އިރުއުތުރުގެ އީލާން އައްސޭރިފަށާ 32 ކިލޯމީޓަރު ދުރުން، 7.0 ބާރު މިނުގެ ބިންހެލުމެއް އައިސްފައިވާ ކަމަށް އެ ގައުމުގެ މޫސުމާބެހޭ އިދާރާ އިން ހާމަކޮށްފިއެވެ.
މި ބިންހެލުމުގެ ސަބަބުން ބޮޑެތި ގެއްލުންތަކެއް ލިބިފައިވާ ކަމުގެ ރިޕޯޓެއް ލިބިފައި ނުވެއެވެ.
73 ކިލޯމީޓަރު (45 މޭލު) ފުނުން އައިސްފައިވާ މި ބިންހެލުން ތައިވާންގެ ހުރިހާ ހިސާބަކަށް އިހުސާސް ކުރެވުނު ކަމަށާއި، ވެރިރަށް ތައިޕޭގައި ވެސް އިމާރާތްތަކަށް ލޮޅުން އެރި ކަމަށް އެ އިދާރާ އިން ބުންޏެވެ. މި ބިންހެލުމަކީ ހަތަރުވަނަ ދަރަޖައިގެ ބިންހެލުމެއް ކަމަށް އެ އިދާރާ އިން ފާހަގަކުރިއިރު، އެއީ މާބޮޑު ގެއްލުންތަކެއް ލިބިދާނެ ކަމަށް ލަފާނުކުރެވޭ ގެޓަގަރީއެކެވެ.
ތައިޕޭ ސިޓީގެ ކަމާ ބެހޭ ފަރާތްތަކުން ބުނީ، ބިންހެލުމަށްފަހު ބޮޑެތި ގެއްލުންތަކެއް ލިބިފައިވާ ކަމުގެ ރިޕޯޓެއް ނުލިބޭ ކަމަށެވެ. ނަމަވެސް، ގޭސް ލީކުވުމާއި ފެން ލީކުވުންފަދަ ކުދިކުދި ގެއްލުންތަކާއި، އިމާރާތްތަކަށް ކުދި ގެއްލުންތައް ލިބިފައިވާ ވަކިވަކި ހާދިސާތަކެއް ފާހަގަކުރެވިފައިވާ ކަމަށްވެސް ބުންޏެވެ.
ތައިވާން ޕަވަރ ކޮމްޕެނީ އިން ބުނީ، އީލާންގައި 3،000 އަށް ވުރެ ގިނަ ގެއަށް ކަރަންޓުގެ ޚިދުމަތް ވަގުތީ ގޮތުން ކެނޑިފައިވާ ކަމަށެވެ.
މޫސުމާބެހޭ އިދާރާ އިން ވަނީ ކުރިއަށް އޮތް ދުވަހު 5.5 އާއި 6.0 އާ ދެމެދުގެ ބާރުމިނުގެ އާފްޓަރ ޝޮކް ބިންހެލުންތަކަށް ސަމާލުވުމަށް އާންމުންނަށް އިލްތިމާސްކޮށްފައެވެ.
ތައިވާންގެ ރައީސް ލާއި ޗިންގް-ޓެ ވަނީ ސޯޝަލް މީޑިއާގައި ކުރެއްވި ޕޯސްޓެއްގައި، ކަމާބެހޭ ފަރާތްތަކުން ހާލަތު ކޮންޓްރޯލްކޮށްފައިވާ ކަމަށާއި، ފަހުން އަތުވެދާނެ ލޮޅުންތަކަށް ސަމާލުވުމަށް އާންމުންނަށް ގޮވާލައްވާފައެވެ.
ތައިވާން އޮންނަނީ ދެ ޓެކްޓޮނިކް ޕްލޭޓް ގުޅޭ ސަރަހައްދާ ކައިރީގައި ކަމަށް ވުމުން، އެ ގައުމަށް ގިނައިން ބިންހެލުން ކުރިމަތިވެއެވެ. 2016 ވަނަ އަހަރު ތައިވާންގެ ދެކުނުގައި އައި ބިންހެލުމެއްގައި 100 އަށް ވުރެ ގިނަ މީހުން މަރުވިއިރު، 1999 ވަނަ އަހަރު 7.3 މެގްނިޓިއުޑްގެ ބިންހެލުމެއްގައި 2,000 އަށް ވުރެ ގިނަ މީހުން މަރުވެފައިވެއެވެ.
