ފީފާގެ ސުލްޙައިގެ އިނާމު ޓްރަމްޕް އަށް އެރުވުމާ އެކު، އިންފަންޓީނޯގެ ތައުރީފު

ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ދޭ ސުލްޙަ އަށް މަސައްކަތް ކުރުމުގެ އިނާމު، އެމެރިކާގެ ރައީސް ޑޮނަލްޑް ޓްރަމްޕް އަށް އަރުވައިފި އެވެ.

ފުރަތަމަ ފަހަރަށް ފީފާ އިން ދިން މި އިނާމު ޓްރަމްޕް އަށް އަރުވާފައި ވަނީ، ހުކުރު ދުވަހުގެ ރޭ ކުރިއަށް ދިޔަ ފީފާ ވޯލްޑް ކަޕްގެ ގުރު ނެގުމުގެ ރަސްމިއްޔާތުގެ ތެރެއިންނެވެ. އެމެރިކާގެ ވޮޝިންޓަންގައި ކުރިއަށް ދިޔަ އެ ރަސްމިއްޔާތުގައި ޓްރަމްޕް އަށް އެ ޝަރަފު އެރުވީ، ފީފާގެ ރައީސް ޖިއާނީ އިންފަންޓީނޯ އެވެ.

ޓްރަމްޕް އަށް އެ އިނާމު އެރުވުމަށް ފަހު، އިންފަންޓީނޯ ވަނީ އޭނާ އަށް ވަރަށް ބޮޑަށް ތައުރީފު ކުރައްވައިފަ އެވެ. އެގޮތުން ލީޑަރެއްގެ ކިބައިން ފެންނަން ޖެހޭ ހުރިހާ ސިފަ ތަކެއް، ޓްރަމްޕްގެ ކިބައިން ފެންނަމުން އަންނަ ކަމަށް އިންފަންޓީނޯ ވިދާޅުވި އެވެ. އަދި ޓްރަމްޕް އަކީ، ހުރިހާ އެންމެނާ މެދު ވެސް ވިސްނަވާ، އަޅާލައްވާ ލީޑަރެއް ކަމަށް އިންފަންޓީނޯ ވިދާޅުވެފައިވެ އެވެ.

އެކަން ފާހަގަ ކުރައްވަމުން އިންފަންޓީނޯ ވިދާޅުވީ، އެންމެން ވެސް ބޭނުން ވަނީ ރައްކާތެރި ދުނިޔެއެއްގައި އުޅުމަށް ކަމަށެވެ. އަދި އެންމެން ބޭނުންވާ ކަހަލަ މުޖުތަމައެއް ހޯދުމަށް އެދޭ ކަމަށް ވެސް އޭނާ ވިދާޅުވި އެވެ. އެކަމާ ވޯލްޑް ކަޕާ ގުޅުވާލައި އިންފަންޓީނޯ ވިދާޅުވީ، ބޭނުން ވަނީ އެންމެން ވެސް އެކުވެރިކަަމާ އެކު އުޅުމަށް ކަމަށެވެ. އަދި ވޯލްޑް ކަޕްގެ އެންމެ ބޮޑު މަޤުސަދަކީ ވެސް، އެންމެން އެއްތަން ކުރުވައި، އަދި އެކުވެރި ކުރުވުން ކަމަށް އޭނާ ފާހަގަ ކުރެއްވި އެވެ.

ޓްރަމްޕް އަށް އިޝާރާތް ކުރައްވައި އިންފަންޓީނޯ ވިދާޅުވެފައި ވަނީ، ސުލްޙަ ޤާއިމު ކުރުމަށް މިހާތަނަށް ޓްރަމްޕް ކުރައްވާފައިވާ މަސައްކަތާއި، އެކަމުގައި ދައްކަވާފައިވާ ހިތްވަރަށް ބަލާއިރު، ފީފާގެ ސުލްޙަވެރިކަމުގެ އިނާމު ޓްރަމްޕް އަށް ކޮންމެހެން ވެސް ހައްގުވާ ކަމަށެވެ.

އެ ރަސްމިއްޔާތުގައި ޓްރަމްޕް ވިދާޅުވެފައި ވަނީ، މީގެ އެއް އަހަރު ކުރިއަށް ބަލާއިރު އެމެރިކާ އޮތީ ރަނގަޅު ޙާލަތެއްގައި ނޫން ކަމަށެވެ. އެހެން ނަމަވެސް، މިހާރު އެމެރިކާ އަކީ ދުނިޔޭގައި އޮތް އެންމެ ރަނގަޅު، އަދި އެންމެ ހަމަ ޖެހިގެން އުޅެވޭނެ ޤައުމު ކަމަށް ޓްރަމްޕް ވިދާޅުވި އެވެ. ފީފާގެ އިނާމަަށް އިޝާރާތް ކުރައްވައި ޓްރަމްޕް ވިދާޅުވެފައި ވަނީ، އެއީ އޭނާގެ ޙަޔާތުގައި ވެސް ލިބުނު އެންމެ ޝަރަފުވެރި އެއް އިނާމު ކަމަށެވެ.

ފީފާ އިން ދޭ ސުލްޙަވެރި ކަމުގެ އިނާމު ޓްރަމްޕް އަށް އަރުވާފައިވާއިރު، މިއަހަރުގެ ނޯބެލް ސުލްޙައިގެ އިނާމަށް ވެސް ޓްރަމްޕް ވަނީ ވާދަ ކުރައްވައިފަ އެވެ. އެ އިނާމު އޭނާ އަށް ލިބެން ޖެހޭ ކަމަށް ޓްރަމްޕް އާއި، އޭނާގެ އަރިސް ބޭފުޅުން އަދި ޓްރަމްޕް އަށް ތާއީދު ކުރައްވާ ޤައުމު ތަކުން ހާމަ ކުރަމުން ދިޔަ ނަމަވެސް، ޓްރަމްޕް އަށް ނޯބެލް ސުލްޙައިގެ އިނާމު ލިބިވަޑައިގެންފައި ނުވެ އެވެ.

ފީފާގެ ރައީސް އިންފަންޓީނޯ އާއި، ޓްރަމްޕް އަކީ ވަރަށް ގާތް ގުޅުން އޮންނަ ދެ ބޭފުޅުންނެވެ. ޚާއްސަކޮށް، އެމެރިކާގެ ރައީސް ކަމުގެ ދެ ވަނަ ދައުރަށް މިއަހަރުގެ ޖަނަވަރީ މަހު ޓްރަމްޕް ވަޑައިގެންނެވި ފަހުން، ޓްރަމްޕް އާއި އިންފަންޓީނޯގެ ގުޅުން ފާހަގަ ކުރެވެ އެވެ.

އިސްރާއީލް އިން ޣައްޒާގައި ކުރިއަށް ގެންދިޔަ ހަނގުރާމަ ނިންމުމުގެ ސުލްޙައިގެ އެއްބަސްވުމުގައި ސޮއި ކުރުމަށް، މިޞްރުގެ ޝަރަމް އަލް ޝައިޚުގައި ބޭއްވި ބައްދަލުވުމުގައި ވެސް އިންފަންޓީނޯ ވަނީ ބައިވެރިވެ ވަޑައިގެންފަ އެވެ.