ހައި އެޗީވާސް އުސޫލަށް ގެނައި ބަދަލާއެކު ދަރިވަރުންގެ ހައްގުތަކަށް އުނިކަން އަންނާނެ: އައިޝަތު

ހައި އެޗީވާސް ސްކޮލާޝިޕަށް މަދުވެގެން އެއް އޭ ސްޓާ ހޯދަން ޖެހޭ ގޮތަށް ގެނައި ބަދަލަކީ ސްޓްރީމް މާއްދާތަކުން މަތީ ނަތީޖާއާއެކު ސްކޮލަރޝިޕް ހޯދުމަށް ގަދައަޅާ މަސައްކަތްކުރާ ދަރިވަރުންގެ ޙައްޤުތަކަށް އުނިކަން އަންނާނެ، ބޭއިންސާފު ނިންމުމެއް: ކުރީގެ އެޑިއުކޭޝަން މިނިސްޓަރ ޑރ. އައިޝަތު އަލީ

ހައި އެޗީވާސް ސްކޮލާޝިޕް ލިބޭ އުސޫލަށް ސަރުކާރުން ގެނައި ބަދަލަކީ، ސްޓްރީމް މާއްދާތަކުން މަތީ ނަތީޖާ ހޯދުމަށް ގަދައަޅާ މަސައްކަތްކުރާ ދަރިވަރުންގެ ހައްގުތަކަށް އުނިކަން އަންނާނެ ބޭއިންސާފު ނިންމުމެއް ކަމަށް ކުރީގެ އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ. ޑރ. އައިޝަތު އަލީ މިހެން ވިދާޅުވީ، ހައި އެޗީވާސް ސްކޮލާޝިޕް ދޭ އުސޫލަށް މިނިސްޓްރީ އޮފް ހަޔަރ އެޑިއުކޭޝަނުން ގެނައި ބަދަލާ ގުޅިގެން ފޭސްބުކްގައި ކުރެއްވި ޕޯސްޓެއްގައެވެ.

ހަޔަރ އެޑިއުކޭޝަން މިނިސްޓްރީން ދަންވަރުގެ ވަގުތެއްގައި އާންމުކުރި އާ އުސޫލުގައިވާ ގޮތުން، މަތީ ސާނަވީ އިމްތިހާނު ނިންމާ ދަރިވަރުންގެ ތެރެއިން ހައި އެޗީވާސް ސްކޮލާޝިޕް ދެން ލިބޭނީ އޭލެވެލް އިމްތިހާނުން މަދުވެގެން އެއް މާއްދާއިން 'އޭ ސްޓާ' ހޯދައިގެންނެވެ. މީގެ ކުރިން މި ސްކޮލާޝިޕް ލިބެނީ ފަސް މާއްދާއިން 'އޭ' ގްރޭޑް ހޯދާ ދަރިވަރުންނަށެވެ. ނަމަވެސް އާ އުސޫލުގެ ދަށުން، އޭލެވެލްގެ ތިން މާއްދާއާއި އެޗްއެސްސީ އިސްލާމާއި ދިވެހި ހިމެނޭހެން ޖުމްލަ ފަސް މާއްދާގެ ތެރެއިން މަދުވެގެން އެއް މާއްދާއިން 'އޭ ސްޓާ' ލިބެންޖެހޭއިރު، ބާކީ ހަތަރު މާއްދާއިން ދަށްވެގެން 'އޭ' ގްރޭޑް ހޯދަން ޖެހެއެވެ.

މި ބަދަލާ ގުޅިގެން ކަންބޮޑުވުން ފާޅުކުރައްވަމުން ޑރ. އައިޝަތު އަލީ ވިދާޅުވީ، ދަރިވަރުން ކުރިއަށްދާން އިޚްތިޔާރުކޮށްފައިވާ ދާއިރާއާ އެއްވެސް ގުޅުމެއް ނެތް މާއްދާތަކެއްގެ ސަބަބުން، އެކުދިންގެ ކުރިމަގުގެ ފުރުސަތުތައް ހަނިވެގެންދިއުމަކީ ބޮޑު ކަންބޮޑުވުމެއް ކަމަށެވެ. އަދި މިފަދަ ސިޔާސަތުތަކުގެ ސަބަބުން ދަރިވަރުންގެ ހަގީގީ ގާބިލިއްޔަތާއި ހުނަރު ވަޒަންކުރުމުގެ ބަދަލުގައި، އެކުދިންނަށް ކުރިއަށް ދިއުމަށް އޮތް މަގުތައް ބަންދުވެގެންދާނެ ކަމަށްވެސް އެކަމަނާ ފާހަގަކުރެއްވިއެވެ.

މި އުސޫލަށް ގެނައި ބަދަލުގެ ސަބަބުން އަރަބިއްޔާ ސްކޫލުގައި މަތީ ސާނަވީ ނިންމާ ދަރިވަރުންނަށްވެސް ބޮޑެތި ބަދަލުތަކެއް ވަނީ ކުރިމަތިވެފައެވެ. ކުރިން އޮތް ގޮތުންނަމަ، ޝަހާދާ ސާނަވިއްޔާގައި އެ ދަރިވަރަކު ކިޔެވި ސްޓްރީމްގެ ހުރިހާ މާއްދާއަކުން 'އޭ' ފާސް ހޯދުމުން ހައި އެޗީވާސް ސްކޮލާޝިޕް ލިބެއެވެ. ނަމަވެސް އާ އުސޫލުގެ ދަށުން، ޝަހާދާ ސާނަވިއްޔާ ނުވަތަ ގްރޭޑް 11 އަދި 12 ގައި ކިޔަވަންޖެހޭ މާއްދާތަކާއި އެޗްއެސްސީ ދިވެހި ހިމެނޭހެން، އޭގެ ތެރެއިން އެއް މާއްދާއިން 'އޭ ސްޓާ' ހޯދައި، ބާކީ މާއްދާތަކުން 'އޭ' ފާސް ހޯދުން މިހާރު ވަނީ މަޖުބޫރުވެފައެވެ.

ޑރ. އައިޝަތު އަލީ އިތުރަށް ވިދާޅުވީ، އެކަމަނާގެ އުއްމީދަކީ މި ބަދަލުގެ ސަބަބުން ދަރިވަރުންނަށް ކުރިމަތިވެދާނެ ނޭދެވޭ އަސަރުތަކަށް ރިއާޔަތްކޮށް، ހުރިހާ ދަރިވަރުންނަށް ވެސް ހަމަހަމަ ފުރުސަތުތަކެއް ލިބޭނެ ފަދަ ގޮތަކަށް މި އުސޫލު މުރާޖައާ ކުރެވިގެން ދިއުން ކަމަށެވެ. ސަރުކާރުން މި ބަދަލު ގެނެސްފައިވަނީ މަތީ ސާނަވީ އިމްތިހާނުތަކުގެ ފެންވަރު މަތިކުރުމުގެ ނަމުގައި ނަމަވެސް، ތައުލީމީ ދާއިރާގެ ގިނަ ބަޔަކު ދަނީ މި ނިންމުމުގެ ސަބަބުން ދަރިވަރުންނަށް ލިބޭ ފުރުސަތުތައް މަދުވެގެންދާނެ ކަމަށް ބުނެ ފާޑުކިޔަމުންނެވެ.