ސްޓޫޑަންޓު ލޯނުތަކާއި ސްކޮލަޝިޕުގައި ކިޔަވާ ދަރިވަރުންނަށް ފައިސާ ދޫކުރުން ލަސްވަނީ ހުށަހަޅާ މައުލޫމާތު ފުރިހަމަ ނުވުމާއި، އެ ފައިސާ ޖަމާކުރަން ޖެހޭ ބޭންކު އެކައުންޓުގެ މައުލޫމާތު ފުރިހަމަ ނުވާތީ ކަމަށް ހަޔަރ އެޑިއުކޭޝަން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.

ބުދަ ދުވަހު ރައްޔިތުންގެ މަޖިލީހަށް ލިޔުމުން ދެއްވި ޖަވާބުގައި މިނިސްޓަރު ހައިދަރު ވިދާޅުވީ މިނިސްޓްރީން އިއުލާންކުރާ ސްކޮލަރޝިޕް ފުރުސަތުތަކުގެ ދަށުން ރާއްޖޭން ބޭރަށް ކިޔަވަންދާ ދަރިވަރުން ފުރުމުގެ ކުރިން ފައިސާގެ ކަންކަން ހަމަޖެއްސޭހައި ވަގުތު އޮއްވައި ދަރިވަރު ފުރާ ދުވަސް މިނިސްޓްރީއަށް އެންގުމަށްފަހު ފުރާނަމަ އެ ދަރިވަރަކަށް 2 މަސް ދުވަހުގެ ސްޓައިޕެންޑާއި ކަނޑައެޅިފައިވާ އެހެނިހެން ބައެއް ކަންކަމަށްދޭ ފައިސާ ޔޫއެސް ޑޮލަރުން އެ ދަރިވަރަކާ ހަވާލު ކުރެވޭ ކަމަށެވެ.

މީގެ އިތުރުން މިނިސްޓަރު ހައިދަރު ވިދާޅުވީ ޓިއުޝަން ފީ ދެއްކުމަށާއި، ސްޓައިޕަންޑް ޖަމާކުރުމަށްޓަކައި މިނިސްޓްރީއާއި ދަރިވަރުން ހިއްސާކުރާ ބޭރުގެ ބޭންކް އެކައުންޓްތަކުގެ މައުލޫމާތު ބައެއް ހާލަތްތަކުގައި ފުރިހަމަ ނުވުމުގެ ސަބަބުން ފައިސާ ޖަމާކުރުމުގައި ދަތިތަކާ ކުރިމަތިވާ ކަމަށެވެ. އަދި މައުލޫމާތު ފުރިހަމަ ކުރުމަށް އެދި އަލުން ޔުނިވަރސިޓީއަށާއި، ދަރިވަރިވަރަށް އެންގޭ ކަމަށާއި، މި މައުލޫމާތުތައް ފުރިހަމަ ކުރުމަށްފަހު އަލުން މިނިސްޓްރީއަށް ހުށަހެޅުމުގައި ވެސް ވަގުތު ހޭދަވާ ކަމަށް މިނިސްޓަރު ހައިދަރު ވިދާޅުވިއެވެ.

މިއީ ފައިސާ ޖަމާކުރުމުގައި ލަސްތައް ދިމާވާ މައިގަނޑު ސަބަބުކަން ފާހަގަކުރައްވައި މިނިސްޓަރު ހައިދަރު ވިދާޅުވީ އެކައުންޓް މައުލޫމާތު ފުރިހަމަ ނުވުމުގެ ސަބަބުން ފައިސާ ޖަމާކުރުމުގައި ދިމާވާ ދަތިތައް ހައްލު ކުރުމަށްޓަކައި ފައިސާ ޖަމާކުރުމަށް ބޭނުންވާނެ ފުރިހަމަ މައުލޫމާތު ހިމެނޭގޮތަށް މައުލޫމާތު ކަރުދާހެއް ތައްޔާރުކޮށް ދަރިވަރުންނާއި ހިއްސާ ކުރާ ކަމަށެވެ. އެއީ ބޭންކްގެ މައުލޫމާތު ފުރިހަމަ ނުވުމުން ފައިސާ ޖަމާކުރުމުގައި ދިމާވާ މައްސަލަތައް ހައްލު ކުރުމުގެ ގޮތުން ކަމަށް މިނިސްޓަރު ހައިދަރު ލިޔުމުން ފޮނުވާފައިވާ ޖަވާބުގައި ވިދާޅުވެފައިވެއެވެ.

މިނިސްޓަރު ހައިދަރު ވިދާޅުވީ ސްކޮލަރޝިޓް ފުރިހަމަ ކުރަމުންދާ ދަރިވަރުންގެ ޓިއުޝަން ފީ ޖަމާކުރަމުންދަނީ އެ ދަރިވަރަކު ކިޔަވަމުންދާ ޔުނިވަރސިޓީއަކުން ޓިއުޝަން ފީ އިންވޮއިސް މިނިސްޓްރީއަށް ލިބުމުން ކަމަށެވެ. އެހެންކަމުން އިންވޮއިސް ލިބުމުން ލަސްވާނަމަ ފައިސާ ވަގުތަށް ޖަމާވުން ލަސްވާ ހާލަތް ވެސް ދިމާވާ ކަމަށް މިނިސްޓަރު ހައިދަރު ވިދާޅުވިއެވެ. އަދި ވިދާޅުވީ މިކަން ހައްލު ކުރުމަށް ދަރިވަރުންނަށް ޓިއުޝަން ފީ ޖަމާކުރާނެ ގޮތުގެ ޝެޑިއުލް ތައްޔާރުކޮށް ޝެޑިއުލްކޮށްފައިވާ ތަރީހަށް ފައިސާ ޖަމާކުރުމަށް ބޭނުންވާ އިންވޮއިސް މިނިސްޓްރީން ހޯދުމުގެ މަސައްކަތްތައް ކުރަމުންދާ ކަމަށެވެ.

މީގެ އިތުރުން މިނިސްޓަރު ހައިދަރު ވިދާޅުވީ ލޯނުގެ ފައިސާ ޖަމާކުރަނީ ދަރިވަރު ކަނޑައަޅައި ލޯނު އެގްރީމަންޓުގައި ހިމަނައި ބަޔާންވެފައި އޮންނަ ދިވެހި ރުފިޔާ އެކައުންޓަށް ކަމަށެވެ. ފުރަތަމަ ޕޭމަންޓަށްފަހު ދެން ކޮންމެ ޕޭމަންޓެއް ވެސް ޖަމާކޮށްދެނީ ދަރިވަރު ކިޔަވާ މަތީތައުލީމު ދޭ މަރުކަޒުގައި އެދަރިވަރު އެބަ ކިޔަވަމުންދާކަން އެމަރުކަޒުން މިނިސްޓްރީއަށް އެންގުމުން އެގްރީމަންޓުގައި ކަނޑައެޅިފައިވާ ތަރީހުތަކެއްގައިކަން ފާހަގަކުރެއްވިއެވެ.

އެއީ ކިޔަވަމުން ނުދާ ދަރިވަރެއްގެ ނަމުގައި ފައިސާ ހަރަދު ކުރެވެމުން ދިޔުން ހުއްޓުވުމަށް އަޅާފައިވާ ރައްކާތެރިކަމުގެ ފިޔަވަޅެއް ކަމަށާއި، މިލިޔުން ފޮނުވަން ވީ ގޮތުގެ އިރުޝާރު ދަރިވަރުންނަށް ދީފައި އޮތްނަމަވެސް ބައެއް ދަރިވަރުން އެގޮތަށް އެކަންކުރުމުގެ ބަދަލުގައި ޕްރޮގްރާމް ފެށުމަށް ދޫކޮށްފައި އޮންނަ ޕްލޭސްމަންޓު ލެޓަރ ފަދަ ދަރިވަރު ކިޔަވަމުންދާކަން ކަށަވަރު ކުރެވެން ނެތް ލިޔުން ހުށަހަޅާ ކަމަށް ވެސް މިނިސްޓަރު ހައިދަރު ވިދާޅުވިއެވެ. އަދި ވިދާޅުވީ މިސަބަބާއި ގުޅިގެން ވެސް ފައިސާ ދޫކުރުން ލަސްވާ ކަމަށެވެ.