ހަނގާގެ ޝިކާރައަކަށްވުމުގެ ކުރިން ދަރިވަރުންނަށް ހަނގާ ނުކުރުމަށް ދަސްކޮށްދޭންޖެހޭ: އެޑިއުކޭޝަން މިނިސްޓަރ
26 ފެބުރުއަރީ 2023 | އާދީއްތަ 13:14ހަނގާ ކުރުމަކީ ބާރުގެ ބޭނުންކުރުމާއެކު ޤަސްދުގައި ކުރާ އަމަލުތައް
ސްމައިލް އޮން ކެމްޕޭންގެ ތެރެއިން
ހަނގާގެ ޝިކާރައަކަށްވުމުގެ ކުރިން ދަރިވަރުންނަށް ހަނގާ ނުކުރުމަށް ދަސްކޮށްދޭންޖެހޭ ކަމަށް އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވެއްޖެއެވެ.
ސްމައިލް އޮން ކެމްޕެއިންގެ ދަށުން ރާއްޖޭގެ ސްކޫލުތަކުގައި ހަނގާކުރުމުން ދުރުހެލިވުމަށާއި ރައްކާތެރިވުމަށް ހިންގާ ޚާއްސަ ހަރަކާތްތައް މުހްޔިއްދީން ސްކޫލުގައި އިފްތިތާހު ކުރުމުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރ ވިދާޅުވީ ދަރިވަރުންނަށް އެންމެ ފުރިހަމައަށް އުނގެނޭނީ ފަހި މާހައުލެއް ޤާއިމުކޮށްދީގެން ކަމަށެވެ. އަދި ތައުލީމީ ނިޒާމުގައި ހަނގާ ކުރުން ހުއްޓުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ މުހިންމު ވައުދުފުޅެއް ކަމަށެވެ.
މިކަމަށް އުސޫލެއް އެކުލަވާފައިވާ ކަމަށާއި އެހެންނަމަވެސް ކުދިން އަދިވެސް ހަނގާގެ ޝިކާރައަކަށްވާކަން މިނިސްޓަރ ފާހަގަކުރެއްވިއެވެ. މިކަންތައްތައް ހުއްޓުވުމަށް މަސައްކަތް ކުރަންޖެހޭ ކަމަށް ވިދާޅުވިއެވެ. ސްމައިލް އޮން ކެމްޕެއިނަށް އަލިއަޅުއްވާލައްވާ މިނިސްޓަރ ވިދާޅުވީ އެއް މަސް ދުވަހަށް މި ކެމްޕޭން ކުރިއަށް ގެންދާނެ ކަމަށާއި ހުރިހާ ފަންނަނީ ލަފައެއް ދޭނީ އާކް ޖަމިއްޔާއިން ކަމަށެވެ.
ހަނގާ ކުރުމަކީ ބާރުގެ ބޭނުންކުރުމާއެކު ޤަސްދުގައި ކުރާ އަމަލުތައް ކަމަށާއި މިފަދަ ކަންތައްތައް ކުރިމަތިވާ ކުދިންނަށް ޖިސްމާނީ ގޮތުންނާއި ތައުލީމީ ހަޔާތަށް ވެސް ގެއްލުން ކުރިމަތިވާ ކަމަށެވެ. އަދި އެކަންތައްތައް ހުއްޓުވަމީ ކޮންމެ މީހެއްގެ ވެސް ޒިންމާއެއް ކަމަށާއި މިފަދަ އަމަލެއް ހިންގާކަން އެނގޭނަމަ އެކަމެއް ރިޕޯޓްކޮށް ހުއްޓުވަން ޖެހޭ ކަމަށް ވިދާޅުވިއެވެ.
މިނިސްޓަރ ވަނީ ސްމައިލް އޮން ކެމްޕޭން ކާމިޔާބު ކެމްޕޭނަކަށް ހަދަން ސްކޫލް ކުދިން ކުރާ މަސައްކަތަށް ޝުކުރު އަދާކުރައްވާފައެވެ.
