ހައިދަރު ވިދާޅުވީ ބޭރުގައި ތިބި ދަރިވަރުން ފައިސާ ނުލިބިގެން ޝަކުވާ ނުކުރާ ކަމަށް!

ބޭރުގައި ކިޔަވަން ތިބި ދަރިވަރުން ފައިސާ ނުލިބިގެން ޝަކުވާ ނުކުރާ ކަމަށް ހަޔަރ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދު ވިދާޅުވެއްޖެއެވެ.

ރާއްޖެޓީވީ "ފަށާއިރު" ޕްރޮގްރާމް ގެ ތެރެއިން މިނިސްޓަރު ހައިދަރު  ފޯނަށް ގުޅުއްވައި، ދަރިވަރުންނަށް ފައިސާ ނުލިބިގެން ޝަކުވާ ކޮށްފައި ވޭތޯ ސުވާލުކުރުމުން ހައިދަރު ވިދާޅުވީ އެކަހަލަ އެއްވެސް ޝަކުވާއެއް އެ މިނިސްޓްރީ އަށް ލިބިފައި ނުވާ ކަމަށެވެ. އަދި މިނިސްޓްރީ އަށް ގުޅައިފި ނަމަ ބަރާބަރަށް އެޓެންޑް ވާކަމަށް ހައިދަރު ވިދާޅުވި އެވެ. ސްޓޫޑެންޓް ލޯން ސްކީމްގައި ރާއްޖެއިން ބޭރުން ކިޔަވަމުންދާ ދަރިވަރުންނަށް ފައިސާ ލިބުމުގައި ދަތިތައް ދިމާވުމަކީ ވަރަށް ބޮޑަށް ދިމާވާ މައްސަލައެކެވެ.

އަޅުގަނޑުމެންނަށް ލިބޭ ވަރަކުން މަސައްކަތް ކުރިއަށް އެބަ ގެންދަން ހަމަ.. އަޅުގަނޑުމެންނަށް ގުޅައިފިއްޔާ ކުރިއަށް ގެންދަން

ހަޔަރ އެޑިއުކޭޝަން މިނިސްޓަރު ޑރ. އަލީ ހައިދަރު އަހުމަދު

މީގެ އިތުރުން ހައިދަރު ވިދާޅުވީ ދަރިވަރުން ރާއްޖެ ޓީވީ އަށް ގުޅައިގެން ފައިސާ ނުލިބޭ މައްސަލަ ހައްލު ނުވާނެ ކަމަށެވެ. އަދި ދަރިވަރުން ކުރާ މެއިލް އަށް ވެސް މިނިސްޓްރީ އިން ޖަވާބު ދެއްވާނެ ކަމަށާއި ފޯނަށް ގުޅުއްވައިގެން ވެސް ޖަވާބު ނުދީ ނުހުންނާނެ ކަމަށެވެ. 

ފާހަގަކޮށްލެވޭ ގޮތުގައި ސްޓޫޑެންޓް ލޯން ސްކީމްގައި ރާއްޖެއިން ބޭރުން ކިޔަވަމުންދާ ދަރިވަރުންނަށް ފައިސާ ލިބުމުގައި ދަތިތައް ދިމާވުމަކީ ވަރަށް ބޮޑަށް ދިމާވާ މައްސަލައެކެވެ. އެކަމުގެ ކަންބޮޑުވުންތައް މިދިޔަ އަހަރާއި މި އަހަރު ވެސް އިތުރުވެފައިވާއިރު، ސްޕެއިންގައި ޕައިލެޓުކަން ކިޔަވާ ދަރިވަރުންތަކެއް އެހީއަށް އެދި ހަޔަރ އެޑިއުކޭޝަން މިނިސްޓްރީއަށް މިއަހަރުގެ ފެބްރުއަރީ މަހު ސިޓީއެއް ވެސް ފޮނުވާފައިވެ އެވެ. އެ ސިޓީގައި ވަނީ، ސަރުކާރުން ޓޮޕް އަޕް ލޯނަށް ހުޅުވާނުލާ ކަމުގެ ކަންބޮޑުވުމާއި ކޯހުގެ މުއްދަތަށްވާ ވަރަށް ފައިސާ ހަމަޖެހިފައި ނުވާ ކަމުގެ ކަންބޮޑުވުން ފާޅުކޮށްފަ އެވެ.

އޭގެ އިތުރުން ސަރުކާރުގެ ޚަރަދުގައި ބޭރު ގައުމުތަކުގައި ކިޔަވަމުންދާ ދަރިވަރުންނަށް ދިމާވާ ދަތިތަކާއި، އެކުދިންގެ ޝަކުވާތައް ބަލައިގަތުމަށް "ހަޔަރ އެޑިއުކޭޝަން މެނޭޖުމެންޓް ސިސްޓަމް"ގެ ނަމުގައި ޚާއްސަ މޮބައިލް އެޕްލިކޭޝަނެއް 2025 ވަނަ އަހަރުގެ އޮކްޓޯބަރު މަހުގެ ކުރިން ތައާރަފުކުރައްވާނެ ކަމަށް ވެސް ހައިދަރު ވަނީ ވިދާޅުވެފަ އެވެ. އެހެން ނަމަވެސް އެ މުއްދަތު ފަހަނައަޅައި ދިޔައިރުވެސް އެ އެޕްލިކޭޝަން ތައާރަފް ނުކުރެވެ އެވެ.