މިދިޔަ އަހަރަކީ ޤައުމީ ބޭންކުގެ ހައިސިއްޔަތުން ގައުމަށް ފައިދާހުރި ގިނަ މަޝްރޫޢުތަކާއެކު ރެކޯޑު މާލީ ނަތީޖާއެއް ހާސިލުކުރެވުނު އަހަރެއް
ބޭންކް އޮފް މޯލްޑިވްސްއަށް ވޭތުވެދިޔަ އަހަރު ސާފު ފައިދާގެ ގޮތުގައި ރެކޯޑު އަދަދެއް ކަމަށްވާ 2.5 ބިލިއަން ރުފިޔާ ލިބިފައިވާއިރު، މިއީ ކުރީ އަހަރާ އަޅާބަލާއިރު 10 އިންސައްތައިގެ ކުރިއެރުމެއް. ބޭންކުގެ މާލީ ހާލަތު ވަރުގަދަވެ ލޯނު ޕޯޓްފޯލިއޯއާއި ޖުމްލަ އެސެޓަށް ބޮޑު ކުރިއެރުމެއް ލިބިފައިވާއިރު، ކުރިއަށް އޮތް ތަނުގައި ޑިޖިޓަލް ޚިދުމަތްތައް ފުޅާކޮށް ކަސްޓަމަރުންނަށް ދޭ ޚިދުމަތުގެ ފެންވަރު މަތިކުރުމަށް ބޭންކުން ވަނީ އަމާޒު ހިފާފައި. މީގެ އިތުރުން، ގައުމީ ބޭންކުގެ ދައުރު ފުޅާކޮށް ރާއްޖޭގެ އިގްތިސާދަށް ހެޔޮ ބަދަލުތަކެއް ގެނައުމަށް ބޭންކުން އިސްކަންދޭނެ ކަމަށް ސީއީއޯ މުޙައްމަދު ޝަރީފް ވިދާޅުވި.
28 މާޗް 2026، މާލެ، ބޭންކް އޮފް މޯލްޑިވްސްގެ އަހަރީ އާންމު ޖަލްސާގައި އެ ބޭންކުގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ހިއްސާދާރުންނާ މުހާތަބު ކުރައްވަނީ. | ބެންކް އޮފް މޯލްޑިވްސް
ބޭންކް އޮފް މޯލްޑިވްސް (ބީއެމްއެލް) ގެ 43 އަހަރުވީ ދިގު ތާރީޚުގައި އެންމެ ކާމިޔާބު މާލީ ނަތީޖާ ހާސިލުކުރި އަހަރަށް ފަހު، އެ ބޭންކުގެ އަހަރީ އާންމު ޖަލްސާ ރޭ ބާއްވައިފި އެވެ.
މި ޖަލްސާގައި ހިއްސާދާރުންނާ މުޚާތަބު ކުރައްވައި ބޭންކުގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވަނީ ބޭންކުން ހޯދާފައިވާ ތާރީޚީ ކުރިއެރުންތަކާއި، ކުރިއަށް އޮތް ތަނުގައި ޚިދުމަތްތައް ފުޅާކުރުމަށް ގެންގުޅޭ ސްޓްރެޓެޖީތަކުގެ ތަފްސީލު ހިއްސާކުރައްވާފަ އެވެ.
ވޭތުވެދިޔަ އަހަރު ބޭންކް އޮފް މޯލްޑިވްސްއަށް ސާފު ފައިދާގެ ގޮތުގައި 2.5 ބިލިއަން ރުފިޔާ ލިބިފައިވާއިރު، މިއީ އޭގެ ކުރީ އަހަރާ އަޅާބަލާއިރު 10 އިންސައްތައިގެ ކުރިއެރުމެކެވެ. މި ކާމިޔާބީގެ މައިގަނޑު ސަބަބަކީ ބޭންކުން ދޫކޮށްފައިވާ ލޯނުތަކުގެ ޕޯޓްފޯލިއޯ 25 އިންސައްތަ އިތުރުވެ، 25.2 ބިލިއަން ރުފިޔާއަށް އުފުލުމެވެ. މީގެ އިތުރުން ބޭންކުގެ ޖުމްލަ އެސެޓް މިހާރު ވަނީ 55.8 ބިލިއަން ރުފިޔާއަށް އަރާފައެވެ. ކަސްޓަމަރުން ބޭންކަށް ކުރާ އިތުބާރު ހާމަކޮށްދޭ އެންމެ ބޮޑު ހެއްކަކީ ބޭންކުގައި ރައްކާކޮށްފައިވާ ފައިސާގެ އަދަދު 37.2 ބިލިއަން ރުފިޔާއަށް އިތުރުވެފައިވުމެވެ.
ޖަލްސާގައި ވާހަކަދައްކަވަމުން ސީއީއޯ މުޙައްމަދު ޝަރީފް ވިދާޅުވީ، ވޭތުވެދިޔަ އަހަރަކީ ހަމައެކަނި ރެކޯޑު އަދަދަކަށް ފައިދާ ލިބުނު އަހަރެއް ނޫން ކަމަށާއި، އެއީ ގައުމީ ބޭންކެއްގެ ގޮތުގައި ބީއެމްއެލްގެ ދައުރު ވަރުގަދަކޮށް، ރާއްޖޭގެ ހުރިހާ ކަންކޮޅުތަކަކަށް މާލީ ޚިދުމަތްތައް ފުޅާކުރި އަހަރެއް ކަމަށެވެ. ބޭންކުގެ ކާމިޔާބީ މިނެކިރެނީ ހަމައެކަނި މާލީ ހިސާބުތަކުން ނޫން ކަމަށާއި، އޭގެ ބަދަލުގައި ދިވެހިންގެ ދިރިއުޅުމަށާއި އިގްތިސާދަށް ކުރާ ހެޔޮ އަސަރުތަކުން ކަމަށްވެސް އޭނާ ފާހަގަކުރެއްވި އެވެ.
ބޭންކުގެ މާލީ ހާލަތު އިތުރަށް ހަރުދަނާކޮށްދެނީ ގާނޫނުން ލާޒިމުކުރާ މިންގަނޑަށްވުރެ މަތީގައި ހުރި ކެޕިޓަލް އެޑެކުއަސީ ރޭޝިއޯއާއި ލިކުއިޑިޓީ ޕޮޒިޝަނުންނެވެ. އެގޮތުން ބޭންކުގެ ކެޕިޓަލް އެޑެކުއަސީ ރޭޝިއޯ ހުރީ 48.1 އިންސައްތައިގަ އެވެ. މިއީ ބޭންކުގެ ރިސްކް މެނޭޖްމެންޓް ނިޒާމު ހަރުދަނާކަމާއެކު ކުރިއަށްދާކަމުގެ ހެއްކެކެވެ.
މުސްތަގުބަލަށް ރޭވިފައިވާ ކަންކަމަށް އަލިއަޅުއްވާލައްވަމުން ޝަރީފް ވިދާޅުވީ، ބޭންކުގެ ސްޓްރެޓެޖީ ބިނާވެފައިވަނީ ޑިޖިޓަލް ޚިދުމަތްތަކަށް އިސްކަންދިނުމާއި، ކަސްޓަމަރުންނަށް އެންމެ ފުރިހަމަ ޚިދުމަތް ފޯރުކޮށްދިނުމުގެ މައްޗަށް ކަމަށެވެ. ބަދަލުވަމުންދާ ދުނިޔޭގައި ބޭންކުގެ ހިންގުން ހަރުދަނާކޮށް، ދިގު ރާސްތާގެ ދެމެހެއްޓެނިވި މަޝްރޫޢުތަކަށް އެހީތެރިކަން ފޯރުކޮށްދިނުމަކީ ބޭންކުގެ މައިގަނޑު އަމާޒެވެ. އަދި މުވައްޒަފުންގެ ކުރިއެރުމަށް އިންވެސްޓްކޮށް، "ދިވެހިންގެ ބޭންކު" ގެ ގޮތުގައި ދެމިއޮތުމަށް ބޭންކުން މަސައްކަތް ކުރާނެ ކަމަށް އޭނާ ވިދާޅުވި އެވެ.
ޝަރީފްގެ ވާހަކަފުޅު ނިންމަވާލެއްވީ ބޭންކުގެ 390,000 އަށްވުރެ ގިނަ ކަސްޓަމަރުންނަށާއި، މުވައްޒަފުންނަށާއި، ހިއްސާދާރުން ބޭންކަށް ކުރައްވާ އިތުބާރަށް ޝުކުރު އަދާކުރައްވަމުންނެވެ. މީގެ އިތުރުން ބޭންކުގެ ޗެއަރޕާސަން އަދި ޑައިރެކްޓަރުންގެ ބޯޑުން ދެއްވާ އިރުޝާދަށް ޝުކުރު ދަންނަވަމުން، ކުރިއަށް އޮތް 2026 ވަނަ އަހަރަކީވެސް ބޭންކަށް ކާމިޔާބު އަހަރަކަށް ވާނެ ކަމަށް އުއްމީދު ކުރައްވާ ކަމަށް އޭނާ ވިދާޅުވި އެވެ.
