ބީއެމްއެލްގެ ފައިދާ އިތުރު ކުރީ ވިޔަފާރި އިތުރަށް ފުޅާކޮށްގެން، އަގުބޮޑުކޮށްގެނެއްނޫން - ސީއީއޯ
26 މާރިޗު 2026 | ބުރާސްފަތި 11:30ބޭންކް އޮފް މޯލްޑިވްސްގެ 43 އަހަރުވީ ތާރީޚުގައި އެންމެ ގިނަ ލޯނު ދޫކުރި އަހަރަކަށް މިދިޔަ އަހަރު ވެފައިވާއިރު، ޓެކުހަށް ކެނޑުމަށްފަހު ސާފު ފައިދާގެ ގޮތުގައި 2.5 ބިލިއަން ރުފިޔާ ވަނީ ލިބިފައި. މީގެ އިތުރުން އަލަށް 30،000 ކަސްޓަމަރުން ބޭންކާ ގުޅި، ޑިޕޮސިޓްތައް 16 އިންސައްތަ އިތުރުވުމަކީ ކަސްޓަމަރުންގެ އިތުބާރު ބޮޑުވަމުންދާކަމުގެ ހެއްކެއް ކަމަށް ސީއީއޯ މުހައްމަދު ޝަރީފު ވިދާޅުވި. ބޭންކުގެ ރައުސްމާލުގެ ފުދުންތެރިކަން ގާނޫނީ މިންގަނޑަށްވުރެ ހަތަރު ގުނަ އިތުރުވެފައިވާއިރު، މިއީ މާލީގޮތުންނާއި އިޖުތިމާއީ ގޮތުން ބޭންކަށް ލިބުނު ބޮޑު ކާމިޔާބީއެއް.
ބޭންކް އޮފް މޯލްޑިވްސް | ބީއެމްއެލް
ބޭންކުން ފައިދާ އިތުރުކުރަނީ އިންޓަރެސްޓާއި ފީތައް އިތުރުކޮށްގެން ކަމަށް ބުނެ އަބަދުވެސް ވާހަކަ ދައްކާ ކަމަށާއި އެހެންނަމަވެސް ބޭންކުން މިދިޔަ އަހަރު ފައިދާ އިތުރުކޮށްފައިވާނީ ވިޔަފާރި އިތުރަށް ފުޅާކޮށްގެން ކަމަށް ސީއީއޯ މުހައްމަދު ޝަރީފު ވިދާޅުވެއްޖެ އެވެ.
ބީއެމްއެލްގެ ސީއީއޯ ވިދާޅުވީ މިދިޔަ އަހަރު މުޅިން އަލަށް 10 ބިލިއަނަށް ވުރެ ގިނަ ރުފިޔާގެ ލޯނު ދޫކުރި ކަމަށެވެ. މިއީ ބެންކުގެ 43 އަހަރުވީ ދިގު ތާރީހުގައި އަހަރެއްގެ ތެރޭ އެންމެ ގިނަ ލޯނު ދޫކުރި އަހަރެވެ. އެއާ އެކީގައި ނެޓް ލޯންސް އެންޑް އެޑްވާންސަސް 25.2 ބިލިއަން ރުފިޔާއަށް އަރާފާއިވާ ކަމަށް އޭނާ ވިދާޅުވި އެވެ. އެއީ ކުރީ އަހަރާއި އަޅައިބަލާއިރު 25 ޕަސެންޓްގެ ކުރިއެރުމެއް ކަމަށް ސީއީއޯ ވިދާޅުވި އެވެ.
މީގެ އިތުރުން ލޯނު ނުދައްކާ ނިސްބަތް އޭގެ ކުރީ އަހަރާ އަޅާބަލާއިރު 1 އިންސައްތަ ދަށް ކުރެވުނު ކަމަށްވެސް އޭނާ ވިދާޅުވި އެވެ. ރައުސުލްމާލުގެ ފުދުންތެރިކަން ހުންނަންޖެހޭ ރޭޝިއޯ %48.1 ގައި ކަމަށާއި މިއީ ގާނޫނީގޮތުން ލާޒިމްކުރާ މިންގަނޑަށްވުރެ ހަތަރު ގުނަ އިތުރު އަދަދެއް ކަން ސީއީއޯ ފާހަގަކުރެއްވި އެވެ.
މިދިޔަ އަހަރު ފާހަގަކޮށްލެވެނީ ބޭންކަށް ގިނަ އަދަދެއްގެ ކަސްޓަމަރުން ވެސް ގުޅުނު އަހަރެއްގެ ގޮތުގަ އެވެ. އެގޮތުން މދިޔަ އަހަރު މުޅިން އަލަށް 30،000 ކަސްޓަމަރުން ބީއެމްއެލްއާ ވަނީ ގުޅިފަ އެވެ. މިދިޔަ އަހަރު ކަސްޓަމަރުންގެ ޑިޕޮސިޓް 16 ޕަސެންޓްގެ އިތުރުވުމާއެކު މިހާރު ހުރީ 37.2 ބިލިއަންގައި ކަމަށް ސީއީއޯ ވިދާޅުވި އެވެ. މިއިން ދައްކުވައިދެނީ ބޭންކުގެ ކަންކަން ރަނގަޅު ކުރުމަށް ކުރެވޭ މަސައްކަތްތަކާއި އެކު ބީއެމްއެލްއަށް ކަސްޓަމަރުން ކުރާ އިތުބާރު ބޮޑުވަމުން އަންނަކަންކަން ސީއީއޯ ފާހަގަކުރެއްވި އެވެ.
ގައުމީ ބޭންކުން ވަނީ މާލީގޮތުން ވެސް ފުރިހަމަ ކާމިޔާބެއް މިދިޔަ އަހަރު ހާސިލްކޮށްފަ އެވެ. އެގޮތުން ޓެކުހަށް ކެނޑުމަށް ފަހު ސާފުފައިދާގެ ގޮތުގައި 2.5 ބިލިއަން ރުފިޔާ ވަނީ ލިބިފަ އެވެ. މިއީ ކުރީ އަހަރާއި އަޅައިބަލާއިރު 10 ޕަސެންޓްގެ ކުރިއެރުމެކެވެ.
މިކުރިއެރުން ފާހަގަކޮށް ސީއީއޯ ވިދާޅުވީ، ގައުމީ ބޭންކަކީ މާލީ ގޮތުން އެންމެ ރަނގަޅު ނަތީޖާ ހޯދުމާއެކު އިޖުތިމާއީ ގޮތުންވެސް މުޅި ގައުމަށް ހެޔޮ ބަދަލެއް ގެނެސްދެވޭނެ މުއައްސަސާ އެއްކަން އަޅުގަނޑުމެން މިވަނީ ސާބިތުކޮށްދީފަ ކަމަށެވެ. އަދި ބޭންކު ހިންގަނީ ހަމައެކަނި މާލީ ފައިދާ ހޯދާ ބޭންކެއްގެ ގޮތުގައި ނޫން ކަމަށާއި، ބިނާކުރަނީ މިއަދާއި މާދަމާގެ ޖީލުތަކަށްޓަކައި ބިނާކުރާ އެންމެހައި ދިވެހީންގެ ބޭންކެއް ކަމަށެވެ.
