ބޭންކަކީ ހަމައެކަނި މާލީ މުއައްސަސާއެއް ނޫން އެއީ ގައުމީ ތަރައްގީގެ ބައިވެރިއެއް - ބީއެމްއެލް ސީއީއޯ
26 މާރިޗު 2026 | ބުރާސްފަތި 11:24ބީއެމްއެލްއަކީ ގައުމީ ތަރައްގީގެ މުހިއްމު ބައިވެރިއެއްކަން ފާހަގަކުރައްވައި، ސަރުކާރާ ގުޅިގެން މީހުން ދިރިއުޅޭ ހުރިހާ ރަށަކަށް އޭޓީއެމްގެ ޚިދުމަތް ފުޅާކޮށްފައިވާކަމަށް އެ ބޭންކުގެ ސީއީއޯ މުހައްމަދު ޝަރީފު ވިދާޅުވެއްޖެ. މީގެ އިތުރުން، ބޭންކުގެ ސަބްސިޑިއަރީ ކުންފުންޏެއް މެދުވެރިކޮށް 3،260 ހައުސިން ޔުނިޓް އެޅުމުގެ މަޝްރޫއެއް ކުރިއަށްދާކަމަށާއި، މިއީ ބޭންކުގެ ވިޔަފާރި ސިންދަފާދުކޮށް ރައްޔިތުންނަށް އަގުހެޔޮ ބޯހިޔާވަހިކަން ފޯރުކޮށްދިނުމަށް ނިންމި ނިންމުމެއްކަމަށް އޭނާ ވިދާޅުވި. ބޭންކުގެ ޖުމްލަ އެސެޓް ރާއްޖޭގެ ޖީޑީޕީގެ 38 އިންސައްތަ ތަމްސީލުކުރާކަމުން، ސަރުކާރާއެކު ގާތުން މަސައްކަތްކުރުމަކީ އިގްތިސާދީ ގޮތުން ބޭންކަށް މުހިއްމު ކަމެއްކަން ވެސް ސީއީއޯ ފާހަގަކުރެއްވި.
ބީއެމްއެލްގެ ސިއީއޯ އަދި މެނޭޖިންގ ޑިރެކެޓަރ މުހައްމަދު ޝަރީފު | ބީއެމްއެލް
ގައުމީ ބޭންކަކީ ހަމައެކަނި މާލީ މުއައްސަސާއެއް ނޫންކަމަށާއި އެއީ ގައުމީ ތަރައްގީގެ ބައިވެރިއެއް ކަމަށް ބީއެމްއެލްގެ ސިއީއޯ އަދި މެނޭޖިންގ ޑިރެކެޓަރ މުހައްމަދު ޝަރީފު ވިދާޅުވެއްޖެ އެވެ.
ބީއެމްއެލްގެ ސީއީއޯ ޝަރީފު ވިދާޅުވީ ގައުމީ ބޭންކުގެ ހައިސިއްޔަތުން ބީއެމްއެލްއަކީ ތަރައްގީގެ މުހިއްމު ބައިވެރިއެއް ކަމަށާއި ސަރުކާރާ އެކު ބާއްވާ ގުޅުމުގެ އަސްލަކީ ދެ ފަރާތުން ހިއްސާކުރާ އެއް ތަސައްވުރެއް ކަމަށެވެ.
އޭނާ ވިދާޅުވީ އެއީ ހަރުދަނާ، އެންމެންހައި ދިވެހިންނަށް ޝާމިލުވެވޭ، އަދި ފާގަތި ރާއްޖެއެއް ބިނާކުރުމުގެ ތަޞައްވަރެއް ކަމަށެވެ. ސަރުކާރާއެކު ކުރެވިފައިވާ މުހިއްމު ބައެއް މަސައްކަތްތައް ވެސް ސީއީއޯ ފާހަގަކުރެއްވި އެވެ. އެގޮތުން މުޅި ރާއްޖެއަށް ބީއެމްއެލް އޭޓީއެމް މަޝްރޫޢަކީ މީގެ އެންމެ ފުރިހަމަ އެއް މިސާލެއް ކަމަށް ސީއީއޯ ވިދާޅުވި އެވެ. ބީއެމްއެލް އިން ވަނީ 9 މަސް ތެރޭ 105 ރަށެއްގައި އޭޓީއެމްގެ ޚިދުމަތް ގާއިމުކޮށް މީހުން ދިރިއުޅޭ ހުރިހާ ރަށަކުން މި ޚިދުމަތް ލިބޭނެ މަގަ ފަހިކޮށްފަ އެވެ. އަދި މިކަން ކޮށްފައިވަނީ ކުރިން އޭޓީއެމް ބަހައްޓަމުން އައި އަގާ އަޅާ ބަލާއިރު 33 އިންސައްތަ ކުޑަކޮށްކަމަށް ސިއީއޯ ވިދާޅުވި އެވެ. އަދި މި ޕްރޮޖެކްޓްގެ އިންވެސްޓްމެންޓް ބޮޑު ބައެއްވެސް ސަރުކާރުން އެހީތެރިކަން ފޯރުކޮށްދީފައިވާ ކަމަށް ސީއީއޯ ވިދާޅުވި އެވެ.
މީގެ ނަތީޖާއަކީ އޭޓީއެމަށް ޖަމާކުރާ ފައިސާ އިތުރުވެ މާލީ ނިޒާމް ތެރެއަށް ފައިސާވަނުން ކަން ޝަރީފް ފާހަގަކުރެއްވި އެވެ.
މި ޕްރޮގްރާމްގައި ޝަރީފު ވަނީ ބީއެމްއެލް އިން އިމާރަތްކުރާ އަގުހެޔު ފްލެޓާއި ބެހޭގޮތުން ވެސް ވާހަކަ ދައްކާފަ އެވެ. ބީއެމްއެލްގެ ސަބްސިޑިއަރީ ކުންފުންޏެއް ކަމަށްވާ ބީއެމްއެލް އެފޯޑަބަލް ހޯމް ލީސިންގ ޕްރައިވެޓް ލިމިޓެޑްއިން ދަނީ ރާއްޖެ އާއި ރާއްޖޭން ބޭރުގެ ކުންފުނިތައް މެދުވެރިކޮށް 3260 ހައުސިން ޔުނިޓް އެޅުމުގެ މަސައްކަތްކުރަމުންނެވެ. މީގެ ސަބަބުން ދިވެހި އާއިލާތަކަށް ލިބޭނެ ފައިދާއަކީ ހެޔޮ އަގެއްގައި ބޯހިޔާވަހިކަން ކަށަވަރުވެ، ގިނަ ދުވަސްތަކެއް ވަންދެން ދެކެމުން އައި އަމިއްލަ ބޯހިޔާވަހިކަމުގެ ހުވަފެން ހަޤީޤަތަކަށްވާނެ ކަމަށް ސީއީއޯ ވިދާޅުވި އެވެ.
ޝަރީފް ވިދާޅުވީ މިފަދަ ގުޅުންތަކަކީ ހަމައެކަނި ސިޔާސަތު ތަންފީޒުކުރުމެއް ނޫން، މިއީ ވިޔަފާރީގެ ގޮތުން ބެލިޔަސް ނިންމާ ރަނގަޅު ނިންމުންތަކެއް ކަމަށެވެ. އަދި މީގެ ސަބަބުން އަގުހެޔޮ ބޯހިޔާވަހިކަން ފަދަ އައު ދާއިރާތަކަށް ވަނުމުން، އާމްދަނީ ލިބޭނެ އައު މަގުތައް އުފެދި، ބެންކުގެ ވިޔަފާރި ސިންދަފާދުވެގެންދާ ކަމަށް އޭނާ ވިދާޅުވިއެވެ. މި ޔުނިޓްތަކުގެ މަސައްކަތްތައް 2028 ވަނަ އަހަރުގެ މެދުތެރޭ ހިސާބު ނިމޭނެކަމަށް ބޭންކުން ވަނީ ބުނެފަ އެވެ.
ގައުމުގެ އިގްތިސާދުގައި ބޭންކުގެ ދައުރު ފާހަގަކުރައްވައި ސީއީއޯ ވިދާޅުވީ ދިވެހި ރާއްޖޭގެ އިގްތިސާދީ އޮނިގަނަޑަށް ބަލާއިރު ބީއެމްއެލްގެ ޖުމްލަ އެސެޓް މުޅި ދިވެހި ރާއްޖޭގެ ޖީޑީޕީގެ 38 ޕަސެންޓް ތަމްސީލުކުރާ ކަމަށެވެ. އެހެންކަމުން ގައުމީ ބޭންކުގެ ހައިސިއްޔަތުން ސަރުކާރާ އެކު ގާތުން މަސައްކަތްކުރުމަކީ ބޭންކަށް ސްޓްރެޓްޖެކްލީ ވަރަށް މުހިއްމުކަމެއްކަމަށް ސީއީއޯ ވިދާޅުވި އެވެ.
