ރޯދަމަހުގެ ފަހު ދިހައި ގައި ބީއެމްއެލްގެ ބުރާންޗުތައް ހުޅުވާނީ މި މާޗް މަހުގެ 11 އަދި 18 ގައި

މި އަހަރުގެ ރަމަޟާން މަހުގެ ފަހު ދިހަ އެއް ސަރުކާރު ބަންދު ދުވަސްތަކެއްގެ ގޮތުގައި ކަނޑައަޅާފައިވާތީ، އެ މުއްދަތުގެ ތެރޭގައި ބޭންކް އޮފް މޯލްޑިވްސް (ބީއެމްއެލް) އިން ޚިދުމަތް ދޭނެ އުސޫލުތައް އެ ބޭންކުން ހޯމަ ދުވަހު އިއުލާނުކޮށްފި އެވެ.

ބީއެމްއެލް އިން ހާމަކުރި ގޮތުގައި ރޯދަމަހުގެ ފަހު ދިހައެއްގެ ދުވަސްތަކުގައި ބޭންކުގެ ބްރާންޗުތައް ހުޅުވައިގެން ޚިދުމަތް ދިނުމަށް ހަމަޖެހިފައިވަނީ މި ހިނގާ މާރިޗް މަހުގެ 11 ވަނަ ދުވަހާއި 18 ވަނަ ދުވަހު އެކަންޏެވެ.

ބޭންކުން ބުނި ގޮތުގައި މި ދެ ދުވަހު ބޭންކުގެ ބްރާންޗުތައް ހުޅުވާފައި ހުންނާނީ ހެނދުނު 09:30 އިން ފެށިގެން މެންދުރު 12:30 ގެ ނިޔަލަށެވެ. މީގެ އިތުރުން، ރޯދަމަހުގެ ފަހު ދިހައެއްގެ ދުވަސްތަކުގައި ބޭންކުގެ ހުރިހާ ޚިދުމަތްތަކެއް އޮންލައިންކޮށް ލިބޭނެ އިންތިޒާމު ހަމަޖައްސާފައިވާ ކަމަށްވެސް ބީއެމްއެލް އިން ބުނެފައިވެ އެވެ.

ޝައްވާލް މަހުގެ ފުރަތަމަ ހަތް ދުވަހު ބޭންކު ހުޅުވާފައި ހުންނާނެ ވަގުތުތައް ވެސް ބީއެމްއެލް އިން ވަނީ މިހާރު އާންމުކޮށްފަ އެވެ. އެގޮތުން ޝައްވާލް މަހުގެ ފުރަތަމަ ހަތް ދުވަހު ބޭންކުގެ ބްރާންޗުތައް ހުޅުވައިގެން ޚިދުމަތް ދޭނީ ހެނދުނު 09:30 އިން މެންދުރު 12:30 އަށެވެ.

ބޭންކުގެ ބްރާންޗުތައް ބަންދުވި ނަމަވެސް، ރާއްޖޭގެ ހުރިހާ އަތޮޅެއްގައި ގާއިމްކޮށްފައިވާ ސެލްފް ސާވިސް ބޭންކިން ސެންޓަރުތައް މެދުވެރިކޮށް 24 ގަޑިއިރު ޚިދުމަތް ލިބޭނެ ކަމަށް ބީއެމްއެލް އިން ބުނެ އެވެ. އެގޮތުން ފައިސާ ޖަމާކުރުމާއި، ފައިސާ ނެގުމުގެ އިތުރުން ފައިސާ ފޮނުވުމުގެ ޚިދުމަތް އެއްވެސް މެދުކެނޑުމެއް ނެތި އާންމުންނަށް ލިބެމުންދާނެ އެވެ.

ބީއެމްއެލް އިން ވަނީ ބޭންކުގެ ބްރާންޗުތައް ބަންދު ދުވަސްތަކުގައި އިންޓަނެޓް ބޭންކިން އަދި މޮބައިލް އެޕް މެދުވެރިކޮށް ވީހާވެސް ގިނަ ޚިދުމަތްތައް ހޯދުމަށް ކަސްޓަމަރުންނަށް އިލްތިމާސްކޮށްފަ އެވެ.