ބީއެމްއެލްއިން މިދިޔަ އަހަރު 565 މިލިއަން ޑޮލަރު ވިއްކި، ކުރީ އަހަރަށްވުރެ 70 އިންސައްތަ އިތުރު
26 މާރިޗު 2026 | ބުރާސްފަތި 11:34ބީއެމްއެލްގެ ކާޑު ލިމިޓަށް ގެނައި ބަދަލާއެކު، މިދިޔަ އަހަރު އާންމުންނާއި ވިޔަފާރިތަކަށް ޖުމްލަ 565 މިލިއަން ޑޮލަރު ވިއްކާފައިވާ ކަމަށް އެ ބޭންކުން ހާމަކޮށްފި. މީގެ ތެރޭގައި ރާއްޖެއިން ބޭރުގައި ކުރި މުއާމަލާތްތަކަށް 524 މިލިއަން ޑޮލަރު ހޭދަކޮށްފައިވާއިރު، ވިޔަފާރިތަކުން ހަދާ ޓީޓީތަކަށް ޑޮލަރު ދޫކުރާ މިންވަރު ވެސް ވަނީ 50 އިންސައްތައަށް އިތުރުކޮށްދީފައި. މި ބަދަލުތަކުގެ ސަބަބުން ކަސްޓަމަރުންނަށް ބޭނުންވާ ބޭރު ފައިސާ ފޯރުކޮށްދިނުމުގައި ބޮޑެތި ކުރިއެރުންތަކެއް ލިބިފައިވާ ކަމަށް އެ ބޭންކުގެ ސީއީއޯ ވިދާޅުވި.
100 ޑޮލަރުގެ ނޫޓެއް | ގެޓީއިމޭޖަސް
ބޭންކް އޮފް މޯލްޑިވްސް އިން މިދިޔަ އަހަރާއި، އޭގެ ކުރީ އަހަރާ އަޅާބަލާއިރު 70 ޕަސެންޓް އިތުރަށް ޑޮލަރު ވިއްކާފައިވާ ކަމަށް ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުހައްމަދު ޝަރީފު ވިދާޅުވެއްޖެ އެވެ.
ބީއެމްއެލްގެ ސީއީއޯ ޝަރީފު ވިދާޅުވީ 2025 ވަނަ އަހަރު އަމިއްލަ ފަރުދުންނާއި ވިޔަފާރިތަކަށް 565 މިލިއަން ޑޮލަރު ވިއްކާފައިވާ ކަމަށެވެ.
ކާޑު ލިމިޓްތަކަށް ގެނައި ހެޔޮ ބަދަލާއެކު ކަސްޓަމަރުން ބޭނުންވާ، ރާއްޖެއިން ބޭރުގެ މުއާމަލާތްތަކަށް އެހީތެރިވުމުގައި ބޭންކުން އޮތް މިންވަރު ހާމަކޮށްދެނީ މިދިޔަ އަހަރުގެ ތަފާސްހިސާބުތަކުންނެވެ. މިދިޔަ އަހަރު ބީއެމްއެލް ކާޑުތަކުން އޭޓީއެމް، ޕީއޯއެސް އަދި އީކޮމާސް ހިމެނޭހެން ރާއްޖެއިން ބޭރުންކޮށްފައިވާ މުއާމަލާތްތަކުގެ ޖުމްލަ އަދަދު 524 މިލިއަން ޑޮލަރަށް އަރަ އެވެ. މިއީ އޭގެ ކުރީއަހަރާ އަޅާބަލާއިރު 200 މިލިއަން ޑޮލަރަށް ވުރެ އިތުރު އަދަދެކެވެ.
ކުރިން ވިޔަފާރިތަކަށް ބޭނުންވާ ޓީޓީއަށް ދޫކުރެވެނީ %5 ނަމަވެސް، މިދިޔަ އަހަރުގެ ތެރޭ ގައި ބެންކުން ވަނީ ވިޔަފާރިތަކުން ހަދާ ޓީޓީއަށް ޑޮލަރު ދޭ މިންވަރު %50 އާ ހަމަޔަށް އިތުރުކޮށްދީފަ އެވެ.
މި ހެޔޮ ބަދަލުތަކާއެކު ބޭންކަށް ވެސް ވިޔަފާރިތަކަށް ވެސް އަދި އާންމު ފަރުދުންނަށްވެސް އޭގެ މަންފާ ކުރަމުންދާކަމަށް ޝަރީފް ވިދާޅުވި އެވެ.
