ބީއެމްއެލްއިން ރެކޯޑް ޢަދަދެއްގައި 322 މިލިއަން ރުފިޔާ ޑިވިޑެންޑްގެ ގޮތުގައި ބަހަނީ.
ބޭންކް އޮފް މޯލްޑިވްސްގެ އަހަރީ އާންމު ޖަލްސާގައި ކޮންމެ ހިއްސާއަކަށް 60 ރުފިޔާ ބެހުމަށް ނިންމުމާއެކު، ބޯނަސް ހިއްސާގެ ގޮތުގައި ކޮންމެ ހިއްސާއަކަށް އިތުރު ދެ ހިއްސާ ދޫކުރުމަށް ވަނީ ފާސްކޮށްފައި. ބޭންކުގެ މާލީ ހާލަތު ވަރުގަދަވެ ހޯދި މި ކާމިޔާބީއަކީ ކަސްޓަމަރުންގެ އިތުބާރާއި ވިޔަފާރި ފުޅާވުމުގެ ނަތީޖާކަމަށް ސީއީއޯ މުޙައްމަދު ޝަރީފް ވިދާޅުވި. މީގެ އިތުރުން، ރާއްޖޭގެ އިގްތިސާދު ކުރިއެރުވުމަށާއި ޑިޖިޓަލް ޚިދުމަތްތައް ތަރައްގީކުރުމުގައި ބޭންކުން ދެމިއޮންނާނެކަމުގެ ޔަގީންކަން ވެސް ވަނީ ދީފައި.
ބޭންކް އޮފް މޯލްޑިވްސްގެ އަހަރީ އާންމު ޖަލްސާގެ ތެރެއިން. | ބީއެމްއެލް
ބޭންކް އޮފް މޯލްޑިވްސް (ބީއެމްއެލް) އިން ހިއްސާދާރުންނަށް ބަހާ ފައިދާގެ ގޮތުގައި ރެކޯޑް އަދަދެއް ކަމަށްވާ 322 މިލިއަން ރުފިޔާ ބެހުމަށް އެ ބޭންކުގެ ހިއްސާދާރުން ފާސްކޮށްފި އެވެ.
ބޭންކް އޮފް މޯލްޑިވްސްގެ އަހަރީ އާންމު ޖަލްސާގައި، 2025 ވަނަ އަހަރަށް ހިއްސާގެ ފައިދާގެ ގޮތުގައި ކޮންމެ ހިއްސާއަކަށް 60 ރުފިޔާ ބެހުމަށް ހިއްސާދާރުން ވަނީ ނިންމާފަ އެވެ. މިއާއެކު ޖުމްލަ 322,915,200 (ތިންސަތޭކަ ބާވީސް މިލިއަން ނުވަލައްކަ ފަނަރަހާސް ދުއިސައްތަ) ރުފިޔާ ހިއްސާދާރުންނަށް ބެހުމަށް ވަނީ ފާސްކޮށްފަ އެވެ. މީގެ އިތުރުން، ފައިނަލް ޑިވިޑެންޑްގެ ގޮތުގައި މިހާރު ހުރި ކޮންމެ ހިއްސާއަކަށް ބޯނަސް ދެ ހިއްސާ ދޫކުރުމަށް ވެސް މި ޖަލްސާގައި ވަނީ ނިންމާފަ އެވެ.
މިއީ މި ބޭންކުގެ ތާރީޚުގައި ވެސް ހިއްސާދާރުންނަށް ބަހަން ނިންމި އެންމެ ބޮޑު އަދަދެވެ. މި ނިންމުމަކީ ބޭންކުގެ މާލީ ހާލަތު ވަރުގަދަވުމާއި، ހިއްސާދާރުންނަށް އެންމެ ފުރިހަމަ ނަތީޖާ ހޯދައިދިނުމަށް ބޭންކުން ކުރަމުންދާ މަސައްކަތް ހާމަކޮށްދޭ ކަމެކެވެ.
މިކަމާ ގުޅޭގޮތުން ބޭންކުގެ ސީއީއޯ އަދި މެނޭޖިންގ ޑައިރެކްޓަރު މުޙައްމަދު ޝަރީފް ވިދާޅުވީ، މިއަހަރު ބޭންކުން ހޯދި މާލީ ކާމިޔާބީއާއެކު ހިއްސާދާރުންނަށް ރެކޯޑް އަދަދެއްގައި ފައިދާއެއް ހުށަހެޅުމުގެ ފުރުސަތު ލިބިގެންދިޔައީ ބޭންކުގެ ވިޔަފާރި ވަރުގަދަވުމާއި ކަސްޓަމަރުން ބޭންކަށް ކުރާ އިތުބާރުގެ ސަބަބުން ކަމަށެވެ. އަދި ގައުމީ ބޭންކުގެ ހައިސިއްޔަތުން، ރާއްޖޭގެ އިގްތިސާދު ކުރިއެރުވުމަށާއި، މީހުންނާއި ވިޔަފާރިތަކުގެ އިތުރުން މުޖުތަމައަށް ކުރާ އިންވެސްޓްމަންޓްތަކުގެ ޒަރީއާއިން ދެމެހެއްޓެނިވި ކުރިއެރުމެއް ހޯދައިދިނުމުގައި ބޭންކުން ދެމިއޮންނާނެ ކަމަށް ވެސް އޭނާ ވިދާޅުވި އެވެ.
ހިއްސާގެ ފައިދާ ބަހާނީ ބޭންކުގެ "ބުކް ކްލޯޝަރ" ނުވަތަ ހިއްސާދާރުންގެ ދަފްތަރު ބަންދުކުރާ ތާރީޚާ ހަމައަށް ހިއްސާދާރުންގެ ގޮތުގައި ރަޖިސްޓްރީވެފައިވާ ފަރާތްތަކަށެވެ.
ބޭންކުގެ މި ކާމިޔާބީއަކީ ހަރުދަނާ އުސޫލުތަކެއްގެ ދަށުން މަސައްކަތްކުރުމާއި، ކަސްޓަމަރުންނާއި ހިއްސާދާރުންނަށް އެންމެ ރަނގަޅު ޚިދުމަތާއި ނަތީޖާ ހޯދައިދިނުމަށް ދޭ ސަމާލުކަމުގެ ނަތީޖާއެވެ. މި ކުރިއެރުމާއެކު، ބޭންކް އޮފް މޯލްޑިވްސްގެ އަމާޒަކީ ޑިޖިޓަލް ޚިދުމަތްތައް އިތުރަށް ވަރުގަދަކޮށް، ރާއްޖޭގެ އެކި ކަންކޮޅުތަކުގައި ތިބި އާންމު ފަރުދުންނާއި ވިޔަފާރިތަކަށް ބޭނުންވާ ޚިދުމަތްތައް ފޯރުކޮށްދިނުމުގައި ދެމިއޮތުމެވެ.
