ޙާލަތު ގޯސްވި ފައިނަލް ކާމިޔާބުކޮށް، ސެނެގާލް އިން އެފްރިކަން ކަޕް ކާމިޔާބު ކޮށްފި

އެފްރިކަން ކަޕް އޮފް ނޭޝަންސްގެ ފައިނަލްގައި މޮރޮކޯ ބަލިކޮށް، ސެނެގާލް އިން މުބާރާތުގެ ޗެމްޕިއަންކަން ހޯދައިފި އެވެ.

އާދީއްތަ ދުވަހުގެ ރޭ ދަންވަރު ކުޅުނު ފައިނަލް މެޗު ސެނެގާލް އިން ކާމިޔާބު ކުރީ 1-0 އިންނެވެ. އެއީ މެޗުގެ ފުރިހަމަ ވަގުތު ހަމަވީއިރު އެއްވެސް ޓީމަކަށް ލަނޑެއް ޖެހިފައި ނެތުމުން، އިތުރު ވަގުތުގެ 15 މިނެޓުގެ ގޮތުގައި ކުޅުނު ހާފުގައި ލަނޑު ޖަހައިގެންނެވެ.

މެޗުގެ ފުރިހަމަ ވަގުތު ހަމަވާން ދަނިކޮށް މޮރޮކޯ އަށް ވަނީ ޕެނަލްޓީއެއް ދީފަ އެވެ. އެއާ އެކު، ސެނެގާލްގެ ސަޕޯޓަރުން ވަނީ ނުރުހުން ފާޅުކޮށްފަ އެވެ. ދަނޑުގެ ޙާލަތު ގޯސްވުމުގެ ސަބަބުން މެޗު ވަނީ ވަގުތު ކޮޅަކަށް މެދު ކަނޑާލައިފަ އެވެ. މޮރޮކޯ އަށް ދިން ޕެނަލްޓީއާ މެދު ހިތްހަމަ ނުޖެހި ސެނެގާލްގެ ކުޅުންތެރިން ދަނޑުން ވެސް ފޭބި އެވެ.

ނަމަވެސް، ފަހުން ސެނެގާލްގެ ކުޅުންތެރިން މެޗު ކުޅުމަށް އައިއިރު، މޮރޮކޯ އިން ޕެނަލްޓީ ޖެހި އެވެ. މޮރޮކޯގެ ބްރަހިމް ޑިއާޒް ޖެހި ޕެނަލްޓީ، ސެނެގާލްގެ ގޯލު ކީޕަރު އެޑުއާޑް މެންޑީ ވަނީ މަތަކޮށްފަ އެވެ. އިތުރު ވަގުތުގެ ގޮތުގައި ކުޅުނު ފުރަތަމަ ހާފުގައި ސެނެގާލް އިން ވަނީ ލަނޑު ޖަހައި މެޗުން މޮޅުވެފަ އެވެ. އެ ލަނޑު ސެނެގާލް އަށް ޖަހައިދިނީ ޕާޕޭ ގޭއި އެވެ.

މިއަހަރުގެ އެފްރިކަން ކަޕްގެ އެންމެ ގިނަ ލަނޑު ޖެހި ކުޅުންތެރިޔަކަށް މޮރޮކޯގެ ޑިއާޒް ހޮވުނުއިރު، މުބާރާތުގެ އެންމެ މޮޅު ކުޅުންތެރިޔަކީ ސެނެގާލްގެ ސަޑިއޯ މާނޭ އެވެ. އަދި މުބާރާތުގެ އެންމެ މޮޅު ގޯލް ކީޕަރަކީ މޮރޮކޯގެ ޔާސީން ބޯނޯ އެވެ. 

މިއީ ސެނެގާލް އިން އެ ޤައުމުގެ ތާރީޚުގައި އެފްރިކަން ކަޕް ކާމިޔާބު ކުރި ދެ ވަނަ ފަހަރެވެ. މީގެ ކުރިން 2021 ވަނަ އަހަރު ވެސް ސެނެގާލް އިން ވަނީ އެފްރިކަން ކަޕް ކާމިޔާބު ކޮށްފަ އެވެ.