އެފްކޮން: ސެނެގާާލް އާއި މޮރޮކޯ ސެމީ ފައިނަލްގެ ޖާގަ ހޯދައިފި

މިހާރު ކުރިއަށްދާ އެފްރިކަން ކަޕް އޮފް ނޭޝަންސްގެ ކުއަރޓަރ ފައިނަލްގެ މެޗުތައް ކާމިޔާބުކޮށް، ސެނެގާލް އާއި މޮރޮކޯ އިން މުބާރާތުގެ ސެމީ ފައިނަލްގެ ޖާގަ ހޯދައިފި އެވެ.

ހުކުރު ދުވަހުގެ ރޭ ކުޅުނު ކުއާޓާ ފައިނަލްގައި ސެނެގާލް ނިކުތީ މާލީއާ ދެކޮޅަށެވެ. އެ މެޗު ސެނެގާލް އިން ކާމިޔާބު ކުރީ 1-0 އިންނެވެ. މެޗުގައި ސެނެގާލް އިން ހަމައެކަނި ލަނޑު ޖެހީ 27 ވަނަ މިނެޓުގަ އެވެ. އެ ލަނޑު އެ ޓީމަށް ޖަހައިދިނީ އިލިމާން އެންޑިޔާއޭ އެވެ. ސެމީ ފައިނަލްގައި ސެނެގާލް ނިކުންނާނީ މިޞްރާއި، އައިވަރީ ކޯސްޓު ކުޅެގެން މޮޅުވާ ޓީމަަކާ ދެކޮޅަށެވެ. 

ހުކުރު ދުވަހުގެ ރޭ ދަންވަރު ކުޅުނު ދެ ވަނަ ކުއަރޓަރ ފައިނަލްގައި މޮރޮކޯ އިން ވަނީ ކެމަރޫންގެ މައްޗަށް ކުރި ހޯދައިފަ އެވެ. އެ މެޗު މޮރޮކޯ އިން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި މޮރޮކޯ އިން އެއް ލަނޑު ޖެހިއިރު، އަނެއް ލަނޑު ޖެހީ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގެ 26 ވަނަ މިނެޓުގައި މޮރޮކޯ އަށް ލީޑު ނަގައިދިނީ ބްރަހިމް ޑިއާޒް އެވެ. އެ ލަނޑު އޭނާ ޖެހީ އަޔޫބް އަލް ކާބިލް ތަނަވަސްކޮށްދިން ފުރުސަތެއްގަ އެވެ. މުބާރާތުގައި މޮޅު ކުޅުމެއް ދައްކަމުން އަންނަ ޑިއާޒް ވަނީ، މިހާތަނަށް ކުޅުނު ކޮންމެ މެޗެއްގައި ވެސް ލަނޑު ޖަހައިފަ އެވެ. އެގޮތުން ގުރޫޕް ސްޓޭޖުގައި ކުޅުނު ތިން މެޗާއި، ގަދަ 16 ވަނަ ބުރުގެ މެޗު އަދި ކުއާޓާ ފައިނަލް މެޗުގައި ވެސް އޭނާ ވަނީ ލަނޑު ޖަހައިފަ އެވެ.

މޮރޮކޯ އިން އެ ޓީމުގެ ދެ ވަނަ ލަނޑު ޖެހީ މެޗުގެ 74 ވަނަ މިނެޓުގަ އެވެ. އެ ލަނޑު މޮރޮކޯ އަށް ޖަހައިދިނީ އިސްމާއިލް ސައިބަރީ އެވެ. އެއީ ނަޔީފް އަޑުއާޑް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. 

މުބާރާތުގެ ސެމީ ފައިނަލްގައި މޮރޮކޯ ނިކުންނާނީ ކުއަރޓަރ ފައިނަލްގައި އަލްޖީރިއާ އާއި، ނައިޖީރިއާ ކުޅެގެން މޮޅުވާ ޓީމަކާ ދެކޮޅަށެވެ. 

އަލްޖީރިއާ އާއި ނައިޖީރިއާ ބައްދަލު ކުރާ ކުއަރޓަރ ފައިނަލް މެޗު އޮތީ ހޮނިހިރު ދުވަހުގެ ރޭ 21:00 ގައެވެ. މިޞްރާއި، އައިވަރީ ކޯސްޓު ބައްދަލު ކުރާ މެޗު އޮތީ ދަންވަރު 12 ޖަހާއިރު އެވެ.