ޖަޒުބާތުގައި ޖެހެވުނީ ކަމަށް ބުނެ، ސެނެގާލްގެ ކޯޗު ތިއޯ މައާފަށް އެދެފި

މިއަހަރުގެ އެފްރިކަން ކަޕް އޮފް ނޭޝަންސްގެ ފައިނަލްގައި ސެނެގާލްގެ ކުޅުންތެރިން ދަނޑު ފައިބަން އެންގުނީ ޖަޒުބާތުގައި ޖެހިގެން ކަމަށް ބުނެ، އެ ޓީމުގެ ކޯޗު ޕާޕާ ތިއޯ މައާފަށް އެދިފި އެވެ.

އާދީއްތަ ދުވަހުގެ ރޭ ކުޅުނު ފައިނަލްގައި ސެނެގާލް ވާދަކޮށްފައި ވަނީ މޮރޮކޯއާ އެވެ. މެޗުގެ ފަހު ވަގުތު މޮރޮކޯ އަށް ޕެނަލްޓީއެއް ދިނުމަށް ރެފްރީ ނިންމުމުން، މެޗު ވަރަށް ބޮޑަށް ހޫނު ވެގެން ދިޔަ އެވެ. އެއާ އެކު ސެނެގާލްގެ ކުޅުންތެރިން ދަނޑުން ފައިބައިގެން ދިޔައިރު، ކުޅުންތެރިން ދަނޑުން ފޭބުމަށް އެންގީ ތިއޯ އެވެ. ނަމަވެސް ސެނެގާލްގެ ކުޅުންތެރިން ފަހުން މެޗު ކުޅެން ދަނޑަށް އައިއިރު، މޮރޮކޯގެ މައްޗަށް ސެނެގާލް އިން ކުރި ހޯދީ 1-0 އިންނެވެ.

މެޗު ނުކުޅެ ދަނޑުން ފައިބައިގެން ދިޔަ މައްސަލައިގައި އެފްރިކާގެ ފުޓުބޯޅަ އިދާރާ އިން އަންނަނީ ތިއޯގެ މައްސަލަ ބަލަމުންނެވެ. އެ އިދާރާގެ ޑިސިޕްލިނަރީ ކޮމެޓީ އިން މައްސަލަ ބަލަމުން އަންނައިރު، ކުޅުންތެރިންނަށް ދަނޑުން ފައިބަން އެންގުމާއި، މެޗު ނުކުޅެ މަޑު ކުރަން ނިންމުމުން ތިއޯ އަށް ފިޔަވަޅު އަޅާނެ ކަމަށް ވަނީ ރިޕޯޓު ކޮށްފަ އެވެ.

އޭގެ ފަހުން ވާހަކަ ދައްކަމުން ތިއޯ ބުނީ އެ ހާދިސާގެ ވާހަކަ މާ ބޮޑަށް ދައްކަން ބޭނުން ނުވާ ކަމަށެވެ. ނަމަވެސް، ފުޓުބޯޅަ އާއިލާގެ ކިބައިން މައާފަށް އެދޭކަން ފާހަގަކޮށް ތިއޯ ބުނީ، ރެފްރީންނަށް ހެދުނު ގޯސް ވެސް ޤަބޫލު ކުރާ ކަމަށެވެ. ނަމަވެސް ސެނެގާލް އިން ދަނޑުން ފައިބައިގެން ގޮސްގެން ނުވާނެ ކަމަށާއި، މިހާރު އެކަމަށް މައާފަށް އެދޭ ކަމަށް އޭނާ ބުންޏެވެ.

މީގެ އިތުރުން ތިއޯ ބުނީ ބައެއް ފަހަރު ޖަޒުބާތުގައި ޖެހިގެން ކަންކަން ކުރެވޭ ކަމަށާއި، އޭނާ އަށް ވެސް ދިމާވީ އެހެން ކަމަށެވެ. ސެނެގާލް އިން ޖެހި ލަނޑެއް ރެފްރީ ޤަބޫލު ނުކުރިއިރު، ސުވާލު އުފެދޭ ކަމެއްގައި ޕެނަލްޓީ ދިނުމުން ޖަޒުބާތުގައި ޖެހުނީ ކަމަށް އޭނާ ބުންޏެވެ. ނަމަވެސް، ސެނެގާލްގެ ކުޅުންތެރިން އަލުން އަނބުރާ ދަނޑަށް އައިސް މެޗު ކުޅުނީ ވެސް އޭނާ އަންގައިގެން ކަމަށް ތިއޯ ބުނެފައިވެ އެވެ.

މޮރޮކޯ ބަލިކޮށް ސެނެގާލް އިން އެފްރިކަން ކަޕް ކާމިޔާބު ކޮށްފައިވާއިރު، މިއީ ސެނެގާލް އިން އެ މުބާާރާތް ކާމިޔާބު ކުރި ދެ ވަނަ ފަހަރެވެ. މީގެ ކުރިން 2021 ވަނަ އަހަރު ވެސް ސެނެގާލް އިން ވަނީ މުބާރާތް ކާމިޔާބު ކޮށްފަ އެވެ. ފައިނަލް މެޗުގައި ކުޅުންތެރިން ދަނޑުން ފައިބަން ތިއޯ އެންގުމުން، ގިނަ ބަޔަކު އަންނަނީ އެކަމާ ނުރުހުން ފާޅުކޮށް، އޭނާ އަށް ފިޔަވަޅު އެޅުމަށް ވެސް ގޮވާލަމުންނެވެ.