ކުވައިތު އިންޓަރނޭޝަނަލް އެއަރޕޯޓަށް ހަމަލާ އެއް އަރައި، ރޯވެއްޖެ
ކުވައިތުގެ އިންޓަނޭޝަނަލް އެއާޕޯޓުގެ ތެޔޮ ޓޭންކަކަށް ދިން މި ހަމަލާގައި އެއްވެސް މީހަކަށް އަނިޔާއެއް ލިބިފައި ނުވި ނަމަވެސް، މުދަލަށް ބޮޑެތި ގެއްލުންތަކެއް ވެފައިވާ ކަމަށް އެ ގައުމުގެ ސިވިލް އޭވިއޭޝަނުން ވަނީ ބުނެފައި.
ކުވައިތުގެ އޭވިއޭޝަން ފިއުލިންގް ކޮމްޕެނީ (ކަފްކޯ) އިން ހިންގަމުންދާ ކުވައިތު އިންޓަނޭޝަނަލް އެއާޕޯޓުގައި ހުރި ތެޔޮ ރައްކާކުރާ ޓޭންކަކަށް ޑްރޯނަކުން ހަމަލާދީފައިވާ ކަމަށް އެ ގައުމުގެ ޑައިރެކްޓަރޭޓް ޖެނެރަލް އޮފް ސިވިލް އޭވިއޭޝަނުން (ޕަބްލިކް އޮތޯރިޓީ ފޯ ސިވިލް އޭވިއޭޝަން) ހާމަކޮށްފި. | އެކްސް
ކުވައިތުގެ އިންޓަނޭޝަނަލް އެއާޕޯޓުގައި ހުރި ތެޔޮ ރައްކާކުރާ ޓޭންކަކަށް ޑްރޯން ހަމަލާތަކެއް އަމާޒުވުމުގެ ސަބަބުން އެ ތަނުގައި އަލިފާނުގެ ހާދިސާއެއް ހިނގައިފި ކަމަށް އެ ގައުމުގެ ސިވިލް އޭވިއޭޝަން އޮތޯރިޓީން ހާމަކޮށްފިއެވެ.
ކުވައިތުގެ ނިއުސް އެޖެންސީއަށް މައުލޫމާތު ދެއްވަމުން އެ އޮތޯރިޓީގެ ތަރުޖަމާނު އަބްދުﷲ އަލް ރާޖީ ވިދާޅުވީ، މިހާތަނަށް ލިބިފައިވާ މައުލޫމާތުތަކަށް ބަލާއިރު މި ހަމަލާގައި ގެއްލުން ލިބިފައިވަނީ ހަމައެކަނި މުދަލަށް ކަމަށާއި، އެއްވެސް މީހަކަށް އަނިޔާއެއް ލިބިފައި ނުވާ ކަމަށެވެ.
އަލް ރާޖީ އިތުރަށް ވިދާޅުވީ، މި ހާދިސާއާ ގުޅިގެން ކަމާބެހޭ އިދާރާތަކުން ވަގުތުން ކުއްލި ހާލަތުގެ ފިޔަވަޅުތައް އަޅަން ފަށާފައިވާ ކަމަށެވެ. އަދި ފަޔަރ ބްރިގޭޑާއި ކަމާގުޅޭ އެހެނިހެން އިދާރާތަކުން މިހާރު ދަނީ އަލިފާން ނިއްވުމުގެ މަސައްކަތް ކުރަމުންނެވެ.
