ރައްޔިތުންގެ އަސާސީ ހައްގުތައް ގުޅިފައި އޮތީ އިންތިޚާބުތަކާ، އެ ހައްގުތައް ނިގުޅައިގަތުމުގެ ފުރުސަތު ދީގެން ނުވާނެ: މެންބަރު މައުރޫފް
މެންބަރު މައުރޫފް ވިދާޅުވީ ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ނަގާ ރެފަރެންޑަމަކީ ރައީސް މުއިއްޒުގެ ރިޔާސީ ދައުރު ދިގުދަންމާލުމަށް ހިންގާ ހީލަތްތެރި ރޭވުމެއް ކަމަށް. ޚަރަދު ކުޑަކުރުމުގެ ނަމުގައި އިންތިޚާބުތައް މަދުކުރަން އުޅެނީ ރައްޔިތުންނަށް އޮޅުވާލައިގެން ބާރުތައް ނިގުޅައިގަތުމަށް ކަމަށް އޭނާ ވިދާޅުވި. އެހެންކަމުން، ރައްޔިތުންގެ ހައްގުތައް ހިމާޔަތްކުރުމަށްޓަކައި މި ރެފަރެންޑަމަށް "ނޫނެކޭ" ބުނުމަށް މެންބަރު މައުރޫފް ވަނީ ގޮވާލައްވާފައި.
އެމްޑީޕީން ކުރިއަށް ގެންދިޔަ ޕިކަޕް ޖަލްސާގައި ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވާހަކަ ދައްކަވަނީ. | ރާއްޖެއެމްވީ
ދިވެހި ރައްޔިތުންގެ އަސާސީ ހައްގުތައް ގުޅިފައި އޮތީ އިންތިޚާބުތަކާ ކަމަށާއި، އެ ހައްގުތައް ނިގުޅައިގަތުމުގެ ފުރުސަތު ދީގެން ނުވާނެ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ އެވެ.
ބުދަ ދުވަހުގެ ހަވީރު އެމްޑީޕީން ކުރިއަށް ގެންދިޔަ ޕިކަޕް ޖަލްސާގައި މެންބަރު މައުރޫފް ވިދާޅުވީ، ރައްޔިތުންގެ މަޖިލީހާއި ރިޔާސީ އިންތިޚާބު އެއްކޮށްލުމަށް ނަގާ ރެފަރެންޑަމްގައި ބޮޑުތަނުން ނޫނެކޭ ބުނަން ޖެހޭ ކަމަށާއި، އެއީ ރައީސް ޑރ.މުހައްމަދު މުއިއްޒުގެ ރިޔާސީ ދައުރު ދިގުދަންމާލުމަށް ހިންގާ ހީލަތްތެރި ރޭވުމެއް ކަމަށެވެ.
އިންތިޚާބުތައް އޮންނަން ޖެހޭކަން ފާހަގަކުރައްވައި މެންބަރު މައުރޫފް ވިދާޅުވީ، ތަރައްގީއާއި، ރައްޔިތުންގެ އަސާސީ ހައްގުތައް ގުޅިފައި އޮތީ އިންތިޚާބުތަކާ ކަމަށާއި، ދިވެހި ރައްޔިތުންގެ ދިރިއުޅުމުގެ ހާލަތު ގުޅިފައި އޮތީ އިންތިޚާބުތަކާ ކަމަށެވެ. އަދި ޑިމޮކްރެޓިކް ނިޒާމުގައި އިންތިޚާބުތައް އޮންނަން ޖެހޭ ކަމަށް އޭނާ ވިދާޅުވި އެވެ.
ކޮންމެ ކަމެއް، ކޮންމެ ރަނގަޅެއް އަންނަނީ އިންތިޚާބަކާ ގުޅިގެން. އެހެންވީމާ، އިންތިޚާބުތައް އެއްކޮށް، އިންތިޚާބުތައް މަދުކުރަން ޚަރަދު ކުޑަކުރާށޭ ކިޔާފައި މި އުޅެނީ އޮޅުވާލަން. ޚަރަދު ކުޑަކުރާށޭ ކިޔާފައި ކުރަންހުރި ކިތަންމެ ބައިވަރު އެހެން ކަމެއް އެބަހުރި. އެހެންނަމަވެސް، އަހަރެއްގެ މައްޗަށް ދިހައެއް ވަރަކަށް މިލިއަން ރުފިޔާ އިންތިޚާބެއް ބާއްވަން ޚަރަދުކުރަންޖެހޭތީ، އެއީ ބޮޑު ކަމަކަށްވެގެން އެ ވާހަކަ މި ދައްކަނީ ހަގީގަތުގައި އޮޅުވާލަން. މިއަދު ދިވެހި ރައްޔިތުން އެބަ ގަބޫލުކުރޭ ޚަރަދު ކުޑަކުރަން ނޫންކަން އިންތިޚާބުތައް ކީއްކުރަނީ. އެހެންވެ، މިހާރު އެ ވާހަކަ ދައްކަނީ މުޅިން އެހެން ގޮތަކަށް ދޭދޭ އާއިލާގެ ތެރޭގައި ހުންނަ މައްސަލަތައް ހައްލުވާނޭ އިމްތިޚާބުތައް ނުބޭއްވީމަ.ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު
މީގެ އިތުރުން މެންބަރު މައުރޫފް ވިދާޅުވީ، ރައީސް މުއިއްޒު ވެރިކަމަށް އިންތިޚާބު ކުރެވުމަކީ ހެދުނު ގޯހެއްކަން ގިނަ ރައްޔިތުން ގަބޫލުކުރާ ކަމަށާއި، އެކަމުގެ ކަންބޮޑުވުންފާޅު ކުރާ ކަމަށެވެ.
އެހެންކަމުން ދެ ވަނަ ފަހަރަށް އެފަދަ ގޯހެއް ނުހެދުމަށް އިލްތިމާސްކޮށް މެންބަރު މައުރޫފް ވަނީ ރައްޔިތުންގެ މަޖިލީހާއި ރިޔާސީ އިންތިޚާބު އެއްކޮށްލުމަށް ނަގާ ރެފަރެންޑަމް ނޫނެކޭ ބުނުމަށް ގޮވާލާފަ އެވެ. އަދި ރައްޔިތުން އަތުން އިންތިޚާބުތަކާއި ބާރުތައް ގެއްލޭ ގޮތަށް ކަންކަން ނުކުރުމަށާއި، އެ ފުރުސަތު ރައްޔިތުން ނުދިނުމަށް ވެސް އޭނާ ގޮވާލެއްވި އެވެ.
