ފިނި ހަނގުރާމައިގެ ދުވަސްވަރު ސައުދީން "ވައްހާބީ" ފިކުރު ފެތުރީ އެމެރިކާއާއި ހުޅަނގުގެ އެދުމަށް: ވަލީއަހުދު, މުޙައްމަދު ބިން ސަލްމާން

ސައުދީ އަރަބިއްޔާގެ ވަލީއަހުދު މުޙައްމަދު ބިން ސަލްމާން (އެމްބީއެސް) ވަނީ، ފިނި ހަނގުރާމަ (ކޯލްޑް ވޯ) ގެ ދުވަސްވަރު ސޯވިއެޓް ޔޫނިއަން (ރަޝިޔާ) ގެ ނުފޫޒު އިސްލާމީ ގައުމުތަކުގައި ކުޑަކުރުމަށްޓަކައި، އެމެރިކާ އިސްވެ އޮވެ ހުޅަނގުގެ ގައުމުތަކުން އެދިގެން، ދުނިޔޭގެ އެކި ކަންކޮޅުތަކުގައި "ވައްހާބީ" ފިކުރު ފެތުރުމަށް ސައުދީން މަސައްކަތްކޮށްފައިވާކަމަށް ވިދާޅުވެ، ބައިނަލްއަގުވާމީ މަސްރަހުގައި ބޮޑު ސަމާލުކަމެއް ލިބުނު ވާހަކަތަކެއް ދައްކަވާފައެވެ.

މިކަން ހާމަކުރައްވާފައި ވަނީ، އެމެރިކާއަށް ކުރެއްވި ރަސްމީ ދަތުރުފުޅެއްގެ ހަވާސާގައި، 22 މާރިޗު 2018 ގައި އެމެރިކާގެ މަޝްހޫރު ނޫސް 'ދަ ވޮޝިންގްޓަން ޕޯސްޓް' އަށް ދެއްވި 75 މިނެޓުގެ ދިގު އިންޓަވިއުއެއްގައެވެ.

އެ އިންޓަވިއުގައި އެމްބީއެސް ވިދާޅުވި ގޮތުގައި، 20 ވަނަ ގަރުނުގެ ފަހުކޮޅު، ސައުދީގެ އެކުވެރި ހުޅަނގުގެ ގައުމުތަކުން (ޚާއްޞަކޮށް އެމެރިކާއިން) ވަނީ، ރަޝިޔާއިން އިސްލާމީ ގައުމުތަކަށް ފޯރުވަމުންދިޔަ ނުފޫޒު ހުއްޓުވުމަށްޓަކައި ސައުދީގެ މުއްސަނދިކަން ބޭނުންކޮށްގެން ބޭރުގެ ގައުމުތަކުގައި މިސްކިތްތަކާއި މަދަރުސާތައް ބިނާކުރުމަށް އެދިފައެވެ. އަދި އޭރުގެ ސަރުކާރުތަކުން އެކަން ކުރީ ހުޅަނގުގެ ގައުމުތަކުން އެކަމަށް ބާރުއެޅުމުގެ ސަބަބުން ކަމަށް އެމަނިކުފާނު ފާހަގަކުރެއްވިއެވެ.

ނަމަވެސް، މި ފަންޑިންގ މަސައްކަތުގެ ކޮންޓްރޯލް ސައުދީގެ ކުރީގެ ސަރުކާރުތަކަށް ފަހުން ގެއްލިގެން ދިޔަ ކަމަށާއި، މިހާރު މަސައްކަތްކުރައްވަނީ އެކަންކަން އަނބުރާ ހަމަމަގަށް އެޅުވުމަށް ކަމަށް ވަލީއަހުދު ވިދާޅުވިއެވެ. އަދި މިހާރު އެފަދަ ކަންކަމަށް ފަންޑުކުރަނީ ސަރުކާރުން ނޫން ކަމަށާއި، ސައުދީގައި ގާއިމުވެފައިވާ ފައުންޑޭޝަންތަކުން ކަމަށްވެސް ވިދާޅުވިއެވެ.

މީގެ އިތުރުން، އޭގެ ދުވަސްކޮޅެއް ކުރިން އެމެރިކާގެ ސީބީއެސް ނެޓްވާރކްގެ "60 މިނިޓްސް" ޕްރޮގްރާމަށް ދެއްވި އިންޓަވިއުއެއްގައި އެމަނިކުފާނު ވިދާޅުވެފައި ވަނީ، 1979 ވަނަ އަހަރު އީރާނަށް އައި އިންގިލާބަށް ފަހު ސައުދީން ވެސް އެ މޮޑެލް ކޮޕީކުރަން އުޅުމުގެ ސަބަބުން ހަރުކަށި ފިކުރުތަކެއް އުފެދިގެން ދިޔަ ކަމަށެވެ. އެމަނިކުފާނުގެ އަމާޒަކީ ސައުދީ އަރަބިއްޔާއަކީ ކުރިންވެސް އޮތް ގޮތަށް، ހުރިހާ ދީންތަކަކަށާއި ސަގާފަތްތަކަށް ހުޅުވާލެވިފައިވާ "މެދުމިނުގެ އިސްލާމްދީނެއް" އޮންނަ ގައުމަކަށް ހެދުންކަމަށް ވިދާޅުވިއެވެ.

ސައުދީގެ ދީނީ އިލްމުވެރިންނަށް ވަރުގަދަ ބަހުގެ ހަމަލާތަކެއް

ސައުދީގައި ޒަމާނުއްސުރެ އޮތް ވައްހާބީ ދީނީ އިލްމުވެރިންގެ ބާރު ކަނޑުވާލެއްވުމަށް އެމްބީއެސް ގެންދަވަނީ ގިނަ މަސައްކަތްތަކެއް ކުރައްވަމުންނެވެ. މިގޮތުން، 25 އޭޕްރީލް 2021 ވަނަ ދުވަހުގެ ރޭ ސައުދީ ދައުލަތުގެ ޓީވީގައި ބްރޯޑްކާސްޓްކުރި އިންޓަވިއުއެއްގައި އެމަނިކުފާނު ވަނީ ސައުދީގައި އޮންނަ ހަރުކަށި ވަހާބީ ފިކުރަށް ވަރަށް ބޮޑަށް ފާޑުވިދާޅުވެފައެވެ.

އެމްބީއެސް ވިދާޅުވީ، އެއްވެސް މަޒުހަބެއް ނުވަތަ ފިކުރަކީ ބަދަލުނުކުރެވޭނެ އެއްޗެއް ނޫން ކަމަށާއި، ކީރިތި ޤުރުއާނާއި ސުންނަތް މާނަކުރުމުގައި ޒަމާނާއި ހާލަތަށް ބަލައި 'އިޖުތިހާދު' ކުރެވެން ޖެހޭނެ ކަމަށެވެ. އަދި އައްޝައިޚް މުޙައްމަދު ބިން ޢަބްދުލްވަހާބު މިއަދު ދުނިޔޭގައި ހުންނެވިނަމަ، އެކަލޭގެފާނުގެ ލިޔުންތަކަށް މީހުން ކަނުކޮށް ތަބާވާ ތަބާވުމާ އެންމެ ފުރަތަމަ ދެކޮޅު ހައްދަވާނީވެސް އެކަލޭގެފާނު ކަމަށް އެމަނިކުފާނު ވިދާޅުވިއެވެ.

އަދި ބައެއް ޙަދީޘްތައް ބޭނުންކޮށްގެން ދީނީ ކޯޓުތަކުން ހަރުކަށި ހުކުމްތައް ކުރަމުންދާ ދިއުމަށްވެސް ފާޑުވިދާޅުވެ، ޤުރުއާނުގައި ކަނޑައެޅިގެން ބަޔާންވެފައި ނެތް ކަމެއްގައި ދީނީ ގޮތުން އަދަބުތައް ދެވިގެން ނުވާނެކަމަށް އެމަނިކުފާނު ފާހަގަކުރެއްވިއެވެ.

މި ބަދަލުތަކާއެކު ސައުދީ އަރަބިއްޔާ އަންނަނީ "ވިޝަން 2030" ގެ ދަށުން އިގްތިސާދީ ގޮތުންނާއި އިޖުތިމާއީ ގޮތުން ބޮޑެތި ކުރިއެރުންތަކެއް ހޯދަމުންނެވެ. އަންހެނުންނަށް ކާރު ދުއްވުމުގެ ހުއްދަ ދިނުމާއި، މުނިފޫހިފިލުވުމުގެ ހަރަކާތްތައް ފުޅާކުރުން ފަދަ އެތައް ކަމެއް ވަނީ ތައާރަފްކޮށްފައެވެ. ހައްދުފަހަނަޅާފައިވާ ފިކުރުތަކަށް ޖާގަ ނުދެއްވާނެކަމުގެ އިންޒާރު ދެއްވަމުން، އެމްބީއެސް ވިދާޅުވީ ހަރުކަށި ފިކުރުތަކާއެކު ގައުމަށް ކުރިއެރުމެއް ނުހޯދޭނެ ކަމަށެވެ.