2025 ވަނަ އަހަރުގެ ސައުދީގެ ބަޖެޓަށް 1.11 ޓްރިލިއަން ރިޔާލްގެ އާމްދަނީއެއް ލިބިއްޖެ

ސައުދީ އަރަބިއްޔާގެ 2025 ވަނަ އަހަރުގެ ދައުލަތުގެ ބަޖެޓަށް އާމްދަނީގެ ގޮތުގައި 1.11 ޓްރިލިއަން ރިޔާލް، ނުވަތަ 296 ބިލިއަން އެމެރިކާ ޑޮލަރު ލިބިފައިވާ ކަމަށް އެ ޤައުމުގެ ފިނޭންސް މިނިސްޓްރީ އިން ހާމަ ކޮށްފި އެވެ.

ސައުދީގެ މިދިޔަ އަހަރުގެ ބަޖެޓުގެ ތަފްސީލީ ހިސާބުތައް ދައްކާ ގޮތުން، ދައުލަތުގެ ޖުމުލަ ޚަރަދު ހުރީ 1.38 ޓްރިލިއަން ރިޔާލް، ނުވަތަ 357.7 ބިލިއަން އެމެރިކާ ޑޮލަރުގަ އެވެ. މިއާ އެކު، 2025 ވަނަ އަހަރު ނިމުނުއިރު ސައުދީގެ ބަޖެޓުން ވަނީ ގާތް ގަނޑަކަށް 270 ބިލިއަން ރިޔާލް، ނުވަތަ 61.7 ބިލިއަން އެމެރިކާ ޑޮލަރުގެ ޑެފިސިޓެއް ރެކޯޑު ކުރެވިފައި އެވެ. 

ފިނޭންސް މިނިސްޓްރީގެ ހިސާބު ތަކަށް ބަލާއިރު، އާމްދަނީގެ އެންމެ ބޮޑު ބައެއް ހިއްސާ ކުރަނީ ތެލުގެ ސިނާއަތުންނެވެ. އެގޮތުން ތެލުގެ އާމްދަނީގެ ގޮތުގައި 606.54 ބިލިއަން ރިޔާލް، ނުވަތަ 161 ބިލިއަން އެމެރިކާ ޑޮލަރު ލިބިފައިވާއިރު، ތެޔޮ ނޫން އެހެނިހެން ދާއިރާ ތަކުން އާމްދަނީގެ ގޮތުގައި 505.28 ބިލިއަން ރިޔާލް، ނުވަތަ 134.6 ބިލިއަން އެމެރިކާ ޑޮލަރު ވަނީ ލިބިފަ އެވެ.

މިއީ އިޤްތިޞާދު ސިންދަފާތު ކުރުމަށް ސައުދީ ސަރުކާރުން ކުރަމުންދާ މަސައްކަތް ތަަކަށް ލިބުނު ކުރިއެރުމެއްގެ ގޮތުގައި ފިނޭންސް މިނިސްޓްރީ އިން ފާހަގަ ކޮށްފައިވެ އެވެ. އަދި 2025 ވަނަ އަހަރުގެ ފަހު ކުއާޓަރުގައި އެކަނި ވެސް 94.85 ބިލިއަން ރިޔާލް، ނުވަތަ 25.3 ބިލިއަން އެމެރިކާ ޑޮލަރުގެ ޑެފިސިޓެއް ކުރިމަތިވެފައިވެ އެވެ. 

މިދިޔަ ޑިސެމްބަރު މަހުގެ ތެރޭގައި ސައުދީގެ ކެބިނެޓުން ވަނީ، 2026 ވަނަ އަހަރަށް ލަފާ ކުރާ ދައުލަތުގެ ބަޖެޓު ވެސް ފާސްކޮށްފަ އެވެ. އެގޮތުން މި ބަޖެޓުގައި ޖުމުލަ އާމްދަނީގެ ގޮތުގައި 1.147 ޓްރިލިއަން ރިޔާލް، ނުވަތަ 305.67 ބިލިއަން އެމެރިކާ ޑޮލަރު ލިބޭނެ ކަމަށް ލަފާ ކޮށްފައިވާއިރު، ބަޖެޓު ޑެފިސިޓް ހުންނާނެ ކަމަށް ބެލެވެނީ 165.4 ބިލިއަން ރިޔާާލް، ނުވަތަ 44.1 ބިލިއަން އެމެރިކާ ޑޮލަރުގަ އެވެ. މީގެ އިތުރުން 2026 ވަަނަ އަހަރުގެ ބަޖެޓަކީ 2025 ވަނަ އަހަރާ އަޅާބަލާއިރު، ޚަރަދުގެ ގޮތުން ދޭއް އިންސައްތައިގެ އިތުރުވުމެއް ހިމެނޭ ބަޖެޓަކަށް ވާނެ ކަމަށް ލަފާ ކޮށްފައިވެ އެވެ. 

ސައުދީގެ ވަލީއަހުދު މުޙައްމަދު ބިން ސަލްމާން ވަނީ، ބަޖެޓުގައި ކަނޑައަޅާފައިވާ ތަރައްޤީގެ މަޝްރޫއު ތަކާއި، އިޖުތިމާއި ޕްރޮގްރާމްތައް ތަންފީޒު ކުރުމުގައި ދެމި ތިބުމަށް ވަޒީރުންނާއި ސަރުކާރުގެ އިސް އޮފިޝަލުންނަށް އިރުޝާދު ދެއްވައިފަ އެވެ. އަދި ސައުދީގެ "ވިޝަން 2030" ގެ ލަނޑު ދަނޑިތައް ހާސިލު ކުރުމަށް މަސައްކަތް ކުރުމާއި، ހުރިހާ ކަމެއްގައި ވެސް ސައުދީ ރައްޔިތުންނަށް އިސްކަންދީ އަދި އެ ފަރާތްތަކަށް ޚިދުމަތް ކުރުމަށް ވަލީއަހުދު ވަނީ ބާރުއަޅުއްވައިފަ އެވެ. 

ފިނޭންސް މިނިސްޓްރީ އިން ބުނާ ގޮތުގައި 2026 ވަނަ އަހަރުގެ ބަޖެޓާ އެކު ފެށިގެންދާނީ "ވިޝަން 2030" އިސްތިރާތީޖީގެ ތިން ވަނަ މަރުހަލާ އެވެ. މި މަރުހަލާގައި މައިގަނޑު ގޮތެއްގައި އަމާޒު ހިފާފައި ވަނީ މަޝްރޫއުތައް ނިންމުން އަވަސް ކުރުމާއި، ތަންފީޒީ މަރުޙަލާގެ މަސައްކަތްތައް މިހާރަށް ވުރެ ވަރުގަދަކޮށް ކުރިއަށް ގެންދިޔުމަށެވެ.