ހިތަދޫގައި އަންހެން ކުއްޖަކަށް ބިރު ދެއްކި މައްސަލައިގައި ފުލުހުންގެ އެއްބާރުލުން ނުލިބޭ ކަމަށް އާއިލާއިން ކުރި ތުހުމަތު ފުލުހުން ދޮގު ކޮށްފި

ލ. އަތޮޅު ހިތަދޫގައި 16 އަހަރުގެ އަންހެން ކުއްޖަކަށް ބިރު ދެއްކި މައްސަލައިގައި ފުލުހުންގެ ފަރާތުން އެއްބާރުލުން ނުލިބޭ ކަމަށް އާއިލާ އިން ތުހުމަތު ކޮށްފައިވާތީ އެކަން ފުލުހުން ދޮގު ކޮށްފި އެވެ. 

މިހާދިސާ ހިނގީ މިމަހުގެ 19 ވީ ބުރާސްފަތި ދުވަހުގެ ރޭގެ ވަގުތެއްގަ އެވެ. 

ރާއްޖެއެމްވީއަށް އެކުއްޖާގެ ބައްޕަ ބުނީ، ހާދިސާ ހިނގި ވަގުތު ގޭގައި ހުރީ ހަމައެކަނި އަންހެން ދަރިފުޅު އެކަނި ކަމަށާއި، އޭނާ އޮތީ ގޯތިތެރޭގައި ހުރި ޖޯލީގައި ކަމަށެވެ.

އަންހެން ކުއްޖާއާ ހަވާލާދީ ބައްޕަ ބުނީ، ގާތްގަނޑަކަށް 22 އަހަރު ވެފައިވާ ފިރިހެނަކު އެގެއަށް އެވަގުތު ފޯނެއްގައި ހުރެގެން ވަތް ކަމަށާއި، ވަދެ އެންހެން ކުއްޖާ ފެނުމުން ''މި ބާއްވަންވީ ކޮންތާކު ތޯ ސުވާލު ކުރި ކަމަށެވެ. ނަމަވެސް އަންހެން ކުއްޖާ އެ ވަގުތު ހުރީ ވާނުވާގައި ކަމަށާއި، ޖަވާބުގައި ކޮން އެއްޗެއް ކޮންތާކު ބާއްވާ ވާހަކަތޯ އެ އަންހެން ކުއްޖާ ސުވާލު ކުރި ކަމަށެވެ.

އެމީހާ އުޅުނު ގޮތުން އެ އަންހެން ކުއްޖާ ބިރުގަނެ އިތުރަށް ސުވާލު ކުރަން ފެށުމުން ކައިރިއަށް އައިސް އެ ކުއްޖާގެ ކަރުގައި ހިފި ކަމަށާއި، ވަޅިން ބިރު ދެއްކި ކަމަށެވެ. އަދި އެއްވެސް މީހެއްގެ ގާތުގައި އެ ވާހަކަ ބުނެފި ކަމަށްވާނަމަ އެ ބުނާ މީހަކު އަދި ބައްޕަ ވެސް މަރާލާނެ ކަމުގެ އިންޒާރު ދިން ކަމަށް ބުންޏެވެ. 

އެ އަންހެން ކުއްޖާގެ ބައްޕަ ބުނީ، މިހާދިސާ ހިނގިފަހުން އެ ކުއްޖާ ވަރަށް ބޮޑަށް ނަފްސާނީ ވެފައިވާ ކަމަށާއި، ބޭރަށް ދިއުމަށް ވެސް ދެކޮޅު ހަދާ ކަމަށެވެ.

މިމައްސަލައާ ގުޅިގެން އިންސާފު ހޯދުމަށް ލ. ހިތަދޫ ޕޮލިސް ސްޓޭޝަނަށް މައްސަލަ ހުށަހެޅި ނަމަވެސް މައްސަލަ ނުބެލޭނެ ކަމަށާއި، އެރަށުގައި ހަރަކާތްތެރިވާ ފުލުހުންގެ ފަރާތުން އެއްބާރުލުން ނުލިބުނު ކަމަށް އެ ކުއްޖާގެ ބައްޕަ ބުންޏެވެ.

މިކަމާ ގުޅިގެން ފުލުހުން ބުނީ މި މައްސަލަ 2026 މާރިޗު 19 ވަނަ ދުވަހުގެ ރޭ ފުލުހުންނަށް ހުށަހަޅާފައިވާ ކަމަށެވެ. 

މި މައްސަލަ ރިޕޯޓްކުރުމާއެކު ފުލުހުން ވަނީ މައްސަލައިގެ ތަހުގީގު ފަށާފައި ކަމަށާ މި މައްސަލައިގެ ތަހުގީގު ކުރިއަށް ގެންދަނީ ގުޅުންހުރި އެހެނިހެން އިދާރާތަކާ ވެސް ގުޅިގެން ކަމަށް ފުލުހުން ބުންޏެވެ. 

ފުލުހުން ބުނީ މިހާތަނަށް ކުރެވުނު މަސައްކަތްތަކަށް ބަލާއިރު، އަނިޔާލިބުނު ފަރާތުގެ ބަޔާން ނަގައި، މައްސަލައާ ގުޅުންހުރި އިތުރު ތިން ފަރާތަކާ ސުވާލުކޮށް މައުލޫމާތު ސާފުކޮށްފައި ވާ ކަމަށެވެ. މީގެ އިތުރުން ވެސް، ތަހުގީގުގެ ތެރެއިން ފުރިހަމަކުރަންޖެހޭ އެންމެހައި ކަންކަން ފުރިހަމަ ކުރުމުގެ މަސައްކަތް ކުރަމުން ދާ ކަމަށް ފުލުހުން ބުނެފައިވާއިރު ފުލުހުން ބުނީ މި މައްސަލައިގެ ތަހުގީގު ކުރިއަށްދާ ގޮތުގެ އެންމެ ފަހުގެ މައުލޫމާތު، މައްސަލަ ހުށަހެޅި ފަރާތާ ގަވާއިދުން ހިއްސާކުރަމުންދާ ކަމަށެވެ. 

އާއިލާގެ ތުހުމަތު ފުލުހުން ދޮގު ކޮށްފައިވާއިރު މިމައްސަލައާ ގުޅިގެން އިންސާފު ހޯދުމަށް ލ. ހިތަދޫ ޕޮލިސް ސްޓޭޝަނަށް މައްސަލަ ހުށަހެޅި ނަމަވެސް މައްސަލަ ނުބެލޭނެ ކަމަށާއި، އެރަށުގައި ހަރަކާތްތެރިވާ ފުލުހުންގެ ފަރާތުން އެއްބާރުލުން ނުލިބުނު ކަމަށް އެ ކުއްޖާގެ ބައްޕަ ބުންޏެވެ. އޭގެފަހުން ގަން ޕޮލިސް ސްޓޭޝަނަށް ގުޅުމުން ވެސް މިމައްސަލާގައި ކުރެވޭނެ ކަމެއް ނެތް ކަމަށް ބުނެފައިވާ ކަމަށް ވެސް އެ ކުއްޖާގެ ބައްޕަ ކިޔަދިނެވެ. 

ނަމަވެސް އިންސާފު ބޭނުންވާތީ މާލޭގެ ފުލުހުންގެ އިދާރާއަށް ގުޅައި ޝަކުވާ ކުރުމުން ގަން ޕޮލިސް ސްޓޭޝަނަށް ގުޅައި ކުރިއަށް ގެންދިއުމަށް އަންގާފައިވާ ކަމަށް ކުއްޖާގެ ބައްޕަ ބުންޏެވެ. އޭގެފަހުން ގަން ޕޮލިސް ސްޓޭޝަންގައި މައްސަލަ ރަޖިސްޓްރީކުރި ކަމަށް ވެސް ކުއްޖާގެ ބައްޕަ ބުންޏެވެ. 

އަންހެން ކުއްޖާގެ ރައްކާތެރިކަން ކަށަވަރުކުރަން ބޭނުންވާތީ ފިތުރު އީދު ދުވަހު ވެސް އުޅުނީ ކަމާގުޅޭ މުއައްސަސާތަކަށް ގުޅައި، މިކަމުގައި ކަން ފާހަގަކޮށް އެކުއްޖާގެ ބައްޕަ ބުނީ ހުކުރު ދުވަހުގެ ހަވީރުގެ ވަގުތު ސޯޝަލް މިނިސްޓްރީގެ ދެ މުވައްޒަފުން ގެއަށް އައިސް އެކުއްޖާ ކައުންސިލް އިދާރާއަށް ގެންދިޔަ ކަމަށެވެ. އަދި އެ މުވައްޒަފުންގެ ހާޒިރުގައި ފުލުހުން ކުއްޖާއާ ސުވާލު ކުރި ކަމަށް އެ ކުއްޖާ ބުނެފައިވާ ކަމަށް ބައްޕަ ބުންޏެވެ. 

އެކުއްޖާގެ ބައްޕަ ބުނި ގޮތުގައި، ބިރު ދެއްކި ފިރިހެން މީހާއަކީ ކުށުގެ ރިކޯޑު އޮންނަ މީހެކެވެ. ރަށު ތެރޭގައި ވެސް މަސްތުވާތަކެތި ވިއްކައި ގެތަކުން ބޮޑެތި ވައްކަންތައް ކުރި ނަމަވެސް އޭނާ ހައްޔަރުކޮށް އެއްވެސް ފިޔަވަޅެއް ފުލުހުންނަށް ނޭޅޭ ކަމަށް އޭނާ ތުހުމަތު ކުރި އެވެ.