އެމެރިކާ އާއި މެކްސިކޯ މެޗުގައި ރޮނާލްޑޯ ނުކުޅޭނެ

ބައިނަލްއަޤުވާމީ ރަޙުމަތްތެރި ކަމުގައި އެމެރިކާ އާއި މެކްސިކޯއާ ދެކޮޅަށް ޕޯޗުގަލް އިން ކުޅޭ މެޗުގައި، އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ ނުކުޅޭނެ ކަމަށް ހާމަ ކޮށްފި އެވެ.

ބައިނަލްއަޤުވާމީ ރަޙުމަތްތެރި ކަމުގައި ޕޯޗުގަލް އިން މެކްސިކޯއާ ދެކޮޅަށް ނިކުންނާނީ މާޗު މަހުގެ 29 ވަނަ ދުވަހު އެވެ. އޭގެ ފަހުން ދެ ވަނަ މެޗުގައި އެމެރިކާއާ ދެކޮޅަށް ކުޅޭނީ އޭޕްރީލް މަހުގެ އެއް ވަނަ ދުވަހު އެވެ. މި ދެ މެޗަށް ޕޯޗުގަލް އިން އެކުލަވާލި ސްކޮޑުގައި އެ ޓީމުގެ ކެޕްޓަން ރޮނާލްޑޯ ހިމަނާފައި ނުވެ އެވެ.

ޕޯޗުގަލްގެ ކޯޗު ރޮބާޓޯ މާޓިނޭޒް އެކުލަވާލި ސްކޮޑުގައި ރޮނާލްޑޯ ހިމަނާފައި ނުވަނީ، އަނިޔާގެ ސަބަބުންނެވެ. އެގޮތުން ރޮނާލްޑޯ މިވަގުތު ހުރީ އަނިޔާއެއްގައި ކަމަށްވާއިރު، އޭނާ ކުޅެމުން އަންނަ އަލް ނަޞްރާއި، ޕޯޗުގަލްގެ މައިގަނޑު އަމާޒަކީ ރޮނާލްޑޯ އަނިޔާ އިން ރަނގަޅުވުން ކަމަށް ބުނެފައިވެ އެވެ. ރޮނާލްޑޯ އަށް އަނިޔާވެފައި ވަނީ ފެބްރުވަރީ މަހުގެ 26 ވަނަ ދުވަހު އަލް ނަޞްރުން ކުޅުނު މެޗުގަ އެވެ.

އެންމެ ފަހުން ޕޯޗުގަލް ޤައުމީ ޓީމާ އެކު ރޮނާލްޑޯ ކުޅެފައި ވަނީ 2025 ވަނަ އަހަރުގެ ނޮވެމްބަރު މަހު ފީފާ ވޯލްޑް ކަޕް ކޮލިފިކޭޝަންގައި އަޔަލެންޑާ ދެކޮޅަށް ކުޅުނު މެޗުގަ އެވެ. އެ މެޗުގައި ރޮނާލްޑޯ ލަނޑު ވެސް ޖަހާފައިވާއިރު، އޭގެ ފަހުން އާމޭނިއާއާ ދެކޮޅަށް ކުޅުނު މެޗުގައި ރޮނާލްޑޯ ނުކުޅެ އެވެ.

ރޮނާލްޑޯ އަންނަނީ އަލް ނަޞްރުގެ އިތުރުން، ޕޯޗުގަލްގެ ޤައުމީ ޓީމުގައި ވެސް މޮޅު ކުޅުމެއް ދައްކަމުންނެވެ. ރޮނާލްޑޯ އަކީ ޕޯޗުގަލްގައި ހުރި އެންމެ މުހިންމު ކުޅުންތެރިޔާ އަށްވާއިރު، މިއަހަރުގެ ވޯލްޑް ކަޕްގައި ވެސް ރޮނާލްޑޯ ކުޅޭނެ އެވެ. އެ މުބާރާތުގައި ވެސް ޕޯޗުގަލްގެ އެންމެ މުހިންމު ކުޅުންތެރިޔަކަށް ވާނީ ރޮނާލްޑޯ އެވެ.