ފުޓުބޯޅަ ކުޅުމުގައި އިތުރު އަހަރު ތަކެއް ހޭދަ ކުރަން ރޮނާލްޑޯ ބޭނުންވޭ

ފުޓުބޯޅަ ކުޅުމުގައި އިތުރު އަހަރު ތަކެއް ހޭދަ ކުރަން ބޭނުންވާ ކަމަށް، އަލް ނަޞްރަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ބުނެފި އެވެ.

އުމުރުން 40 އަހަރުގެ ރޮނާލްޑޯ މިހެން ބުނެފައި ވަނީ އޭނާގެ މުސްތަޤުބަލާ ގުޅޭ ގޮތުން ވާހަކަ ދައްކަމުންނެވެ. ރޮނާލްޑޯ ބުނީ، ފުޓުބޯޅަ ކުޅުމުގައި އިތުރު އަހަރު ތަކެއް ހޭދަ ކުރަން އޭނާ ބޭނުންވާ ކަމަށެވެ. އެހެން ނަމަވެސް، އެއީ މާ ގިނަ އަހަރު ތަކެއް ނޫން ކަމަށް ރޮނާލްޑޯ ވަނީ ބުނެފަ އެވެ.

ރޮނާލްޑޯ ބުނީ މިހާރު ވެސް އޭނާ އަށް ރަނގަޅު ފެންވަރުގައި ކުޅެވެމުން އަންނަ ކަމަށާއި، ރަނގަޅު ކަންތައްތަކެއް ކުރެވޭ ކަމަށެވެ. ޚާއްސަކޮށް ޤައުމީ ޓީމާއި، ކުލަބަށް ވެސް އެހީތެރިވުމުގައި މިހާރު ވެސް ގިނަ ކަންތައްތަކެއް ކުރެވޭ ކަމަށް ރޮނާާލްޑޯ ވަނީ ބުނެފަ އެވެ. އެހެންކަމަށް ވަނީ ނަމަ، ފުޓުބޯޅަ ކެރިއަރު ކުރިއަށް ނުގެންދަންވީ ސަބަބެއް ނެތް ކަމަށް ވެސް ރޮނާލްޑޯ ބުންޏެވެ.

އެކަން ފާހަގަކޮށް ރޮނާލްޑޯ ބުނީ، އޭނާ ފުޓުބޯޅަ އިން ރިޓަޔާ ކުރާއިރު، ހިތްހަމަ ޖެހިގެން ހުންނާނެ ކަމަށެވެ. ހަމަ އެހެންމެ، މިހާރު އޭނާ އަށް ލިބިފައި އޮތް ކޮންމެ ވަގުތެއްގެ ވެސް ރަނގަޅު ގޮތުގައި ހޭދަ ކުރާނެ ކަމަށާއި، ކެރިއަރުގައި ބާކީ އެހާ ގިނަ އަހަރު ތަކެއް ނެތްކަން އިނގޭ ކަމަށް ރޮނާލްޑޯ ބުންޏެވެ.

ސްޕޯޓިން އިން ސީނިއާ ކެރިއަރު ފެށި ރޮނާލްޑޯ އަކީ ފުޓުބޯޅައިގައި އުފެދުނު އެންމެ މޮޅު ކުޅުންތެރިޔާ ކަމަށް އެތައް ބަޔަކު ޤަބޫލު ކުރާ ކުޅުންތެރިޔެކެވެ. ރޮނާލްޑޯ ވަނީ މިހާތަނަށް އޭނާގެ ކެރިއަރުގައި ގިނަ ކާމިޔާބީތަކެއް ހޯދައިފަ އެވެ. ސްޕޯޓިންގެ އިތުރުން ރޮނާލްޑޯ ވަނީ، މެންޗެސްޓަރ ޔުނައިޓެޑު، ރެއާލް މެޑްރިޑު، ޔުވެންޓަސް އަށް ވެސް ކުޅެފަ އެވެ. މިވަގުތު އޭނާ ކުޅެމުން އަންނަނީ ސައުދީގެ އަލް ނަޞްރު އަށެވެ.

ޤައުމީ ޓީމުގައި ވެސް ރޮނާލްޑޯ ވަނީ ކާމިޔާބީތަކެއް ހޯދައިފަ އެވެ. ރޮނާލްޑޯގެ އަމާޒަކީ ޕޯޗުގަލް އާއެކު އަންނަ އަހަރު އޮންނަ ފީފާ ވޯލްޑް ކަޕަށް ކޮލިފައިވެ، ޤައުމީ ޓީމަށް ރަނގަޅު ކާމިޔާބެއް ހޯދައިދިނުމެވެ. ރޮނާލްޑޯ ވަނީ ދުނިޔޭގެ މޮޅު ކުޅްނެތެރިޔާ އަށް ދެމުން އަންނަ ބެލެންޑިއޯ އެވޯޑު ވެސް ކާމިޔާބު ކޮށްފަ އެވެ.