ފަހު ވަގުތު ހަންގޭރީއާ އެއްވަރުވެ ޕޯޗުގަލް އަށް އިތުރު އިންތިޒާރެއް

މިހާރު ކުރިއަށްދާ ފީފާ ވާރލްޑް ކަޕް ކޮލިފިކޭޝަންގައި ހަންގޭރީއާ ދެކޮޅަށް ކުޅުނު މެޗުން ފަހު ވަގުތު ޕޯޗުގަލް އެއްވަރުވެއްޖެ އެވެ.

އަންގާރަ ދުވަހުގެ ރޭ ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި ހަންގޭރީ އިން ލަނޑު ޖަހައި ކުރި ހޯދާފައި ވަނިކޮށް، ޕޯޗުގަލް އިން ވަނީ ފަހަތުން އަރައި ދެ ލަނޑު ޖަހައިގެން ލީޑު ނަގައިފަ އެވެ. ނަމަވެސް، މެޗުގެ ފަހު ވަގުތު ލަނޑު ޖަހައިގެން ހަންގޭރީ ވަނީ ޕޯޗުގަލްއާ އެއްވަރު ކޮށްފަ އެވެ.

މެޗު ފަށައިގެން އަށް ވަނަ މިނެޓުގައި ހަންގޭރީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އަޓިލާ ޒަލާއީ އެވެ. އެއީ ޑޮމިނިކް ސޮބޮސްލާއީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

ނަމަވެސް މެޗުގެ 22 ވަނަ މިނެޓުގައި ޕޯޗުގަލް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު ޕޯޗުގަލް އަށް ޖަހައިދިނީ އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ އެވެ. އެ ލަނޑު ޖަހަން ރޮނާލްޑޯ އަށް ފުރުސަތު ތަަނަވަސްކޮށްދިނީ ނެލްސަން ސަމޭޑޯ އެވެ.

އޭގެ ފަހުން މެޗުގެ ފުރަތަމަ ހާފުގެ އިތުރު ވަގުތުގެ ތެރޭގައި ރޮނާލްޑޯ ވަނީ ދެ ވަނަ ލަނޑެއް ޖަހައި ޕޯޗުގަލް އަށް ލީޑު ނަގައިދީފަ އެވެ. އެއީ ނޫނޯ މެންޑޭސް ތަނަވަސްކޮށްދިން ފުރުސަތެއްގައި ރޮނާލްޑޯ ޖެހި ލަނޑެކެވެ.

މެޗުން ޕޯޗުގަލް މޮޅުވާން ދަނިކޮށް، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލަނޑު ޖަހައިގެން ހަންގޭރީ ވަނީ އެއްވަރު ކޮށްފަ އެވެ. ހަންގޭރީގެ ދެ ވަނަ ލަނޑު ޖަހައި ޕޯޗުގަލް ކައިރިން ޕޮއިންޓެއް ހޯދައިދިނީ ސޮބޮސްލާއީ އެވެ.

މެޗުން މޮޅުވެ އަންނަ އަހަރު އޮންނަ ވާރލްޑް ކަޕަށް ކޮލިފައިވުމުގެ ފުރުސަތު ޕޯޗުގަލް އަށް އޮތް ނަމަވެސް، އެއްވަރު ވުމުން އެ ޓީމަށް ޖެހޭނީ އިތުރު އިންތިޒާރެއް ކުރާށެވެ. މެޗު އެއްވަރުވެ ޕޯޗުގަލް އެއް ވަަނައިގައި އޮތީ މިހާތަނަށް އެ ޓީމު ކުޅެފައިވާ ހަތަރު މެޗުން 10 ޕޮއިންޓާ އެކު އެވެ.

ދެ ވަނައިގައި އޮތް ހަންގޭރީ ވެސް ހަތަރު މެޗު ކުޅެފައިވާއިރު، އެ ޓީމަށް ލިބެނީ ފަސް ޕޮއިންޓެވެ. ކޮލިފިކޭޝަންގައި ޕޯޗުގަލް އަށް ދެން އޮންނާނީ އަޔަލެންޑާ ދެކޮޅަަށް ކުޅޭ މެޗެވެ.