1000 ގޯލު ހަމަ ކުރުމުގެ ވާހަކައިގައި ރޮނާލްޑޯ "އިންސާﷲ"އޭ ބުނުމުން އެތައް ބައެއްގެ ސަމާލުކަން ލިބިއްޖެ

ފުޓުބޯޅަ ކެރިއަރުގައި 1000 ގޯލު ހަމަ ކުރުމާ ގުޅޭ ގޮތުން ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ދެއްކި ވާހަކަ އަށް ގިނަ ބައެއްގެ ސަމާލުކަން ލިބިއްޖެ އެވެ.

އާދީއްތަ ދުވަހުގެ ރޭ އޮތް ގްލޯބް ސޮކާ އެވޯޑު ހަފްލާގައި ބައިވެރިވެ، ރޮނާލްޑޯ ވަނީ އެ ވާހަކަ ދައްކައިފަ އެވެ. ގްލޯބް ސޮކާ އިން ހޮވި މިޑްލް އީސްޓުގެ އެންމެ މޮޅު ކުޅުންތެރިޔަކަށް ހޮވުނީ ރޮނާލްޑޯ އެވެ. ރޮނާލްޑޯ އަންނަނީ ސައުދީ ޕްރޯ ލީގުގައި އަލް ނަޞްރުގައި ކުޅެމުންނެވެ.

އުމުރުން މިހާރު 40 އަހަރުވެފައިވާ ރޮނާލްޑޯ ވަނީ އޭނާގެ ކެރިއަރުގައި މިހާތަނަށް 956 ލަނޑު ޖަހައިފަ އެވެ. އޭނާ އަކީ ފުޓުބޯޅައިގައި މިހާތަނަށް އެންމެ ގިނަ ލަނޑު ޖަހާފައިވާ ކުޅުންތެރިޔާ އެވެ. ރޮނާލްޑޯގެ އެންމެ ބޮޑު އަމާޒަކީ ކެރިއަރުގައި 1000 ލަނޑު ހަމަ ކުރުން ކަމަށްވާއިރު، އެކަން ކުރެވޭނެ ކަމަށް އޭނާ ވަނީ ބުނެފަ އެވެ. 

އެވޯޑު ހަފްލާގައި ވާހަކަ ދައްކަމުން ރޮނާލްޑޯ ބުނީ، އޭނާ ބޭނުން ވަނީ ފުޓުބޯޅަ ކުޅުން އަދި ވެސް ކުރިއަށް ގެންދަން ކަމަށެވެ. އަދި މިވަގުތު އޭނާގެ އެންމެ ބޮޑު ލަނޑުދަނޑި އަކީ ގިނަ ތަށި ތަކެއް ކާމިޔާބު ކުރުމާ އެކު، ކެރިއަރުގައި 1000 ލަނޑު ހަމަ ކުރުން ކަމަށް ރޮނާލްޑޯ ބުންޏެވެ. އެކަން ފާހަގަކޮށް ރޮނާލްޑޯ ބުނީ އިތުރު އަނިޔާއެއް ނުވާ ނަމަ، އޭނާ އެ އަދަދާ އަރާ ހަމަ ކުރާނެކަން ޔަގީން ކަމަށެވެ. 

އެއަށް ފަހު ރޮނާލްޑޯ ބުނީ، "އިންޝާﷲ" މިހެންނެވެ. އޭގެ މާނަ އަކީ ﷲ އިރާދަކުރެއްވިއްޔާ އެވެ. އެއާ އެކު ގިނަ ބައެއްގެ ސަމާލުކަން ވަނީ ރޮނާލްޑޯ އަށް ލިބިގެން ގޮސްފަ އެވެ. ރޮނާލްޑޯ އަކީ ސައުދީ އަރަބިއްޔާގައި ކުޅެމުން އަންނަ އަދި އެ ޤައުމުގައި ދިރިއުޅެމުން އަންނަ ކުޅުންތެރިޔަކަށް ވާއިރު، ރޮނާލްޑޯ މިފަދަ ލަފުޒެއް ބޭނުން ކުރުމަކީ ގިނަ ބައެއްގެ ސަމާލުކަން ލިބިގެން ދިޔަ ކަމެކެވެ.

މީގެ ކުރިން ވެސް ރޮނާލްޑޯ ވަނީ އެފަދަ ކަންކަމުން އާންމުންގެ ސަމާލު ކަމަށް އައިސްފަ އެވެ.

މީގެ އިތުރުން އެ ހަފްލާގައި ވާހަކަ ދައްކަމުން ރޮނާލްޑޯ ބުނެފައި ވަނީ، އޭނާ ހުރީ އަދި ވެސް ފުޓުބޯޅަ ކުޅުން ކުރިއަށް ގެންދެވޭ ޙާލަތެއްގައި ކަމަށެވެ. ޚާއްސަކޮށް ފުޓުބޯޅަ އަށް އޮންނަ ލޯތްބާއި، ފުޓުބޯޅަ އަށް އޮންނަ ޝައުޤުވެރި ކަމަށް ކުޑަ ވެސް ބަދަލެއް ނާންނަ ކަމަށް ރޮނާލްޑޯ ބުންޏެވެ. އެކަން ފާހަގަކޮށް ރޮނާލްޑޯ ބުނީ، ސަައުދީގައި ކުޅެން ޖެހުނު ކަމަށް ވިޔަސް، ނުވަތަ ޔޫރަޕުގައި ކުޅެން ޖެހުނު ކަމަށް ވިޔަސް އޭނާ ބޭނުން ވަނީ ތަށިތައް ހޯދައި، ކާމިޔާބަށް ވާސިލުވާން ކަމަށް ރޮނާލްޑޯ ބުންޏެވެ. 

ރޮނާލްޑޯ އަކީ ފުޓުބޯޅައިގައި މިހާތަނަށް އުފެދުނު އެންމެ މޮޅު ކުޅުންތެރިޔާ ކަމަށް ގިނަ ބަޔަކު ޤަބޫލު ކުރާ ކުޅުންތެރިޔެކެވެ. ސްޕޯޓިން އިން ކެރިއަރު ފެށި ރޮނާލްޑޯ ވަނީ، މެންޗެސްޓަރ ޔުނައިޓެޑާއި، ރެއާލް މެޑްރިޑް އަދި ޔުވެންޓަސް އަށް ވެސް ކުޅެފަ އެވެ. މިހާރުގެ ކުލަބު އަލް ނަޞްރަށް ބަދަލުވުމުގެ ކުރިން ރޮނާލްޑޯ ވަނީ، ދެ ވަނަ ފަހަރަށް ޔުނައިޓެޑުގައި ވެސް ކުޅެފަ އެވެ. 

ކޮންމެ ކުލަބަކާ އެކު ރޮނާލްޑޯ ގިނަ ކާމިޔާބީ ތަކެއް ހޯދާފައިވާއިރު، އޭނާ ވަނީ ފްރާންސް ފުޓުބޯޅަ އިން ދުނިޔޭގެ އެންމެ މޮޅު ފުުޓުބޯޅަ ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު ފަސް ފަހަރު ކާމިޔާބު ކޮށްފަ އެވެ. ރޮނާލްޑޯ އަކީ ދެ ވަނަ އަށް، އެންމެ ގިނަ ބެލެންޑިއޯ ކާމިޔާބު ކޮށްފައިވާ ކުޅުންތެރިޔާ އެވެ. މީގެ އިތުރުން ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ހޮވާ ފީފާ ބެސްޓް އެވޯޑުގެ އިތުރުން، އެތައް ގިނަ އެވޯޑު ތަކެއް ރޮނާލްޑޯ ވަނީ ހޯދައިފަ އެވެ.