ރޮނާލްޑޯ ނެތި ކުޅުނު މެޗުގައި، އަލް ނަޞްރުން އަލް އިއްތިހާދު ބަލިކޮށްފި

ސައުދީ ޕްރޯ ލީގުގައި އަލް އިއްތިހާދާ ދެކޮޅަށް ކުޅުނު މެޗުން އަލް ނަޞްރު މޮޅުވެއްޖެ އެވެ. 

އަލް އިއްތިހާދާ ދެކޮޅަށް ކުޅުނު މެޗު އަލް ނަޞްރުން ކާމިޔާބު ކުރީ 2-0 އިންނެވެ. މެޗުގައި އަލް ނަޞްރުން އެ ޓީމުގެ ދެ ލަނޑު ވެސް ޖަހާފައި ވަނީ މެޗުގެ އެންމެ ފަހު ވަގުތުގެ ތެރޭގަ އެވެ.

މި މެޗުގައި އަލް ނަޞްރަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ކުޅެފައި ނުވެ އެވެ. އެއާ އެކު، އެންމެ ފަހުން އަލް ނަޞްރު ކުޅުނު ދެ މެޗުގައި ވެސް ރޮނާލްޑޯ ކުޅެފައި ނުވާއިރު، އަލް ނަޞްރާއި ރޮނާލްޑޯއާ ދެމެދު މައްސަލަ ޖެހިފައިވާ ކަަމަށް ވަނީ ރިޕޯޓު ކޮށްފަ އެވެ.

މެޗުގައި އަލް ނަޞްރުން ލަނޑު ޖަހައި ލީޑު ނެގީ މެޗުގެ 84 ވަނަ މިނެޓުގަ އެވެ. އަލް ނަޞްރަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ލީޑު ނަގައިދިނީ ސެނެގާލްގެ ސަޑިއޯ މާނޭ އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އަލް ނަޞްރުގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ އެންޖެލޯ ގެބްރިއެލް އެވެ. 

މެޗުން މޮޅުވެ އަލް ނަޞްރުން ވަނީ އެއް ވަނައިގައި އޮތް އަލް ޙިލާލްއާ ދެމެދު އޮތް ފަރަގު ޕޮއިންޓަކަށް ކުޑަ ކޮށްފަ އެވެ. އެއް ވަނައިގައި އަލް ޙިލާލް އޮތީ މިހާތަނަށް ކުޅެފައިވާ 20 މެޗުން 50 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އަލް ނަޞްރަށް ލިބެނީ 49 ޕޮއިންޓެވެ.