ރޮނާލްޑޯގެ ޕެނަލްޓީ ނާކާމިޔާބު ވީ ނަމަވެސް، ފަހު ވަގުތު ޕޯޗުގަލް މޮޅުވެއްޖެ

ފީފާ ވޯލްޑް ކަޕް ކޮލިފިކޭޝަންގައި އަޔަލެންޑާ ދެކޮޅަށް ކުޅުނު މެޗުން ފަހު ވަގުތު ޕޯޗުގަލް މޮޅުވެއްޖެ އެވެ.

ހޮނިހިރު ދުވަހުގެ ރޭ ކުޅުނު މެޗު ޕޯޗުގަލް އިން ކާމިޔާބު ކުރީ 1-0 އިންނެވެ. މެޗުގައި ޕޯޗުގަލް އިން ލަނޑު ޖެހީ ވެސް މެޗުގެ ފަހު ވަގުތުގަ އެވެ.

މެޗުގައި ދެ ޓީމުގެ ފަރާތުން ވެސް ރަނގަޅު ކުޅުމެއް ފެނުނުއިރު، ޕޯޗުގަލް އަށް ވަނީ ލަނޑު ޖަހާނެ ފުރުސަތު ތަކެއް ލިބިފަ އެވެ. އެގޮތުން މެޗުގެ ފުރަތަަމަ ހާފާއި ދެ ވަނަ ހާފުގައި ވެސް ޕޯޗުގަލް އިން ލަނޑު ޖަހަން ފުރުސަތު ތަކެއް ތަނަވަސް ކުރި އެވެ.

މެޗުގެ ދެ ވަނަ ހާފުގައި ޕޯޗުގަލް އަށް ލީޑު ނަގައިދޭން އެންމެ ރަނގަޅު ފުރުސަތެއް ލިބުނީ އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ އަށެވެ. މެޗުގެ 75 ވަނަ މިނެޓުގައި ޕޯޗުގަލް އަށް ލިބުނު ޕެނަލްޓީ ރޮނާލްޑޯ ފޮނުވާލި ނަމަވެސް، އަޔަލެންޑުގެ ގޯލު ކީޕަރުގެ ފައިގައި ޖެހިފައި ބޯޅަ ދިޔައީ ބޭރަށެވެ.

މެޗުން ޕޯޗުގަލް މޮޅުވެފައި ވަނީ އެންމެ ފަހު ވަގުތުގައި ލަނޑު ޖަހައިގެންނެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޕޯޗުގަލް އަށް ލަނޑު ޖަހައި ކުރި ހޯދައިދިނީ ރުބެން ނެވެސް އެވެ. އެއީ ފްރަންސިސްކޯ ޓްރިކާއޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗަށް ފަހު ވާހަކަ ދައްކަމުން ޕޯޗުގަލްގެ ކޯޗު ރޮބާޓޯ މާޓިނޭޒް ބުނެފައި ވަނީ، އަޔަލެންޑުގެ ފަރާތުން އެކަހަލަ ކުޅުމެއް ފެންނާނެ ކަމަށް ކުރިން އުންމީދު ވެސް ކުރެވުނު ކަމަށެވެ. މެޗުގައި އަޔަލެންޑުން ބޭނުން ކުރަމުން ދިޔަ އުކުޅު ތަކުގެ ސަބަބުން ހައިރާން ނުވާ ކަމަށް ވެސް މާޓިނޭޒް ވަނީ ބުނެފަ އެވެ.

ޚާއްސަކޮށް އަޔަލެންޑުން ކުޅެމުން ދިޔައީ ޑިފެންސް އަށް އިސްކަން ދީގެން ކަމަށާއި، އެކަމުގެ ސަބަބުން ޕޯޗުގަލް އަށް އުނދަގޫ ތަކެއް ކުރިމަތިވި ކަމަށް މާޓިނޭޒް ވަނީ ފާހަގަ ކޮށްފަ އެވެ. އެހެން ނަމަވެސް ފަހު ވަގުތު ޖެހި ލަނޑާ އެކު ޕޯޗުގަލް މޮޅުވުމުން ހިތްހަމަ ޖެހިފައި ހުރި ކަމަށް މާޓިނޭޒް ބުންޏެވެ.

މިހާތަނަށް ކޮލިފިކޭޝަންގައި ކުޅުނު ތިން މެޗުން ވެސް މޮޅުވެ ޕޯޗުގަލް އެއް ވަަނައިގައި އޮތީ ނުވަ ޕޮއިންޓާ އެކު އެވެ. ޕޯޗުގަލް އަށް ދެން އޮންނާނީ ހަންގޭރީއާ ދެކޮޅަށް ކުޅޭ މެޗެވެ.