އަލް ނަޞްރު މޮޅުވީއިރު، ރޮނާލްޑޯ އެނބުރި އައިސް ލަނޑު ޖަހައިފި

ސައުދީ ޕްރޯ ލީގުގައި އަލް ފާތެޙްއާ ދެކޮޅަށް ކުޅުނު މެޗުން މޮޅުވެ އަލް ނަޞްރުން، އެއް ވަނައިގައި އޮތް އަލް ޙިލާލްއާ ދެމެދު އޮތް ފަރަގު ޕޮއިންޓަކަށް ކުޑަ ކޮށްފި އެވެ.

އަލް ފާތެޙްއާ ދެކޮޅަށް ކުޅުނު މެޗު އަލް ނަޞްރުން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި އަލް ނަޞްރުން އެއް ލަނޑު ޖެހިއިރު، އަނެއް ލަނޑު ޖެހީ މެޗުގެ ދެ ވަނަ ހާފުގަ އެވެ.

މެޗު ފަށައިގެން 18 ވަނަ މިނެޓުގައި އަލް ނަޞްރަށް ލީޑު ނަގައިދިނީ ކެޕްޓަން ކްރިސްޓިއާނޯ ރޮނާލްޑޯ އެވެ. މިއީ އަލް ނަޞްރްއާ ޖެހުނު މައްސަލައިގައި ކުޅުމާ ދުރުގައި ހުރުމަށް ފަހު، ރޮނާލްޑޯ އެނބުރި އައިސް ކުޅުނު މެޗެވެ. އެ ލަނޑާ އެކު ރޮނާާލްޑޯގެ ކެރިއަރުގައި އޭނާ ޖެހި ލަނޑުގެ އަދަދު ވަނީ 962 އަށް އަރައިފަ އެވެ. މެޗުގެ ދެ ވަނަ ހާފުގައި އަލް ނަޞްރުގެ ދެ ވަނަ ލަނޑު ޖެހީ އައިމަން ޔަހްޔާ އެވެ.

މެޗުން މޮޅުވެ އަލް ނަޞްރު ދެ ވަނައިގައި އޮތީ މިހާތަނަށް އެ ޓީމު ކުޅެފައިވާ 21 މެޗުން 52 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން އެއް ވަނައިގައި އަލް ޙިލާލް އަށް ލިބެނީ 53 ޕޮއިންޓެވެ. ދެ ޓީމުގެ ދެ މެދުގައި ޕޮއިންޓެއްގެ ފަރަގު އޮތްއިރު، އަލް ނަޞްރުން އަންނަނީ މި ފަހުން ރަނގަޅު ނަތީޖާ ތަކެއް ނެރެމުންނެވެ.