ރޮނާލްޑޯގެ ދެ ލަނޑުން މޮޅުވެ، އަލް ނަޞްރު އެއް ވަނަ އަށް

ސައުދީ ޕްރޯ ލީގުގައި އަލް ހަޒެމްއާ ދެކޮޅަށް ކުޅުނު މެޗުން މޮޅުވެ، އަލް ނަޞްރުން ލީގު ތާވަލްގެ އެއް ވަނަ މަގާމަށް ޖެހިލައިފި އެވެ.

އަލް ހަޒެމްއާ ދެކޮޅަށް ކުޅުނު މެޗު އަލް ނަޞްރުން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި އަލް ނަޞްރުން ދެ ލަނޑު ޖެހިއިރު، އަނެއް ދެ ލަނޑު ޖެހީ މެޗުގެ ދެ ވަނަ ހާފުގަ އެވެ.

މެޗު ފަށައިގެން 13 ވަނަ މިނެޓުގައި އަލް ނަޞްރަށް ލީޑު ނަގައިދިނީ އެ ޓީމުގެ ކެޕްޓަން ކްރިސްޓިއާނޯ ރޮނާލްޑޯ އެވެ. އޭގެ ފަހުން ފުރަތަމަ ހާފުގެ 30 ވަނަ މިނެޓުގައި ކިންގްސްލީ ކޯމަން ވަނީ އަލް ނަޞްރުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މެޗުގެ ދެ ވަނަ ހާފުގެ 77 ވަނަ މިނެޓުގައި އަންގެލޯ ގަބްރިއެލް ވަނީ އަލް ނަޞްރުގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. އޭގެ ދެ މިނެޓު ފަހުން އަލް ނަޞްރުގެ ހަތަރު ވަނަ ލަނޑު ޖެހީ ރޮނާލްޑޯ އެވެ. މިއީ އަލް ނަޞްރާ ޖެހުނު މައްސަލައިގައި ކުޅުމާ ދުރުގައި ހުރުމަށް ފަހު، އެނބުރި އައިސް ލީގުގައި ރޮނާލްޑޯ ކުޅުނު ދެ ވަނަ މެޗެވެ.

މޮޅާ އެކު އަލް ނަޞްރުން ވަނީ ލީގު ތާވަލްގެ އެއް ވަނަ މަގާމަށް ޖެހިލައިފަ އެވެ. މިހާތަނަށް ލީގުގައި ކުޅެފައިވާ 22 މެޗުން އަލް ނަޞްރަށް ލިބެނީ 55 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަަނައިގައި ވާދަވެރި އަލް ޙިލާލް އަށް ލިބެނީ 54 ޕޮއިންޓެވެ.