ރޮނާލްޑޯގެ ލަނޑުން މޮޅުވެ، އަލް ނަޞްރުން ތިން ޕޮއިންޓަށް ފަރަގު ކުޑަ ކޮށްފި

ސައުދީ ޕްރޯ ލީގުގައި އަލް ޚުލޫދާ ދެކޮޅަށް ކުޅުނު މެޗުން މޮޅުވެ، އަލް ނަޞްރުން ތިން ޕޮއިންޓަށް ފަރަގު ކުޑަ ކޮށްފި އެވެ.

ހުކުރު ދުވަހުގެ ރޭ ކުޅުނު މެޗު އަލް ނަޞްރުން ކާމިޔާބު ކުރީ 3-0 އިންނެވެ. މެޗުގައި އަލް ނަޞްރުން އެ ޓީމުގެ ތިން ލަނޑު ވެސް ޖެހީ ދެ ވަނަ ހާފުގަ އެވެ. އަލް ނަޞްރުން ރަނގަޅަށް ކުޅުނު އެ މެޗުގެ ފުރަތަމަ ހާފުގައި ވެސް އެ ޓީމަށް ވަނީ ލަނޑު ޖަހަން ފުރުސަތު ލިބިފަ އެވެ.

މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި އަލް ނަޞްރަށް ލީޑު ނަގައިދިނީ ކެޕްޓަން ކްރިސްޓިއާނޯ ރޮނާލްޑޯ އެވެ. އަލް ނަޞްރުގައި ރޮނާލްޑޯ މޮޅު ކުޅުމެއް ދައްކަމުން އަންނައިރު، މި ސީޒަންގައި އެ ޓީމަށް ކުޅެދިން 27 މެޗުގައި 23 ލަނޑު ޖަހައިފަ އެވެ. 

އޭގެ ފަހުން މެޗުގެ 53 ވަނަ މިނެޓުގައި އަލް ނަޞްރުގެ ދެ ވަނަ ލަނޑު ޖަަހައި ލީޑު ފުޅާ ކޮށްދިނީ މުޙައްމަދު ސިމަކަން އެވެ. އަދި މެޗުގައި އަލް ނަޞްރުގެ ތިން ވަނަ ލަނޑު، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޖެހީ ކިންގްސްލީ ކޯމަން އެވެ. އެއީ އެ ޓީމަށް ލިބުނު ޕެނަލްޓީ ކާމިޔާބު ކޮށްގެންނެވެ.

މޮޅާ އެކު އަލް ނަޞްރު ދެ ވަނައިގައި އޮތީ މިހާތަނަށް ކުޅެފައިވާ 18 މެޗުން 43 ޕޮއިންޓާ އެކު އެވެ. އަލް ނަޞްރާއި، ދެ ވަނައިގައި އޮތް އަލް ޙިލާލްއާ ދެމެދު މިހާާރު އޮތީ ތިން ޕޮއިންޓުގެ ފަރަގެކެވެ. ހަމަ އެ އަދަދަށް މެޗު ކުޅެގެން އެއް ވަަނައިގައި އަލް ޙިލާލް އަށް ލިބެނީ 46 ޕޮއިންޓެވެ.