"ޕްރައިމް ގޯޑައުން" ގައި ހިނގި އަލިފާނުގެ ހާދިސާއާ ގުޅިގެން އިންތިޚާބަށް އެއްވެސް ބުރުލެއް ނާރާނެ: އީސީ
ޕްރައިމް ގޯޑައުންގައި ހިނގި އަލިފާނުގެ ހާދިސާއާ ގުޅިގެން އިންތިޚާބީ މަރުކަޒުގެ މަސައްކަތްތައް ވަގުތީގޮތުން ސޯޝަލް ސެންޓަރަށް ވަނީ ބަދަލުކޮށްފައި. އިންތިޚާބަށް ބޭނުންވާ އެއްވެސް ލިޔެކިޔުމަކަށް ގެއްލުންވެފައި ނުވާތީ، ކުރިއަށް އޮތް ލޯކަލް ކައުންސިލް އިންތިޚާބާއި ރެފަރެންޑަމްގެ ކަންކަން ތާވަލާ އެއްގޮތަށް ކުރިއަށްދާނެ ކަމުގެ ޔަގީންކަން ކޮމިޝަނުން ވަނީ ދީފައި. އަދި އެމްއެންޑީއެފުން ހުއްދަ ދިނުމުން އަލުން އިންތިޚާބީ މަރުކަޒުގައި މަސައްކަތް ފަށާނެ ކަމަށްވެސް އެ ކޮމިޝަނުން ބުނޭ.
އިލެކްޝަންސް ކޮމިޝަނުން ބޭއްވި ނޫސްވެރިންގެ ބައްދަލުވުމެއްގެ ތެރެއިން. | އިލެކްޝަންސް ކޮމިޝަން
"ޕްރައިމް ގޯޑައުން" ގައި ހިނގި އަލިފާނުގެ ހާދިސާއާ ގުޅިގެން ކުރިއަށް އޮތް ލޯކަލް ކައުންސިލް އިންތިޚާބަށް އެއްވެސް ބުރުލެއް ނާރާނެ ކަމަށް އިލެކްޝަންސް ކޮމިޝަން (އީސީ)އިން ބުނެފި އެވެ.
އަލިފާން ރޯވި ގުދަން އެއްކޮށް އަނދާފައިވާއިރު، އީސީގެ އިންތިޚާބީ މަރުކަޒު ހުރީ ރޯވި ގުދަނާ ޖެހިގެންނެވެ.
އެސަރަހައްދުގައި ހުންނަވައި، ބުދަ ދުވަހުގެ ރޭ އިލެކްޝަންސް ކޮމިޝަންގެ ރައީސް މުހައްމަދު ޒާހިދު ވިދާޅުވީ، އަލިފާނުގެ ހާދިސާއާ ގުޅިގެން މަސައްކަތް މެދުކަނޑާލި ނަމަވެސް އިންތިޒާމްތައް ހަމަޖެހިފައިވާ ކަމަށެވެ.
އިންތިޚާބަށް ބޭނުންވާ ލިޔެކިޔުންތައް ރައްކާތެރިކަމާއެކު އިމާރާތުން ނެރިފައިވާކަން ފާހަގަކުރައްވައި ޒާހިދު ވިދާޅުވީ، އެއްވެސް ލިޔެކިއުމަކަށް ގެއްލުން ނުލިބޭ ކަމަށާއި، އިންތިޚާބުތަކުގެ ހުރިހާ ކަމެއް އެއްވެސް ބުރުލެއް އެރުމެއް ނެތި ކުރިއަށްދާނެ ކަމަށެވެ.
މީގެ އިތުރުން ޒާހިދު ވިދާޅުވީ، އިންތިޚާބީ މަރުކަޒަށް ވަނުމުގެ ހުއްދަ އެމްއެންޑީއެފްގެ ފަރާތުން ލިބެންދެން މަސައްކަތް ކުރިއަށް ގެންދާނީ ސޯޝަލް ސެންޓަރުގައި ކަމަށެވެ.
ކައުންސިލް އިންތިޚާބާއި، އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ އިންތިޚާބު ބާއްވަން ނިންމާފައިވަނީ 4 އޭޕްރީލް 2026 ގަ އެވެ. އަދި އެ ދުވަހު، މަޖިލިސް އިންތިޚާބާއި، ރިޔާސީ އިންތިޚާބު އެއްކޮލުމާއި ގުޅޭގޮތުން ނަގާ ރެފަރެންޑަމްގެ ވޯޓު ވެސް ނަގާނެ އެވެ.
