ތެލުގެ އަގު އުފުލުމާއެކު ޓެކްސީ ދަތުރުތަކުގެ އަގުތައް މުރާޖާކުރަން ޑްރައިވަރުން ގޮވާލައިފި

ރާއްޖޭގެ ބާޒާރުގައި ތެލުގެ އަގު ރެކޯޑް މިންވަރަކަށް އުފުލިފައިވާތީ، ޓެކްސީ ދަތުރުތަކުގެ އަގުތައް މުރާޖާކޮށް އިންސާފުވެރި ބަދަލެއް ގެނެސްދިނުމަށް ޑްރައިވާސް އެސޯސިއޭޝަން އޮފް މޯލްޑިވްސް އިން ސަރުކާރަށް ގޮވާލައިފި އެވެ.

އެ ޖަމިއްޔާއިން މިކަމަށް ގޮވާލާފައިވަނީ އެސްޓީއޯ އިން ވިއްކާ ތެލުގެ އަގު މި މަހުގެ 5 ވަނަ ދުވަހުން ފެށިގެން ބޮޑުކުރުމާ ގުޅިގެން ނެރުނު ނޫސް ބަޔާނެއްގަ އެވެ.

ޓެކްސީ ޑްރައިވަރުންގެ ޖަމިއްޔާއިން ނެރުނު ބަޔާނުގައި ބުނެފައިވަނީ، ތެލުގެ އަގާއި ދިރިއުޅުމުގެ އާންމު ޚަރަދުތައް އިންތިހާއަށް އުފުލެމުންދާ ދަނޑިވަޅެއްގައި، ޓެކްސީގެ ދަތުރުތަކުގެ އަގު ސަރުކާރުން ވަކި މިންގަނޑެއްގައި ހިފަހައްޓާފައި އޮތުމަކީ ޑްރައިވަރުންނަށް ލިބޭ ވަރަށް ބޮޑު ތަކުލީފެއް ކަމަށެވެ. އަދި މި ޚިދުމަތް ދިނުމުގައި ޑްރައިވަރުންނަށް ލުއިފަސޭހަކޮށްދިނުމަށް ސަރުކާރުން ވޭތުވެދިޔަ ދިގު މާޒީގައި އެކަށީގެންވާ ފިޔަވަޅުތަކެއް އަޅާފައި ނުވާކަން އެ ޖަމިއްޔާއިން ފާހަގަކުރެ އެވެ.

މީގެ އިތުރުން، ހުރިހާ މާލީ ބުރައެއް ހަމައެކަނި ޑްރައިވަރުން އުފުލަންޖެހުމަކީ އިންސާފެއް ކަމަށް ގަބޫލެއް ނުކުރެވޭ ކަމަށް ވެސް އެ ބަޔާނުގައިވެ އެވެ. އެ ޖަމިއްޔާއިން ދެކޭގޮތުގައި މިހާރު ކުރިމަތިވެފައިވާ މާލީ ދަތިތަކަށް އޮތް ހަމައެކަނި ހައްލަކީ ޓެކްސީ ދަތުރުތަކުގެ އަގަށް ބަދަލު ގެނައުމެވެ. އެހެން ނޫންނަމަ، މި މަސައްކަތުން އާމްދަނީ ހޯދައިގެން މާލޭގައި ދިރިއުޅޭ ގިނަ އާއިލާތަކެއްގެ ދިރިއުޅުމަށް ބޮޑެތި ގޮންޖެހުންތަކާއި ނުރައްކާތަކެއް ކުރިމަތިވެދާނެ ކަމުގެ އިންޒާރު ވެސް އެ ޖަމިއްޔާއިން ވަނީ ދީފަ އެވެ.

މި މައްސަލައާ ގުޅޭގޮތުން ކަމާބެހޭ ފަރާތްތަކާއެކު މަޝްވަރާކުރުމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުގައި މިހާރު ރަސްމީކޮށް އެދިފައިވާނެ ކަމަށް ޑްރައިވާސް އެސޯސިއޭޝަނުން ހާމަކުރެ އެވެ. އެ ޖަމިއްޔާއިން ބުނީ ރައްޔިތުންނާ ގުޅުންހުރި މިފަދަ މުހިންމު ނިންމުންތައް ނިންމަންވާނީ ކަމާބެހޭ ފަރާތްތަކާ މަޝްވަރާކޮށްގެން ކަމަށާއި، މިހާރު ކަނޑައަޅާފައިވާ އަގުތަކުގައި ޚިދުމަތް ދިނުމަކީ ޑްރައިވަރުންނަށް އުނދަގޫ ކަމެއްކަން ސަރުކާރުން ގަބޫލުކުރަންޖެހޭ ކަމަށެވެ.

ޓެކްސީ ޑްރައިވަރުންގެ ޖަމިއްޔާއިން އިތުރަށް ބުނެފައިވަނީ، މި ކަންބޮޑުވުންތަކަށް އެކަށީގެންވާ ސަމާލުކަމެއް ނުދީފިނަމަ، ޑްރައިވަރުންގެ މެދުގައި އޮތް ހިތްހަމަނުޖެހުން ބޮޑުވެ، އޭގެ ސަބަބުން ކުރިމަތިވެދާނެ އެންމެހައި ކަންކަމުގެ ޒިންމާ އުފުލަންޖެހޭނީ ކަމާބެހޭ މުއައްސަސާތަކުން ކަމަށެވެ. އެހެންކަމުން، ހާލަތު އިތުރަށް ގޯސްވުމުގެ ކުރިން ޓްރާންސްޕޯޓް މިނިސްޓްރީން މިކަމަށް ދާއިމީ އަދި އިންސާފުވެރި ހައްލެއް ހޯދައިދިނުމަށް އެ ޖަމިއްޔާއިން ވަނީ ގޮވާލާފަ އެވެ.