އަގުހެޔޮކޮށް ގަނެފައިވާ ތެޔޮ އަގުބޮޑުކޮށް ރައްޔިތުންނަށް ވިއްކައި ސަރުކާރުން ޒުވާނުންނަށް އޮޅުވާލައިފި: އާޒިމް
10 މާރިޗު 2026 | އަންގާރަ 14:59އެސްޓީއޯގައި އަގުހެޔޮކޮށް ގަނެފައި ހުރި ތެޔޮ ހުއްޓާ، ސަރުކާރުން ތެލުގެ އަގު ބޮޑުކުރުމަކީ ޒުވާނުންނަށް ދިން ބޮޑު ދޯކާއެއްގެ ގޮތުގައި މާލެ ސިޓީގެ މޭޔަރު އާދަމް އާޒިމް ސިފަކުރައްވައިފިއެވެ. މީގެ އިތުރުން، މި ސަރުކާރަކީ ރައްޔިތުންނަށް އޮޅުވާލައި ދޮގުހަދާ ސަރުކާރެއް ކަމަށް ވިދާޅުވެ، އިންތިޚާބުތައް އެއްކޮށްލުމަށް ކުރާ މަސައްކަތާ ދެކޮޅަށް ވޯޓު ދިނުމަށް އޭނާ ވަނީ ގޮވާލައްވާފައެވެ. މާލޭގެ ރައްޔިތުންނަށް ދޭން ނިންމާފައިވާ ގޯތިތަކުގެ މައްސަލައިގައި ވެސް ސަރުކާރުން އިހުމާލުވަމުންދާ ކަމަށް އާޒިމް ތުހުމަތު ކުރެއްވިއެވެ.
މާލެ ސިޓީގެ މޭޔަރު އާދަމް އާޒިމް. | ރާއްޖެ އެމްވީ
ސަރުކާރުން އަގުހެޔޮކޮށް ގަނެފައިވާ ތެޔޮ އަގުބޮޑުކޮށް ރައްޔިތުންނަށް ވިއްކައި ޒުވާނުންގެ އަތުން ބޮޑު ޓެކްސްއެއް ނަގައިފައިވާކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެ އެވެ.
"އިންތިހާބު އެއްކުރަން ނޫނެކޭ" ޕިކަޕް ޖަލްސާގައި ވާހަކަ ދައްކަވަމުން އާޒިމް ވިދާޅުވީ ތެލުގެ އަގު ބޮޑުނުކުރާނެކަމަށް ބުނެފައި ދެ ދުވަސް ނުވަނީސް އަގުބޮޑުކޮށްލާފައިވާ ކަމަށެވެ. އާޒިމް ވިދާޅުވީ ކުރީގައި ނުވަދިހަ ރުފިޔާއަށް ސައިކަލެއްގެ ޓޭންކު ފުލްކޮށްލެވޭއިރު މިހާރު ފުލްކޮށްލެވެނީ ސަތޭކަ ސާޅީސް ރުފިޔާއަށް ކަމަށެވެ. މިއީ ސަރުކާރުން ޒުވާނުންނަށް ދިން ވަރަށް ބޮޑު ދޯކާއެއް ކަމެއްކަމަށް އާޒިމް ވިދާޅުވި އެވެ.
އާޒިމް ވިދާޅުވީ އެސްޓީއޯ ހިނގި މީހެއްގެ ހައިސިއްޔަތުން އެނގޭ ގޮތުގައި އެސްޓީއޯގައި އަގުހެޔޮކޮށް ގަނެފައި ހުރި ތެޔޮ ހުންނާނެކަމަށާއި އަގުހެޔޮކޮށް ގަނެގެން ގެންނަން ހުރި ތެޔޮވެސް ހުންނާނެކަމަށެވެ. އަގުހެޔޮކޮށް ގަނެފައި ހުރި ތެޔޮ އަގުބޮޑުކޮށް ވިއްކާކަށް ނުޖެހޭކަމަށާއި ބޭރުގެ ބޯޓުތަކުގައި އެސްޓީއޯއިން ގަނެފައިވާ ތެޔޮ ބަހައްޓާފައި ހުންނާނެކަމަށް އާޒިމް ވިދާޅުވި އެވެ.
އެސް.ޓީ.އޯ ހިންގި މީހެއްގެ ހައިސިއްޔަތުން އެނގެނީ އެސް.ޓީ.އޯގައި ހުންނާނެ އަގުހެޔޮކޮށް ގަނެފައި ހުރި ތެޔޮ. އަގުހެޔޮކޮށް ގަނެފައި ހުރި ތެޔޮ އަގުބޮޑުކޮށް ވިއްކާކަށް ނުޖެހޭ. އަދި އަގުހެޔޮކޮށް ގަނެފައި ހުރި ތެޔޮ ހުންނާނެ ބޭރުގެ ބޯޓުތަކުގައި މިހާރު އެސް .ޓީ.އޯއިން ބަހައްޓާފައި. އެހެންވީމާ، ދެން އަންނަ ޝިޕްމަންޓް ވެސް އަގުބޮޑު ކުރާކަށްނުޖެހޭ. އެއް މަސްދުވަސް ފަހުން އަންނަ ތެޔޮ އަގުބޮޑުކޮށް ވިއްކުމަކީ މައްސަލައެއް ކަމަށް އަޅުގަނޑު ނުދެކެން. އެހެންނަމަވެސް، މިއަދު މި ކުރި ކަމަކީ އަގުހެޔޮކުގެ ގަނެފައި ހުރި ތެޔޮ، އަދި އަގުހެޔޮކޮށް ގަނެގެން ގެންނަން ހުރި ތެޔޮ، އަގުބޮޑުކޮށް ރައްޔިތުންނަށް ވިއްކާ ޒުވާނުންގެ ސައިކަލުތަކަށް ޕެޓްރޯލުން އަގުބޮޑުކޮށް އަޅުވަން ޖައްސައި، ޒުވާނުންގެ އަތުން ބޮޑު ޓެކްސްއެއް ނެގީ. އެހެންވީމާ، މިއީ ވަރަށް ގޯސްކޮށް ކުރެވޭ ކަންތައްކަން ރައްޔިތުން ގަބޫލުކުރެވޭ.މާލެ ސިޓީގެ މޭޔަރު އާދަމް އާޒިމް
މި ސަރުކާރަކީ ދޮގުހަދާ ސަރުކާރެއްކަމަށާއި ސަރުކާރުން ބުނާ ގޮތަށް ކަންތައްތައް ކުރުމަކީ ރައްޔިތުންނަށް ފައިދާއެއް ވާނެ ކަމެއް ނޫންކަން ރައްޔިތުން ގަބޫލުކުރާކަމަށް އާޒިމް ވިދާޅުވިއެވެ. މި ދެ އަހަރާއި ބައިގެ ތެރޭގައި ރާއްޖެ ހިންގުމާ ހަވާލުވި ބޭފުޅަކު ރައްޔިތުންނަށް ތާއަބަދު ދޮގުހަދަމުންދާކަމަށް އާޒިމް ވިދާޅުވި އެވެ.
އާޒިމް ވިދާޅުވީ މިފަހަރުގެ ވޯޓަކީ ހުރިހާ އިންތިޚާބެއް އެއްކޮށްލުމަށްޓަކައި މަކަރުވެރިކަމާއެކު ހިލަތްތެރިކަމާއެކު ކުރިއަށްގެންދާ ވޯޓެއްކަމަށެވެ. މި ދެ ވޯޓު ކުރިއަށް ގެންދަން ސަރުކާރުން ނިންމާފައިވާ ސަބަބަކީވެސް އޮޅުވާލަންވެގެންކަމަށް އާޒިމް ވިދާޅުވި އެވެ. މާލެ ސިޓީ ރައްޔިތުންނަށް ދޭން ބުނި ގޯތިތައް ނުދީ އޮޅުވާލައިގެން އެތަންމިތަނަށް ބަދަލުކޮށްފައިވާކަމަށާއި އެމްޑީޕީގެ ސަރުކާރުން ފަށާފައިވާ ގޯތި ޕްރޮގްރާމު އޮޅުވާލައި ރަސްމާލެ ކިޔާތަނެއް ހިއްކައި ފައިސާ އިސްރާފުކޮށްލައިފައިވާކަމަށް އާޒިމް ވިދާޅުވި އެވެ.
އާޒިމް ވިދާޅުވީ މި ސަރުކާރަކީ މުޅި ގައުމު ގަޑުބަޑުކޮށްލާ ސަރުކާރެއްކަމަށާއި ރައްޔިތުންގެ ކައިރިއަށް ދާކަށް ނުވެސް ކެރޭނެކަމަށެވެ. އަންނަ އިންތިޚާބުގައި އިންތިޚާބުތައް އެއްކޮށްލުމަށް ނޫނެކޭ ބުނުމަށް އާޒިމް ރައްޔިތުންގެ ކިބައިން ވަނީ އެދިވަޑައިގެންފަ އެވެ.
