މާލޭގެ ޓެކްސީ މައްސަލަ ހައްލުކުރެވޭނީ އިތުރުކުރެވޭ ކާރަކުން ނޫން، މަޝްވަރާގެ މަތިން: ޑްރައިވަރސް އެސޯސިއޭޝަން
ލޯނަށް ފައިސާ ދައްކަން ޖެހިފައިވަނީ ޓެކްސީ ވެސް އަތަށް ނުލިބި
ޑްރައިވަރސް އެސޯސިއޭޝަން އޮފް މޯލްޑިވްސް ގެ ރައީސް އިބްރާހިމް ނިޔާޒް
މާލޭގެ ޓެކްސީ މައްސަލަ ހައްލުކުރެވޭނީ ކާރު އިތުރުކޮށްގެން ނޫން ކަމަށާއި، އެކަން ކުރެވޭނީ މަޝްވަރާ ކޮށްގެން ކަމަށް ޑްރައިވަރސް އެސޯސިއޭޝަން އޮފް މޯލްޑިވްސް ރައީސް އިބްރާހިމް ނިޔާޒު ވިދާޅުވެއްޖެ އެވެ.
ޓެކްސީ ނަފާގެ ތެރެއިން ޓެކްސީ ޑްރައިވަރުންނަށް ދިމާވި މައްސަލައާއި ގުޅިގެން ބޭއްވި ނޫސްވެރިންގެ ބައްދަލުވުމުގައި ނިޔާޒު ވިދާޅުވީ ސަރުކާރު ހިއްސާވާ ޓެކްސީ ފުލީޓެއް ގެނައުމުގެ މަސައްކަތް އިޢުލާންކޮށްފައި މުވައްޒަފުން ނެގުމަށް ވެސް އިޢުލާންކުރެވިފައިވާ އިރު ޓެކްސީ ޑްރައިވަރުން ބާކީ ކޮށްފައިވާ ކަމަށެވެ. އޭނާ ވިދާޅުވީ މީގެ އެއްވެސް މަޢުލޫމާތެއް މިހާތަނަށް އާންމުކޮށްފައެއް ނުވާ ކަމަށާއި، މަޝްވަރާކޮށްފައި ވެސް ނުވާ ކަމަށެވެ. ނިޔާޒު ވިދާޅުވީ މި ކަންކަން ކުރިއަށް ގެންދަނީ ވަރަށް ސިއްރު ޕްރޮސީޖަރއެއްގެ ތެރެއިން ކަމަށެވެ.
މީގައި އަޅުގަނޑުމެން ޓެކްސީ ޑްރައިވަރުންނަށް އޮތީ ކޮންކޮން ފުރުޞަތެއްކަން، މީގައި އަޅުގަނޑުމެންނަށް ބައިވެރިވެވޭނީ ކިހާ މިންވަރަކަށްކަން ނޭނގޭ. ދެވަނަ ކަމަކަށް އަޅުގަނޑުމެން ފާހަގަކޮށްލަން ބޭނުންވަނީ، މި މާލޭގައި ޓެކްސީގެ މައްސަލައަށް އިތުރުކުރެވޭ ކާރަކުން ޙައްލެއް ނުގެނެވޭނެ. އަޅުގަނޑުމެން ގަބޫލުކުރާ ގޮތުގައި މިކަމަށް ޙައްލެއް ގެނެވޭނީ އަޅުގަނޑުމެން މަޝްވަރާކުރެވި، މިކަމަށް އެކަށީގެންވާ އެދެވޭ ޙައްލެއް ގެނެވެނީ އަޅުގަނޑުމެން ބައިވެރިވުމާ ވެސް އެކީގައި އިނގޭތޯ.ޑްރައިވަރސް އެސޯސިއޭޝަން އޮފް މޯލްޑިވްސް ރައީސް އިބްރާހިމް ނިޔާޒު
ނިޔާޒު ވިދާޅުވީ ވަރަށް ފަހުން ޓެކްސީ ނަފާގެ ލޯނުތައް ފައިސާ ދެއްކުމަށް ޓެކްސީ ޑްރައިވަރުންނަށް އަންގައިފައިވާ ކަމަށެވެ. އަދި ޓެކްސީ ނަފާގެ ލޯނަކީ ނިމިދިޔަ ސަރުކާރުން އިޢުލާންކުރެވިގެން ކުރިއަށް ގެންގޮސްފައިވާ ލޯން ސްކީމެއް ކަމަށާއި، އެ ލޯނަށް ކުރިމަތިލުމަށް ހުޅުވައިލިއިރު އެސްޑީއެފްސީ މެދުވެރިކޮށް ކާރު ގެނެސްގެން ޓެކްސީއަށް ރަޖިސްޓްރީކުރެވޭނެ މަގު ކުރީ ސަރުކާރުގައި ފަހިކޮށްދިން ކަމަށެވެ. އެހެންނަމަވެސް ލޯނު ހަމަޖެހިފައި ލޯނަށް ފައިސާ ދޫކޮށްފައިވަނީ މިސަރުކާރުން 2024 ވަނަ އަހަރުގެ މާރޗު މަހުގެ ތެރޭގައި ކަމަށެވެ.
މިހާރުގެ ސަރުކާރު ވުޖޫދުވެފަ ޖަނަވަރީ ފެބުރުއަރީ މަސް ތެރޭގައި އެގްރީމެންޓުތަކުގައި ސޮއިކުރަން ފެށީ މަޖިލިސް އިންތިޚާބު ބޯމަތިވެފައި އޮއްވަ އެވެ. އަދި ޓެކްސީގެ ފައިސާ ޑްރައިވަރުންނަށް ނުދީ އެސްޑީއެފްސީ އިން 'ކާރުއެމްވީ' ކިޔާ ކުންފުންޏަކަށް ފައިސާ ޖަމާކުރި އެވެ. އަދި ކާރުއެމްވީ ކިޔާ ކުންފުންޏަށް 22 މީހުންގެ 60 ޕަސެންޓް ލާރި އެސްޑީއެފްސީ އިންޖަމާކޮށްފައި އޮތް ނަމަވެސް، މިހާތަނަށް އެ ކުންފުނިން ބުނަމުންދަނީ 14 ކާރު އޮތް އިރު 3 ކާރު އޮތީ ބީ ޒޯނަށް ރަޖިސްޓްރީކުރެވިފައި ކަމަށެވެ. އަދި ދެން ހުރި އެއްޗެއްސަށް ވާނުވާ ނޭނގޭ ކަމަށާއި، ޑޮކިއުމެންޓެއް ހަމައެއް ނުވާ ކަމަށެވެ. އެހެންކަމުން ޓެކްސީ ޑްރައިވަރުންނަށް ލޯނު ހަމަޖެހުނު ނަމަވެސް އެ ފައިސާ ކާރުއެމްވީއަށް އެސްޑީއެފްސީ އިން ދޫކޮށް ކާރުތައް ލޯނު ލިބުނު ފަރާތްތަކަށް ލިބިފައި ނުވެ އެވެ.
ނިޔާޒު ވިދާޅުވީ ކާރު ލޮލައް ނުފެނި ކާރު ބޭނުން ކުރެވޭނެ ހާލަތެއް ނެތި ބައެއް ޓެކްސީ ޑްރައިވަރުގެ ބޮލުގައި ވަނީ އެއްލައްކަ ހަތްދިހަ ހާސް ރުފިޔާގެ ލޯނެއް އަޅުވާފައި ކަމަށެވެ. އަދި މިއީ ޙަޤީޤަތުގައި ދައުލަތުގެ ނިޝާން ޖެހި ވުޒާރާތަކުން ޓެކްސީ ޑްރައިވަރުންނާ ދޭތެރޭގައި ޢަމަލުކޮށްފައިވާ ވަރަށް ވިޔާނުދާ ކަމެއްގެ ގޮތުގައި ސިފަ ކުރާ ކަމަށް ނިޔާޒް ވިދާޅުވި އެވެ. އަދި މިއީ ބޮޑު ސްކޭމް ކަމަށާއި، މިކަމަށް ސަރުކާރުގެ އިދާރާތަކުން ޖަވާބުދާރީވާންޖެހޭނެ ކަމަށް އޭނާ ވިދާޅުވި އެވެ.
