މިފްކޯ އިން މަސްވެރިންނަށް ވިއްކާ ޑީސަލްގެ އަގު ވަރަށް ބޮޑަށް ބޮޑުކޮށްފި

މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން މަސްވެރިންނަށް ވިއްކާ ޑީސަލްގެ އަގު ހޯމަ ދުވަހުން ފެށިގެން ވަރަށް ބޮޑަށް އުފުލައިފި އެވެ.

މިފްކޯ އިން ތެލުގެ އަގުތަކަށް ގެނައި މި ބަދަލާއެކު، މަސްވެރިންނަށް ޑީސަލް ލިބޭ އަގު ވަނީ ކުރިއާ އަޅާބަލާއިރު ގާތްގަނޑަކަށް ދެގުނަ ބޮޑުވެފަ އެވެ.

މިފްކޯ އިން އަގުތަކަށް ގެނައި ބަދަލާއެކު، މަސްކިރާ މަސްވެރިންނަށް ދެން ޑީސަލް ލީޓަރެއް ވިއްކާނީ 27.24 ރުފިޔާ އަށެވެ. އަދި އާންމު ފަރާތްތަކަށް ޑީސަލް ލީޓަރެއް ވިއްކާ އަގު ވަނީ 28.54 ރުފިޔާ އަށް ބޮޑުކޮށްފަ އެވެ. މީގެ ކުރިން މަސްވެރިންނަށް ޑީސަލް ލީޓަރެއް ލިބެމުންދިޔައީ 13.90 ރުފިޔާ އަށެވެ. އަދި ތިން ޓަނަށްވުރެ ގިނައިން މަސްކިރާ މަސްވެރިންނަށް ލީޓަރެއް 13.72 ރުފިޔާ އަށް ލިބެމުންދިޔަ އިރު، އާންމުންނަށް ޑީސަލް ލީޓަރެއް ވިއްކަމުން އައީ 14.43 ރުފިޔާ އަށެވެ.

މި ބަދަލާއެކު މަސްވެރިންނަށް ވިއްކާ ޑީސަލް ލީޓަރަކުން 13.34 ރުފިޔާ ވަނީ ބޮޑުވެފަ އެވެ. އަދި އާންމުންނަށް ވިއްކާ ޑީސަލް ލީޓަރަކުން 14.11 ރުފިޔާ ވަނީ އުފުލިފަ އެވެ. ފާހަގަކޮށްލެވޭ ގޮތުގައި މަސްވެރިންނަށް ހެޔޮ އަގުގައި ތެޔޮ ފޯރުކޮށްދިނުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިދިޔަ އަހަރުގެ މަސްވެރިންގެ ދުވަހު ވެވަޑައިގެންނެވި ވައުދުފުޅެކެވެ.

ތެލުގެ އަގަށް އައި މި ބޮޑު ބަދަލާ ގުޅިގެން ބޮޑު ކަންނެލި މަސްވެރިންގެ ޔޫނިއަން އިން ވަނީ ކަންބޮޑުވުން ފާޅުކޮށްފަ އެވެ. އެ ޔޫނިއަން އިން ބުނީ ޑީސަލް ލީޓަރެއްގެ އަގު 28 ރުފިޔާ އާ ގާތްކުރާ އަދަދަކަށް އުފުލިފައިވާއިރު، ކަންނެލި ކިލޯއަކަށް 55 ރުފިޔާ ލިބުމަކީ މަސްދޯނިފަހަރުގެ ދަތުރުތައް ހުއްޓި، މަސްވެރި އާއިލާތަކަށް ލިބޭނެ ބޮޑު ނިކަމެތިކަމެއް ކަމަށެވެ. އަދި މަސްވެރިކަން ހުއްޓާނުލައި ކުރިއަށް ގެންދެވޭނެ މަގެއް ހޯދައިދިނުމަށް ސަރުކާރުގެ ކަމާބެހޭ ފަރާތްތަކަށް އެ ޖަމިއްޔާ އިން ވަނީ ގޮވާލާފަ އެވެ.

މިފްކޯ އިން މީގެ ކުރިން ތެލުގެ އަގު އެންމެ ބޮޑުކުރި އެއް ފަހަރަކީ 2022 ވަނަ އަހަރުގެ ޖޫން މަހު އެވެ. އޭރު އަގު ބޮޑުކުރަން ޖެހުނީ ރަޝިއާ-ޔޫކްރެއިން ހަނގުރާމައާ ގުޅިގެން ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލުމުންނެވެ. އޭރު މަސްވެރިންނަށް ޑީސަލް ލީޓަރެއް ވިއްކީ 17.63 ރުފިޔާ އަށެވެ. ނަމަވެސް އޭގެ ފަހުން ދުނިޔޭގެ ބާޒާރުގައި އަގުތައް ދަށްވުމުން މިފްކޯ އިން ވެސް އަގުތައް ދަށްކުރި އެވެ.

މިފަހަރު މިފްކޯ އިން ތެލުގެ އަގު ބޮޑުކުރި ސަބަބެއް އެ ކުންފުނިން ރަސްމީކޮށް ހާމަކޮށްފައެއް ނުވެ އެވެ. މި ބަދަލުގެ ސަބަބުން މަސްވެރިކަމުގެ ސިނާއަތަށް ބޮޑެތި ގޮންޖެހުންތަކެއް ކުރިމަތިވާނެ ކަމަށް މަސްވެރިން ދަނީ ބުނަމުންނެވެ.