ރައީސް މުއިއްޒު ވިދާޅުވި ތެލުގެ އަގުހެޔޮ ސްޓޮކް ހުއްޓާ، ތެލުގެ އަގު އިންތިހާ އަށް ބޮޑު ކުރުމަކީ ރައްޔިތުންނަށްވާ ހިޔާނާތެއް ނޫންބާ؟

ތެލުގެ އަގު ބޮޑުނުވާނެ ކަމުގެ ފުރިހަމަ ޔަގީންކަން، ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ރައްޔިތުންނަށް ދެއްވިތާ 48 ގަޑިއިރު ވެސް ނުވަނީސް، ސަރުކާރުގެ މައި ވިޔަފާރި ކުންފުނި އެސްޓީއޯ އިން ތެލުގެ އަގު އިންތިހާއަށް ބޮޑުކުރުމާ ގުޅިގެން ސަރުކާރުގެ އިޚުލާސްތެރިކަމާ މެދު އާންމުންނާއި އިދިކޮޅު ފަރާތްތަކުން ބޮޑެތި ސުވާލުތަކެއް އުފައްދަން ފަށައިފިއެވެ. ގިނަ ބަޔަކު ތުހުމަތު ކުރާ ގޮތުގައި، ރާއްޖޭގައި ތެލުގެ ބޮޑު ސްޓޮކެއް ހުރި ކަމަށް ރައީސް ވިދާޅުވެފައި ވަނިކޮށް މިފަދަ ބަދަލެއް ގެނައުމަކީ ރައްޔިތުންނަށް އޮޅުވާލައި، ހިންގި ބޮޑު ހިޔާނާތެކެވެ.

މިދިޔަ ހަފުތާގައި ބޭއްވި ނޫސްވެރިންގެ ބައްދަލުވުމެއްގައި ރައީސް މުއިއްޒު ވިދާޅުވީ، މެދުއިރުމަތީގެ ހަމަނުޖެހުންތަކާ ގުޅިގެން ތެލުގެ އަގު ބޮޑުވެދާނެ ކަމަށް ކަންބޮޑުވާން ނުޖެހޭ ކަމަށެވެ. ފެބްރުވަރީ 28 ވަނަ ދުވަހު އޮމާން އިން ތެޔޮ ޝިޕްމެންޓެއް ފުރާފައިވާ ކަމަށާއި، ރާއްޖޭގައި ތެޔޮ ރައްކާކުރެވޭ އެންމެ މަތީ މިންވަރަށް މިހާރު ވެސް ސްޓޮކް އެބަހުރި ކަމަށް އެމަނިކުފާނު ވިދާޅުވި އެވެ. ނަމަވެސް އެ ޔަގީންކަން ދެއްވިތާ ދެ ދުވަސް ނުވަނީސް، އެސްޓީއޯ އިން ވަނީ ޕެޓްރޯލް ލީޓަރެއްގެ އަގު 16.01 ރުފިޔާ އަށް އަދި ޑީސަލް ލީޓަރެއްގެ އަގު 17.54 ރުފިޔާ އަށް ބޮޑުކޮށްފަ އެވެ. މިއީ ފަހުގެ ތާރީޚެއްގައި ތެލުގެ އަގަށް މިހާ ބޮޑު ބަދަލެއް އައި ފުރަތަމަ ފަހަރެވެ.

ސަރުކާރުގެ މި ނިންމުމާ ގުޅިގެން އާންމުންގެ އެންމެ ބޮޑު ޝަކުވާ އަކީ ރައީސް މުއިއްޒުގެ ބަހާއި އަމަލު ދިމާނުވުމެވެ. ރައީސް ވިދާޅުވި ގޮތަށް އަގުހެޔޮކޮށް ކުރިން ގަނެސްފައި ހުރި ތެލުގެ ބޮޑު ސްޓޮކެއް ރާއްޖޭގައި ހުރި ނަމަ، ކުއްލިއަކަށް ރައްޔިތުންގެ ޖީބަށް ބުރަވާ ގޮތަށް އަގު ބޮޑުކުރަން ޖެހުނު ސަބަބެއް ސަރުކާރަށް ބުނެދެވިފައެއް ނުވެ އެވެ. މިކަމާ ގުޅިގެން ބައެއް ފަރާތްތަކުން ތުހުމަތު ކުރަނީ، އަގުހެޔޮކޮށް ލިބިފައި ހުރި ތެޔޮ ސްޓޮކް ބޮޑު އަގުގައި ވިއްކައިގެން ސަރުކާރުން މަސައްކަތް ކުރަނީ ކުރިއަށް އޮތް އިންތިހާބަށް ރިޝްވަތުގެ ގޮތުގައި ބަހާނެ ފައިސާ އެއްކުރުމަށް ކަމަށެވެ.

މި ސަރުކާރުގެ އެންމެ ހާއްސަ ސިފައަކީ ރައްޔިތުންނަށް ދޮގު ހަދައި އޮޅުވާލުން ކަމަށް ބުނެ ގިނަ ބަޔަކު ދަނީ ސޯޝަލް މީޑިއާގައި ނުރުހުން ފާޅުކުރަމުންނެވެ. ދީނީ ކަންކަމާއި ގައުމީ ވަހުދަތުގެ ވާހަކަ ދައްކަވައިގެން ވެރިކަމަށް ވަޑައިގެންނެވި ނަމަވެސް، އަމަލީ ގޮތުން ފެންނަނީ ރައްޔިތުންނަށް ވީ ވައުދުތަކާ ހިލާފުވެ، ކޮންމެ ކަމެއްގައި ވެސް ހަގީގަތް އޮޅުވާލަމުންދާ މަންޒަރު ކަމަށް އިދިކޮޅު ފަރާތްތަކުން ސިފަކުރެ އެވެ. ޚާއްޞަކޮށް، ދުނިޔޭގެ ބާޒާރުގައި ތެޔޮ ފީފާއެއްގެ އަގު 81 ޑޮލަރަށް އުފުލުމަކީ ކުރިން އަންދާޒާ ކުރެވެނު ކަމަކަށް ވާއިރު، ރައީސްގެ ޔަގީންކަމާ އެކު މި ފެނުނު "ސަޕްރައިޒް" އަކީ ރައްޔިތުންނަށް ވީ ބޮޑު ހިޔާނާތެއްގެ ގޮތުގައި ގިނަ ބަޔަކު ގަބޫލުކުރެ އެވެ.

އެސްޓީއޯގެ އިތުރުން އަމިއްލަ ކުންފުންޏެއް ކަމަށްވާ ހޯކްސް އިން ވެސް މިހާރު ވަނީ ތެލުގެ އަގު ބޮޑުކޮށްފައެވެ. މި ބަދަލާއެކު މުދަލާއި ޚިދުމަތުގެ އަގުތައް އުފުލި، އާންމު ދިރިއުޅުމުގެ ޚަރަދުތައް އިންތިހާއަށް ބޮޑުވެގެންދާނެ ކަމުގެ ބިރު ވަނީ ހީވެފަ އެވެ. ސަރުކާރުން ކިރިޔާ ވެސް ދޮގެއް ހެދެން އޮތް ކަމެއްގައި ތެދެއް ނުހަދާނެ ކަމަށް ބުނެ ރައްޔިތުން ކުރަމުންދާ ތުހުމަތުތަކަށް، ތެލުގެ އަގަށް އައި މި ބަދަލާއެކު އިތުރު ބާރެއް ވަނީ ލިބިފަ އެވެ.