ޑްރައިވަރުންގެ ޖަމްއިއްޔާގެ އިންތިޒާމް ސެކްރެޓަރީ މިސްބާޙްގެ ބަންދާ މެދު ގޮތެއް ނިންމުމަށް، ހުޅުމާލޭ ކޯޓަށް ހާޒިރު ކޮށްފި

ޑްރައިވާސް އެސޯސިއޭޝަންގެ އިންތިޒާމް ސެކްރެޓަރީ މިސްބާޙް ޝަރީފްގެ ބަންދާ މެދު ގޮތެއް ނިންމުމަށް، ހުޅުމާލޭ ކޯޓަށް ހާޒިރު ކޮށްފި އެވެ.

ކޯޓު އަމުރެއްގެ ދަށުން ފުލުހުން މިސްބާހު ހައްޔަރު ކޮށްފައި ވަނީ ޑިސެމްބަރު މަހުގެ 13 ވީ ހުކުރު ދުވަހުގެ ރޭ އެވެ. މިސްބާހު ހައްޔަރު ކޮށްފައި ވަނީ ހުޅުމާލޭގައި ހުންނަ ނަލަ ޓެކްސީ ސެންޓަރު ކައިރިންނެވެ.

މިސްބާހު ހައްޔަރު ކުރުމުގެ ކުރިން ބުރާސްފަތި ދުވަހުގެ ވަގުތެއްގައި ފުލުހުން އޭނާގެ ކާރު ޓޯކުރާ މަންޒަރު ފެންނަ ވީޑިއޯ އެއް ވެސް ވަނޯ ސޯޝަލް މީޑިއާގައި ދައުރުވެފަ އެވެ.

ސަރުކާރުން ޓެކްސީގެ ހިދުމަތް ދިނުމަށް ތައްޔާރުވަމުންދާތީ އެކަމާ ކަންބޮޑުވުން ފާޅުކޮށް މުޒާހަރާކޮށްގެން ހައްޔަރުކުރި ޓެކްސީ ޑްރައިވަރުންގެ ތެރެއިން މިސްބާހު ފިޔަވާ ދެން ހައްޔަރު ކުރި އެހެން ޑްރައިވަރުން ވަނީ ދޫކޮށްލާފައެވެ.

ހުޅުމާލެއިން މާލެ އަންނަން އޮންނަ ހައިވޭ ސަރަހައްދުގައި މުޒާހަރާ ކުރި މައްސަލައިގައި ހައްޔަރުކުރި ޑްރައިވަރުންގެ ތެރެއިން އެންމެ ފަހުން ދޫކޮށްލި މުހައްމަދު ޝާމީން އާއި އަހުމަދު ޝަބީން ދޫކޮށްލީ ޝަރުތުތަކާއެކު އަންގާރަ ދުވަހު އެވެ.

ހައްޔަރުކޮށްފައިވާ ޑްރައިވަރުންނާއި ޓޯކޮށްފައިވާ ޓެކްސީތައް ވަގުތުން ދޫކޮށްލަން ޓެކްސީ ޑްރައިވަރުންގެ ޖަމިއްޔާއިން ވެސް ވަނީ ގޮވާލާފައެވެ.

މާލޭ ސަރަހައްދުގައި ޓެކްސީ ޑްރައިވަރުން އިހްތިޖާޖަށް ނުކުތީ ސަރުކާރުން ޓެކްސީގެ ޚިދުމަތާ ގުޅޭ ގޮތުން ގެންގުޅޭ ސިޔާސަތުތަކާ މެދު ހިތްހަަމަ ނުޖެހި، އެކަމުގެ ކަންބޮޑުވުންތައް ސަރުކާރުގެ ސަމާލު ކަމަށް ގެނައި ނަމަވެސް އެދެވޭ ހައްލެއް ނުލިބުމުންނެވެ.