"ސަރުކާރުން ޓެކްސީ ފްލީޓް ހަދަން އުޅެނީ ޑްރައިވަރުން ނިކަމެތި ކުރަން"
ސަރުކާރުން ޓެކްސީ ފްލީޓް ހެދުމަށް ކުރަމުންދާ މަސައްކަތް މިހާރުން މިހާރަށް ހުއްޓާލަން ޖެހޭ
ޕާކް ކޮށްފައިވާ ޓެކްސީ ތަކެއް
ރައީސް މުހައްމަދު މުއިއްޒުގެ ސަރުކާރުން ޓެކްސީ ފްލީޓެއް ހަދަން މަސައްކަތް ކުރަނީ ޑްރައިވަރުން އެކަހެރިކޮށް ނިކަމެތި ކުރަން ކަމަށް ޑްރައިވަރުންގެ ޖަމްއިއްޔާގެ ރައީސް އިބްރާހީމް ނިޔާޒް ހާމަ ކުރައްވައިފިއެވެ.
ނިޔާޒް ވަނީ 2014 ވަނަ އަހަރުން ފެށިގެން ޓެކްސީ ސެންޓަރުތަކުން ޓެކްސީތަކުން އަގު ނެގުމަށް މީޓަރު ތަޢާރުފް ކުރުމަށް އެއްބަސްވެފައި ވީނަމަވެސް މިހާތަނަށް ސަރުކާރުން އެކަންކޮށްފައި ނުވަނީ ކީއްވެތޯ ސުވާލު އުފައްދަވާފައެވެ.
އޭގެ އިތުރުން އެކަމުގެ ސާރވޭ ޑްރައިވަރުންގެ ބައިވެރިވުމާއެކު ދާދި ފަހުން ނިމިފައިވާއިރުވެސް ޓްރާންސްޕޯޓް މިނިސްޓަރު އަމީން އެކަމަށް މާ ބޮޑު ފަރުވާލެއް ބަހައްޓަވާފައި ނުވާކަން އޭނާ ވަނީ ފާހަގަ ކުރައްވާފައެވެ.
ނިޔާޒް ވަނީ ސަރުކާރުން ޓެކްސީ ފްލީޓް ހެދުމަށް ކުރަމުންދާ މަސައްކަތް މިހާރުން މިހާރަށް ހުއްޓާލުމަށް ވެސް ގޮވާލައްވާފައެވެ.
"ހަގީގަތުގައި ވެސް މިދާއިރާ ހަރުދަނާ ކުރުމުގެ ބަދަލުގައި ޓެކްސީ ފްލީޓެއް މަޖުބޫރުކޮށްގެން މިނިވަން ޑްރައިވަރުން އެއްފަރާތްކޮށް އެފަރާތްތަކުގެ ދިރިއުޅުން ނިކަމެތިކުރުމަށް ތިޔަ ގެންގުޅުއްވާ މަސައްކަތް މިހާރުން މިހާރަށް ހުއްޓާލުމަށް ގޮވާލަން!"
ނިޔާޒް ވަނީ ރައީސް މުހައްމަދު މުއިއްޒު ވެރިކަމަށް ގެނައުމުގައި މުހިންމު ދައުރެއް އަދާކޮށް ބުރަ ކޮށް މަސައްކަތް ކުރި ޓެކްސީ ޑްރައިވަރުންނަށް ހައްޤު މިންވަރަކީ މިއީތޯ ސުވާލު އުފައްދަވާފައެވެ.
ޒަމާނުއްސުރެ އަމިއްލަ ފަރާތްތަކުން ކުރަމުން އައި މަސައްކަތެއްގެ ގޮތުގައި އޮތް ޓެކްސީ ޚިދުމަތުގެ ތެރެއަށް ސަރުކާރުން ވަނުމަށް ކުރާ މަސައްކަތަކީ ޑްރައިވަރުން އެއްފަރާތް ކުރުމަށް ކުރަމުންދާ މަސައްކަތެއް ކަމަށް ނިޔާޒު ވަނީ ސިފަ ކުރައްވާފައެވެ.
އެކްސް ގައި ނިޔާޒު ލިޔުއްވި ޕޯސްޓެއްގައި "ޑްރައިވަރުންގެ މަސައްކަތް އެއްފަރާތްކުރުމުގެ ބަދަލުގައި އިންސާފުވެރިކަމާ އެކު ދާއިރާއަށް ހެޔޮ ބަދަލެއް ގެނައުން މާ ރަނގަޅު ވާނެ" ކަން ފާހަގަ ކުރައްވާފައިވެއެވެ.
