ރޭގަނޑުގެ ކެއުމަށް ފަސޭހައިން ތައްޔާރުކޮށްލެވޭ 5 ބާވަތެއް އެކުލެވޭ "ސެމަން" ރެސިޕީއެއް!

މަސައްކަތުގައި ބުރަކޮށް އުޅުއްވުމަށްފަހު ގެއަށް ވަޑައިގެން ރޭގަނޑުގެ ކެއުމަށް މީރު އަދި ސިއްޙަތަށް ފައިދާހުރި ކާއެއްޗެއް ތައްޔާރުކުރުމަކީ ގިނަ ބަޔަކު ބޭނުންވާނެ ގޮތެކެވެ. އެގޮތުން، ވަރަށް މަދު ވަގުތުކޮޅެއްގެ ތެރޭގައި ތައްޔާރުކޮށްލެއްވޭނެ "5-އިންގްރީޑިއަންޓް އެވްރީތިންގް ބޭގަލް ކްރަސްޓެޑް ސެމަން" އަކީ މިފަދަ ފަރާތްތަކަށް ވަރަށް ކަމުދާނެ ރެސިޕީއެކެވެ.

"އީޓިންގް ވެލް" ވެބްސައިޓުގައި ހިއްސާކޮށްފައިވާ މި ރެސިޕީއަކީ އެންމެ 20 މިނެޓުން ތައްޔާރުކޮށްލެވޭނެ ފަސޭހަ ކެއުމެކެވެ. ސެމަން އަކީ ޕްރޮޓީން އަދި ސިކުނޑީގެ ދުޅަހެޔޮކަމަށް މުހިންމު އޮމޭގާ-3 ފެޓީ އެސިޑް އިން މުއްސަނދިވެފައިވާ މަހުގެ ބާވަތެކެވެ. މިއީ ހަކުރުބަލި ހުންނަ ފަރާތްތަކަށްވެސް އެކަށީގެންވާ، ކާބޯހައިޑްރޭޓްސް މަދު ކެއުމެކެވެ.

ބޭނުންވާނެ ތަކެތި:

• 4 ސެމަން ފިލޭ (ހަން ނޮޅާފައި)
• 1/4 ޖޯޑު "އެވްރިތިންގް ބޭގަލް ސީޒަނިންގ" (ލޮނު ނުހިމެނޭ): މިއީ ދޮން ތިލަ، ކަޅު ތިލަ، ޕޮޕީ ސީޑްސް، އަދި ހިއްކައި ކުދިކޮށްފައި ހުންނަ ލޮނުމެދާއި ފިޔާ އެއްކޮށްގެން ތައްޔާރުކުރާ ރަހަމީރުކުރާ މިކްސްއެކެވެ. ފިހާރައިން ގަންނަން ނުލިބޭނަމަ، މި ކޮންމެ ބާވަތަކުން މޭޒުމަތީ 1 ސަމުސާ އެއްކޮށްލައިގެން ގޭގައި ފަސޭހައިން އަމިއްލައަށް ތައްޔާރުކޮށްލެއްވޭނެއެވެ. މީގައި ލޮނު ނުހިމަނާ ބޭނުންކުރަނީ ސޯސްގައި ވަކިން ލޮނު ހިމެނޭތީ، މުޅި ކެއުމުގައި ލޮނުގެ މިންވަރު އެކަށީގެންވާ ވަރެއްގައި ހިފެހެއްޓުމަށެވެ.
• 1 ޖޯޑު ގްރީކް ޔޯގަޓް (ފެޓް ނުހިމެނޭ، ޕްލެއިން)
• 2 ލޮނުމެދު (ކުދިކޮށް ކޮށާފައި ނުވަތަ ޗަސްކޮށްފައި)
• 1 ކިއުކަމްބާ (ކުދިކޮށް ކޮށާފައި)

(މީގެ އިތުރުން: 3 މޭޒުމަތީ ސަމުސާ ޒައިތޫނި ތެޔޮ، ލޮނު އަދި މުގުރި އަސޭމިރުސް)

ތައްޔާރުކުރާނެ ގޮތް:

1. ފުރަތަމަ ސެމަން ފިލޭތައް ޓިޝޫއަކުން ފުހެލައި ހިއްކާލެއްވުމަށްފަހު، ކުޑަ އަސޭމިރުސް ކޮޅެއް އޭގައި އުނގުޅާލައްވާށެވެ. ދެން ތަބަކަކަށް ނުވަތަ ތަށްޓަކަށް "އެވްރީތިންގ ބޭގަލް ސީޒަނިންގ" އެޅުއްވުމަށްފަހު، ސެމަން ކޮޅުތަކުގެ ބޭރުގައި މި ސީޒަނިންގ ރަނގަޅަށް ހާކާލައްވައި ކޯޓުކޮށްލައްވާށެވެ.
2. ތަވައަކަށް 2 މޭޒުމަތީ ސަމުސާ ޒައިތޫނި ތެޔޮ އެޅުއްވުމަށްފަހު މެދު ގިނީގައި ހޫނުކުރަށްވާށެވެ. އެއަށްފަހު ސެމަންކޮޅުތައް ތަވައަށް ލައްވައިގެން، 10 ނުވަތަ 12 މިނެޓު ވަންދެން (ރަނގަޅަށް ރޯފިލަންދެން) ފިހެލައްވާށެވެ. ފިހެވުމުން ކުޑަ ލޮނުކޮޅެއް މައްޗަށް ބުރުއްސާލއްވާށެވެ.
3. ސެމަން އާއެކު ކާން ބޭނުންކުރާ ސޯސް ތައްޔާރުކުރެއްވުމަށްޓަކައި، ކުޑަ ބޯތަށްޓަކަށް ޔޯގަޓް، ލޮނުމެދު، ކުޑަ ލޮނުކޮޅެއް، 1 މޭޒުމަތީ ސަމުސާ ޒައިތޫނި ތެޔޮ އަދި ކުޑަ އަސޭމިރުސްކޮޅެއް އެޅުއްވުމަށްފަހު އޮމާންވަންދެން ރަނގަޅަށް އެއްކޮށްލައްވާށެވެ. ދެން ކާން ބޭނުންކުރާ ތަބަކެއްގައި ނުވަތަ ތަށްޓެއްގައި މި ޔޯގަޓް ސޯސް ފަތުރާލައްވާށެވެ.
4. ކުދިކޮށް ކޮށާފައިވާ ކިއުކަމްބާގެ ތެރެއަށް ކުޑަ ލޮނުކޮޅެއް އަޅުއްވައި އެއްކޮށްލެއްވުމަށްފަހު 2 މިނެޓު ވަންދެން ބަހައްޓަވާށެވެ.
5. އެންމެ ފަހުން ޔޯގަޓް ސޯސްގެ މައްޗަށް ކިއުކަމްބާކޮޅު އެޅުއްވުމަށްފަހު އޭގެ މަތީގައި ސެމަން ފިލޭތައް އަތުރާލައްވާށެވެ.

ނިއުޓްރިޝަން މަޢުލޫމާތު

(ސަރވިންގ ސައިޒް: 1 ސާމަން ފިލޭ، ގާތްގަނޑަކަށް 1/3 ޖޯޑު ކިއުކަމްބަރ އަދި 1/4 ޖޯޑު ސޯސް)

• ކެލޮރީސް: 429
• ފެޓް: 21g
• ސެޗުރޭޓެޑް ފެޓް: 4g
• ކޮލެސްޓްރޯލް: 109mg
• ކާބޯހައިޑްރޭޓްސް: 9g
• ޖުމްލަ ހަކުރު: 3g (އިތުރުކޮށްފައިވާ ހަކުރު: 0g)
• ޕްރޮޓީން: 36g
• ފައިބަރ: 4g
• ސޯޑިއަމް: 448mg
• ޕޮޓޭސިއަމް: 785mg