އޮރެންޖު ޖޫސްތަ؟ އޮރެންޖުތަ؟ ރަނގަޅީ ކޮން ގޮތެއް؟

އޮރެންޖަކީ ގިނަ އަދަދަކަށް ވިޓަމިން އެކުލެވޭ މޭވާއަކަށް ވީނަމަވެސް، އޭގެ ޖޫސް ބުއިމަކީ ލޭގައި ހަކުރު ހުންނަ މިންވަރު ކުއްލިއަކަށް މަތިކޮށްލާ ކަމެއް ކަމަށް މާހިރުން އިންޒާރު ދެއެވެ. ގަވާއިދުން މިގޮތަށް ލޭގެ ހަކުރު މަތިވުމުގެ ސަބަބުން، ދުވަސްތަކެއް ފަހުން އިންސިއުލިން ރެސިސްޓެންސް އުފެދި، ހަކުރު ބައްޔާއި، ހިތުގެ ބަލިތަކާއި އަދި މާބޮޑަށް ފަލަވުމުގެ ފުރުސަތު ބޮޑުވެގެންދެ އެވެ.

ނަމަވެސް، ދާދި ފަހުގެ ދިރާސާތަކުން ދައްކާގޮތުގައި، އޮރެންޖު ޖޫހުގައި ހަކުރު ގިނަވި ނަމަވެސް، ކޮންމެ ދުވަހަކު ބޯލާ ކުޑަ ބިއްލޫރި ތަށީގެ ޖޫހުން ސިއްހީ ގިނަ ފައިދާތަކެއް ލިބިގެންދެ އެވެ.

އޮރެންޖު ޖޫހާ މެދު ކުރެވޭ ކުށްހީ

ގިނަ އަދަދެއްގެ ބަޔަކު ބައިވެރިކޮށްގެން ދިގު މުއްދަތަކަށް ހެދިފައިވާ ދިރާސާތަކުން ދައްކާގޮތުގައި، ސިޓްރަސް މޭވާ (އޮރެންޖު، ލުނބޯ ފަދަ ތަކެތި) ގިނައިން ކާ މީހުންނަށް ހިތުގެ ބަލިތަކާއި ސްޓްރޯކް ޖެހުމުގެ ފުރުސަތު ކުޑައެވެ. އެހެން ނަމަވެސް، މި ދިރާސާތަކުގައި ބޮޑަށް ބަލާފައިވަނީ މޭވާ ކާ މިންވަރަށެވެ. މޭވާގެ ޖޫސް ބުއިމާއި މޭވާ މުޅިން ކެއުމާ ދެމެދު ހަށިގަނޑަށް ކުރާ އަސަރުގައި ބޮޑު ތަފާތެއް ހުރެ އެވެ.

އިމްޕީރިއަލް ކޮލެޖް ލަންޑަންގެ ނިއުޓްރިޝަން ސައިންޓިސްޓެއް ކަމަށްވާ ފެޑެރީކޯ އަމާޓީ ބީބީސީ އަށް ކިޔައިދެއްވި ގޮތުގައި، އެންމެ ފުރަތަމަ ތަފާތަކީ މޭވާ ކާން ހޭދަވާ ވަގުތެވެ. އާދައިގެ ޖޫސް ތައްޓެއް ތައްޔާރުކުރުމަށް ބޭނުންވާ ދެތިން އޮރެންޖު ކައި، ހަފާ، ދިރުވުމަށް ވަގުތު ނަގާނެއެވެ. ނަމަވެސް އެ މިންވަރުގެ ޖޫސް ތައްޓެއް މަދު ސިކުންތުކޮޅެއްގެ ތެރޭގައި ބޮއެ ހުސްކޮށްލެވެ އެވެ.

މީގެ އިތުރުން، މުޅި މޭވާގައި ގިނަ އަދަދަކަށް ފައިބަރ އެކުލެއެވެ. މިއީ ގޮހޮރުގެ ދިރުންތަކަށް ކާނާ ފޯރުކޮށްދީ، ހިތުގެ ބަލިތަކާއި ގޮހޮރުގެ ކެންސަރުން ރައްކާތެރިވުމަށް އެހީތެރިވެދޭ މާއްދާއެކެވެ. ފައިބަރުގެ ސަބަބުން ލޭގެ ތެރެއަށް ހަކުރު ދައުރުވާ މިންވަރު ލަސްކޮށްދެއެވެ. ނަމަވެސް އޮރެންޖު ޖޫސް ތައްޔާރުކުރާއިރު މި ފައިބަރުތައް ވަކިވެގެންދެ އެވެ.

ނަތީޖާއެއްގެ ގޮތުން، އޮރެންޖެއް ކެއުމުން ލޭގެ ހަކުރު މަތިވަނީ ވަރަށް ލަހުންނެވެ. އެކަމަކު ޖޫސް ބުއިމުން، ފައިބަރުގެ އެހީތެރިކަމެއް ނެތި ހަކުރުތައް ވަގުތުން ހަށިގަނޑަށް ދަމައިގަނެ، ލޭގެ ހަކުރު ވަރަށް އަވަހަށް މަތިކޮށްލައެވެ. އާންމު ސިއްހަތު ރަނގަޅު މީހުންނަށް އިންސިއުލިންގެ އެހީގައި މިއީ މައްސަލައަކަށް ނުވި ނަމަވެސް، ހަކުރު ބަލި ހުންނަ މީހުންނަށް މިއީ ރަނގަޅު ކަމެއް ނޫނެވެ.

އަމާޓީ އިތުރަށް ވިދާޅުވި ގޮތުގައި، އޮރެންޖު ޖޫހަކީ ހަމައެކަނި ހަކުރެއް ނޫނެވެ. އޭގައި ވިޓަމިން ސީ ފަދަ ބޭނުންތެރި ނިއުޓްރިއެންޓްސް އެކުލެއެވެ. އެހެންކަމުން ހަމައެކަނި ހަކުރަށް ބަލައި ބިރުގަތުމުގެ ބަދަލުގައި، މުޅި ކެއުމުގެ ނިޒާމަށް ބަލައިގެން އޭގެ ބޭނުން ހިފުން މުހިންމެވެ.

ހިތާއި ސިކުނޑީގެ ދުޅަހެޔޮކަންގިނައިން އޮރެންޖު ޖޫސް ބުއިމުން ބައެއް ފައިދާތައް ކުރާކަމުގެ ހެކިތައް ފެންނަން އެބަހުއްޓެވެ. ދިރާސާތަކުން ދައްކާގޮތުގައި ދުވާލަކު 500 މިލިލީޓަރުގެ އޮރެންޖު ޖޫސް ބޯ މީހުންގެ ލޭގެ ހަކުރު ދަށްވެ، އިންސިއުލިންގެ މަސައްކަތް ރަނގަޅުވެ، އަދި ހަށިގަނޑަށް ނުރައްކާތެރި ކޮލެސްޓްރޯލް (އެލްޑީއެލް) ދަށްވާކަން ފާހަގަކުރެވިފައިވެ އެވެ. މިއީ ހިތުގެ ދުޅަހެޔޮކަން ރަނގަޅުކޮށްދޭ ކަންކަމެވެ.

އެންމެ ރަނގަޅީ އޮރެންޖު ކެއުންތަ؟

ކާނާގެ މާހިރުން އިލްތިމާސްކުރައްވަނީ ޖޫހުގެ ބަދަލުގައި މޭވާ އޮތް ގޮތަށް ކެއުމަށެވެ. އެއީ އޭގައި ފައިބަރާއި ފްލޭވަނޮއިޑްސް ފަދަ ސިއްހީ ފައިދާ ބޮޑު މާއްދާތައް ގިނަވުމުންނެވެ. އޮރެންޖެއް ކާލުމުން އޭގައިވާ ވިޓަމިން ސީ އާއި އެހެނިހެން މާއްދާތައް ފައިބަރުގެ ތެރޭގައި ރައްކާތެރިކަމާއެކު ހުރެއެވެ. ނަމަވެސް ޖޫސް ގިރުމުން މި މާއްދާތައް ވަޔަށް ހުށަހެޅި، އޭގެ ބާރު ކެނޑިގެންދެއެވެ.

އަދި ފައިބަރުގެ ސަބަބުން މި ބޭނުންތެރި މާއްދާތައް ގޮހޮރުގެ ތިރީ ބަޔާ ހަމައަށް ފޯރުކޮށްދީ، ގޮހޮރުގައިވާ ރަނގަޅު ބެކްޓީރިއާތަކަށް އޭގެ ފައިދާ ލިބިދެއެވެ.

ޖޫސް ބޯން ބޭނުން ނަމަ، ބާޒާރުން ގަންނަން ލިބޭ ޕެކެޓް ޖޫހަށްވުރެ ގޭގައި ތައްޔާރުކުރާ ތާޒާ ޖޫސް މާ ރަނގަޅެވެ. ފެކްޓްރީތަކުގައި އުފައްދާ ޖޫސް ހޫނުކޮށް (pasteurised) ހެދުމުގެ ސަބަބުން އޭގައިވާ ބައެއް ވިޓަމިންތައް ނެތިގެންދެއެވެ.

ހެނދުނުގެ ނާސްތާ ގައި ފިނި އޮރެންޖު ޖޫސް ތައްޓެއް ބޯލަން ބޭނުންވާ މީހުން ކަންބޮޑުވާކަށް ނުޖެހެއެވެ. އަމާޓީ ވިދާޅުވާ ގޮތުގައި، އެއްވެސް އިތުރު ހަކުރެއް ނުވަތަ ފޮނިކުރާ އެއްޗެއް ނާޅާ ތައްޔާރުކޮށްފައިވާ 100 އިންސައްތަ ސާފު އޮރެންޖު ޖޫސް ހަފުތާއަކު ތިން ހަތަރު ފަހަރު ބުއިމަކީ މައްސަލައެއް ނޫނެވެ.