ރާއްޖޭ ގައި އުފަންވާ ކޮންމެ 1,000 ކުއްޖަކުން 42 ކުދިންނަކީ އުފެދުމުގައި އެކި ކަހަލަ އައިބުތައް ހުންނަ ކުދިން: ދިރާސާ

ރާއްޖޭ ގައި ދިރި ތިއްބާ އުފަންވާ ކޮންމެ 1,000 ކުއްޖަކުން 42.4 ކުދިންނަކީ އުފަންވާއިރު އެކި ކަހަލަ އައިބުތައް ހުންނަ ކުދިން ކަމަށް ދިރާސާ އަކުން ހާމަ ވެއްޖެ އެވެ.

ދިރާސާ ގެ މައުލޫމާތު ބިނާ ކޮށްފައި ވަނީ  2016 ވަނަ އަހަރުން ފެށިގެން 2024 ވަނަ އަހަރުގެ ނިޔަލަށް، ސަރުކާރުގެ މައި ހޮސްޕިޓަލް ކަމުގައިވާ އިންދިރާ ގާންދީ މެމޯރިއަލް ހޮސްޕިޓަލް (އައި.ޖީ.އެމް.އެޗް) ގައި ދިރި ތިއްބާ އުފަންވި ކުދިންގެ މައުލޫމާތުގެ މައްޗަށެވެ.

މޯލްޑިވްސް ނޭޝަނަލް ޖާނަލް އޮފް ރިސާޗް ގައި ޝާއިއު ކޮށްފައިވާ މި ދިރާސާގައި ފާއިތުވި 9 އަހަރުގެ ތެރޭގައި އެ ހޮސްޕިޓަލަށް އުފަންވި ހުރިހާ ކުދިންގެ މައުލޫމާތުގެ މައްޗަށް ބަލާފައިވާ ކަމަށް ބުނެފައިވެ އެވެ. ބަނޑަށް މަރުވާ ކުދިންނާއި ބައިގެންދާ ކުދިން މި ދިރާސާ ގައި ނުހިމެނޭ ކަމަށް ވެސް ބުނެފައިވެ އެވެ. 

މި މުއްދަތުގެ ތެރޭގައި ދިރިތިބި ޖުމްލަ 17,188 ކުދިން އުފަންވެފައިވާއިރު، މީގެ ތެރެއިން 729 ކުދިންނަކީ (4.24 އިންސައްތަ) އުފަންވި އިރު އެކި ކަހަލަ އައިބުތައް ހުރި ކުދިން ކަމަށް ދިރާސާ ގައި ވަނީ ފާހަގަ ކޮށްފަ އެވެ. އަދި ޖުމްލަ 1,215 ބާވަތުގެ އައިބެއް ފާހަގަކުރެވިފައިވާ ކަމަށް ވަނީ ބުނެފަ އެވެ.

އައިބު ހުރި ކުދިންގެ ތެރޭގައި ހިމެނެނީ 313 އަންހެން ކުދިންނާއި (43 އިންސައްތަ)، އެއްމާބަނޑު ދެބެއިންގެ ގޮތުގައި އުފަންވި 16 ކުދިން ކަން ދިރާސާ ގައި ފާހަގަ ކޮށްފައިވާއިރު، ފާހަގަ ކުރެވުނު އައިބުތަކުގެ ތެރެއިން 312 އައިބެއް (26 އިންސައްތަ) ފެނިފައި ވަނީ ދުވަސް ނުފުރާ ވިހާފައިވާ ކުދިންގެ ކިބައިން ކަމަށް ވެސް ބުނެފައިވެ އެވެ.

އުފަންވާއިރު އައިބު ހުރި ކުދިން ވިހެއި 710 މައިންގެ ތެރެއިން 107 މައިންނަކީ (15 އިންސައްތަ) މާބަނޑު ދުވަސްވަރު ހަކުރު ބަލި  ހުރި މީހުންކަން ފާހަގަ ކޮށްފައިވެ އެވެ. އައިބު ހުރި ކުދިންގެ ބަރުދަން އެވްރެޖްކޮށް ހުރީ 2,862 ގްރާމްގައި ކަމަށާއި އަދި ބަނޑަށްވީ މުއްދަތަކީ އެވްރެޖްކޮށް 37.5 ހަފުތާ ކަމަށް ވެސް ދިރާސާގައި ބުނެ އެވެ.

ކުދިންގެ ސިއްހީ ހާލަތަށް ބަލާއިރު، 24 ކުއްޖެއްގެ (3.3 އިންސައްތަ) ހަކުރު ދަށްވެފައިވާ ކަމަށާއި، 21 ކުއްޖެއްގެ (2.9 އިންސައްތަ) ހަށިގަނޑުގެ ހޫނުމިން ވަނީ ދަށުގައި ކަމަށާއި، އަދި ހޮސްޕިޓަލުން ދޫކޮށްލުމުގެ ކުރިން 27 ކުއްޖަކު (3.7 އިންސައްތަ) ވަނީ މަރުވެފައިވާ ކަމަށް ބުނެފައިވެ އެވެ.

މިގޮތަށް މަރުވި ކުދިންގެ ތެރެއިން އެންމެ ގިނައީ ފުއްޕާމޭ ރަނގަޅަށް ނުއުފެދުމުގެ ސަބަބުން މަރުވި ކުދިން (ޖުމްލަ 6 ކުދިން، މަރުވި ކުދިންގެ 22 އިންސައްތަ) ކަމަށާއި މީގެ އިތުރުން ދެ ކުއްޖަކު މަރުވީ ޑައިފްރަމެޓިކް ހާނިއާ ގެ ސަބަބުން ކަމަށް ބުނެފައިވެ އެވެ. އަދި އަނެއް ދެ ކުއްޖަކު މަރުވީ ޕޮޓާސް ސިންޑްރޯމް ބަލީގައި ކަމަށާއި މީގެ އިތުރުން 82 ކުއްޖަކަށް (11.2 އިންސައްތަ) ނޭވާލުމަށް އެހީތެރިވެދޭ "ބޭގް އެންޑް މާސްކް ވެންޓިލޭޝަން" ދޭން ޖެހުނު ކަމަށް ވަނީ ބުނެފަ އެވެ.

މި ދިރާސާއިން ދައްކާގޮތުގައި، އައިބުތަކުގެ ތެރޭގައި ނިސްބަތުން ބޮޑެތި އައިބުތަކާއި ކުދި އައިބުތައް ހިމެނޭ އިރު އެންމެ އާންމުކޮށް ފާހަގަކުރެވިފައި ވަނީ ލޭދައުރުކުރާ ނިޒާމުގެ އައިބުތައް (28.7 އިންސައްތަ) ކަމަށް ބުނެފައިވެ އެވެ. މި ބާވަތުގެ އައިބުތައް ކޮންމެ 1,000 ކުއްޖަކުން 20 ކުދިންގެ ކިބައިން ފެންނަ ކަމަށް ފާހަގަ ކޮށްފައި އެވެ.

މި ދިރާސާ އިން އެނގިގެންދިޔަ ގޮތުގައި އުފަންވާ އިރު ހުންނަ އައިބުތަކަކީ ރާއްޖޭގައި އާންމު ކަމެކެވެ. އަދި މީގެ ތެރެއިން ނޭވާލާ ނިޒާމުގެ އައިބުތަކަކީ އެންމެ ގިނަ ކުދިން މަރުވާން މެދުވެރިވި ސަބަބު ކަމަށް ބުނެފައިވެ އެވެ.