ދޫނިތަކުގެ ކޯޅުން ބޮޑުވެ ދޫނިތައް ތަޅާފޮޅަނީ

ޕީއެންސީގެ އިސް ސަފުން ބުނަނީ މިފަހަރު ވޯޓުލާންވާނީ ޕީއެންސީއަށް ކަމަށެވެ. ޚާއްޞަކޮށް މުއިއްޒުވެސް ވިދާޅުވަމުން ގެންދަވަނީ ކައުންސިލްތައް ބޮޑުތަނުން ނަގަން ޖެހޭ ކަމަށެވެ. ޕީޖީ ލީޑަރ ފަލާހު ވިދާޅުވަމުން ގެންދަވަނީ ބޮޑުތަނުން ކާމިޔާބު ވާނެ ކަމަށާއި އިދިކޮޅު އެމްޑީޕީ ފުހެލާނެ ކަމަށެވެ.

އެއަޒުމުގައި އެރޫހުގައި ޕީއެންސީން މިފަހަރު ކުރާ ކެމްޕެއިންގެ ރަމްޒީ ނަމަކީ ދޫންޏެވެ. އަބަދުވެސް ކޮޕީކުރުމުގެ ފަލްސަފާއެއް ގެންގުޅެމުން އަންނަ ޕީއެންސީން މިފަހަރު ވެސް ބޭނުން ކުރަން ފެށީ އެއުކުޅެވެ. އެމްޑީޕީން ތިލަފަތަށް ވޯޓު ދޭށޭ ބުނާ ބުނުން ނަކަލުކޮށް ދޫންޏަށް ވޯޓު ދިނުމަށް ދަނީ ގޮވާލަމުންނެވެ.

ޕީއެންސީގެ ލޯގޯގެ ގޮތުގައި ހުންނަ ދޫންޏަށް ރަމްޒުކޮށް ދޫންޏަށް ވޯޓު ހޯދަން ގިނަ މަސައްކަތްތަކެއް ޕީއެންސީން ކުރަމުންދާއިރު، ޕީއެންސީގެ ދޫނިތަކުގެ މެދުގައި މުޅިން އެހެން ކޯޅުމެއް ވަނީ ފެށިފައެވެ. އެކޯޅުން އިންތިހާއަށް ބޮޑުވެ އެއް ދޫނި އަނެއް ދޫންޏަށް އަރައިރުންވާން ފަށައިފިއެވެ. އިސް ސަފުގައި ތިބި މައިދޫނިތަކާ ނުލައި މެދުފަންތީގެ ދޫނިތަކާއި އާދައިގެ ދޫނިތަކުގެ މެދުގައި ބޮޑު ކުސަ އެއް ދަމަން ފަށައިފިއެވެ. އެއްދޫނި އަނެއް ދޫންޏަށް މޫނު އަނބުރާލާފައިވާއިރު ބައެއް ދޫނިތައް ވަނީ ތުންގަނޑު ބިމަށް ހަރާލާފައެވެ. ހިހޫތަނުން ކެވޭގޮތަށް މޮޅު ލިބޭ ދޫނިތައް ހާ އުފަލުގައި އުޅޭތަން ފެނިގެންނެވެ. އަލަށް ޒިޔާރަތް ކުރާ ދޫނިތަކާއި އޮޅުވޭތޯ ގެނެސްގެން ގެންގުޅޭ ދޫނިތައް އުޅޭ ގޮތުން ހިތްހަމަ ނުޖެހިފައި ތިބި ދޫނިތަކެވެ.

ޕީއެންސީގެ ވިސްނުމަކީ ދޫނިތަކުގެ ތާއީދެއް ނޫނެވެ. ވޯޓުން މޮޅުވުމުގައި ނުވަތަ ކައުންސިލް އިންތިޚާބު ކާމިޔާބު ކުރާކަށް އެވެރިންނަކަށް އެދޫނިތަކުގެ ވޯޓެއް މުހިއްމެއް ނޫނެވެ. ޚާއްޞަކޮށް ތިލަފަތައް ވެސް ނިސްބަތް ނުވާ އަދި ދޫނި އައިނުގައި ވެސް ނުހިމެނޭ މީހުންގެ ތާއީދެއް އެމީހުންގެ ރުހުމެއް ޕީއެންސީއަކަށް ބޭނުމެއް ނޫނެވެ. ޕީއެންސީގެ ހަމަޔަކީ ގަދަ ބަދަވި ކަމެވެ. ވެރިކަމުގައި މިތިބީ ތިމަންމެންނެވެ. ވޯޓުދޭން މަޖުބޫރުވާނީ ތިމަންމެންނަށެވެ. ވޯޓު ދިނުން ނޫން ގޮތެއް ނޯންނާނެ ކަމަށެވެ. ނުލައިފިނަމަ ދެންވާނެ ހިތާމަވެރި ގޮތާމެދު ވިސްނާލާފައެވެ. ޕްރޮމޯޝަން ނުލިބިދާނެތީއެވެ. އިންޓަރވިއު ކުރެވުނު ވަޒީފާ ނުލިބިދާނެތީއެވެ. އަމުދުން ވަޒީފާގަނޑު ގެއްލި އާއިލާ ބިކަވާނެތީއެވެ.

އޭގެ ކޮޅުމަތި ވެސް ހިސާބަކަށް ދަނީ ދައްކަމުންނެވެ. ކަންވެދާނޭ ގޮތުގެ ދިރިހުރި މިސާލުގެ ގޮތުގައެވެ. އޭގެ ބައެއް އަލާމާތްތަކުގެ ގޮތުގައެވެ. ކެނޑުމުގެ ކުރިން ވަކަރަށް ޖަހާލުމުގެ ނިޔަތުގައެވެ. އޭގެ އެއްކަމަކީ ރަށްރަށުގައިތިބި މީހުންގެ ވަޒީފާގެ މާހައުލު ބަދަލު ކޮށްލުމެވެ. ވަޒީފާ އަދާކުރަމުންދިޔަ ތަން އެހެންތާކަށް ބަދަލުކޮށްލުމެވެ. ރަށުގައި ހުރެ މުސްކުޅި ބަލި މަންމަ ބެލުމަށްޓަކައި ލިބޭ ކުޑަ މުސާރައަކަށް ވެސް ރަށުގައި ހުރި މީހާ ދުރު އެހެން ރަށްރަށަށް ފޮނުވާލަމުންނެވެ. ކުއްލިއަކަށް ދޭ ނޯޓިސްއަކުންނެވެ. ސީދާ ސީދަލަށް ނުބުންޏަސް އޭނާގެ އިދިކީލި ޚިޔާލުގެ ސަބަބުން އަޅާ އިންޒާރުގެ ފިޔަވަޅަކަށެވެ.

އަނެއް ބަޔަކީ ޕްރޮމޯޝަނެވެ. ދޫނިތަކުގެ މެދުގައި ދެވޭ ޕްރޮމޯޝަނެވެ. ރަށުގެ ވަޒީފާގައި ތިބި މީހުންނަށް ދޭނެ ކަމަށް ބުނެފައި އޮތް ޕްރޮމޯޝަންގެ ވާހަކަ ހިންދާލުމެވެ. އެޕްރޮމޯޝަން ނުލިބިދާނެ ކަމުގެ ކޮޅުމަތި އެދޫނިތަކަށް ދައްކާލުމެވެ. ޕްރޮމޯޝަން ބޭނުންނަމަ އެ ދޫންޏެއްގެ އުޅުން އިސްލާހު ކުރުމަށް މަޖްބޫރު ކުރުމެވެ.

އެންމެ ހައްސާސް ބަޔަކީ އަލަށް ވަޒީފާތަކަށް ގެނެވޭ ދޫނިތަކާއި ވަޒީފާތަކުން ވަކިކުރެވޭ ދޫނިތަކެވެ. ރަށްރަށުގެ ފެނަކައަށް އިންތިހާއަށް ބައިބަޔަށް ދޫނިތައް އެދަނީ ގެންނަމުންނެވެ. ތިލަފަތުގެ މެދުގައި އިށީނދެތިބި ދޫނިތަކާއި ޔާމީންގެ ހުސްގޮނޑި އުފުލަން އުޅުނު ދޫނިތަކެވެ. ސުމާރެއް ނެތި އެދޫނިތައް ޕީއެންސީގެ ދޫނިބައިގަނޑުގެ ތެރެއަށް އެދަނީ ވަންނަމުންނެވެ. ނުވަތަ ވައްދަމުންނެވެ. ހަމަ އެއާ އެއްވަރަށް ޕީއެންސީ ތެރޭގައި ތިބި ބައެއް ދޫނިތައް އެދަނީ ބާކީވަމުންނެވެ. ދޫނި އައިނުން ބޭރުކުރަމުންނެވެ.

ކޮންމެއަކަށް ކުރިއަށްއޮތް އިންތިޚާބު އަތްދަމާލީމާ އަތްޖެހޭ ހިސާބުގައި އޮތްއިރު ޕީއެންސީ ތެރޭގައި މި ބުނެވުނު ރޫހު ވަރަށް ބޮޑަށް ގަދަވެއްޖެއެވެ. ޚާއްޞަކޮށް ރަށްރަށުގައެވެ. ވައިބަރ ގުރޫޕްތަކުގައި ދެކެވޭ ވާހަކަތައް އެގުރޫޕްތަކުން ބޭރުވާން ފަށައިފިއެވެ. ބޮޑުންނަށް ފޮނުވާ ސްކްރީންޝޮޓްތައް ހާމަވާން ފަށައިފިއެވެ. މަށަށް ދޭން ބުނި ވަޒީފާ މަށަށް ނުލިބިގެންނެވެ. މަގޭ ޕްރޮމޯޝަން ހިފަހައްޓާފައި އޮވެގެންނެވެ. މަރުދިން އަހަރެމެން ތިއްބާ އިދިކޮޅުގައި ތިބި މީހުން ގެނެސް ބޮޑު މުސާރަ ދޭތީއެވެ. ދެބަހެއް ބުނެލާ އާއިލާތަކުގެ އެންމެންނަށް ވަޒީފާ ހަމަޖެހޭތީއެވެ. މި ކޯޅުމުގައި އެއްދޫނި އަނެއް ދޫންޏަށް އެވަނީ އަރާރުން ބޮޑުވެފައެވެ. ތަޅާފޮޅުން އިތުރުވެ ކަރުމާރުހިފަން އެވަނީ ފަށާފައެވެ.