އަމާނާތްތެރި ޚިދުމަތް، މާލޭ ސިޓީގެ ވިންދު މެނިފެސްޓޯ އިފްތިތާހް ކޮށްފި

އަމާނަތްތެރި ޚިދުމަތް، މާލެ ސިޓީގެ ވިންދުގެ ނަމުގައި އެމްޑީޕީން ލޯކަލް ކައުންސިލް އިންތިޚާބަށް ތައްޔާރުކުރި މާލޭގެ މެނިފެސްޓޯ އިފުތިތާހުކޮށްފި އެވެ.

މި މެނިފެސްޓޯ އިފްތިތާހު ކުރީ އާދިއްތަ ދުވަހުގެ ރޭ އަރޓިފިޝަލް ބީޗްގައި އެމްޑީޕީން ބޭއްވި ޚާއްސަ ރަސްމިއްޔާތެއްގަ އެވެ. 

މި މެނިފެސްޓޯ ބިނާ ވެފައިވަނީ މައިގަނޑު ތިން ދާއިރާއަކަށެވެ.

އެއީ ދިރިއުޅުމުގެ ފުރިހަމަ އުފާ ރައްޔިތުންނަށް ހޯދައިދިނުމަށް ފަހި ދިރިއުޅުން، ވިޔަފާރީގެ ފޮނި މީރުކަން ކަށަވަރުކޮށްދިނުމަށް ވިޔަފާރިއަށް ފަހި، އަދި ރައްޔިތުންގެ ބާރުވެރިކަން ޔަގީންކޮށްދިނުމަށް ރައްޔިތުންނަށް އާރު އެވެ. 

އެގޮތުން ފަހި ދިރިއުޅުމުގެ ތެރެއިން މާލެސިޓީގެ އިހުތިސާސްގެ ތެރޭގައި ހުޅުމާލެ، ގުޅީފަޅު، ގިރާވަރުފަޅު އަދި އުތުރުތިލަފަޅު ހިމަނައި އެސަރަހައްދު ތަކުން ދޫކޮށްފައި ހުރި ގޯތިތައް އަވަހަށް ހަވާލުކޮށް، އަސާސީ ޚިދުމަތްތައް ލިބޭނޭ ހެން ހެދުމާއި، އާބާދު ކުރުމަކީ މުހިންމު އަމާޒެއް ކަމަށް މެނިފެސްޓޯގައި ބުނެފައިވެ އެވެ. މީގެ އިތުރުން ބޯހިޔާވަހިކަމުގެ ސްކީމްތަކުން ގޯއްޗާއި، ފްލެޓު ލިބުނު ފަރާތްތަކުގެ ގާނޫނީ ހައްގުތައް ކަށަވަރުކޮށްދީ ދެމެހެއްޓެނިވި މާލީ ނިޒާމެއްގެ ތެރެއިން ގެދޮރު ބިނާ ކުރުމަށް ރިވޯލްވިންގ ހައުސިން ފަންޑެއް އުފެއްދުމާއި، ސިނަމާލެ ފްލެޓުތައް އަލުން ތަރައްގީ ކުރުމުގެ މަސައްކަތް ކުރިއަށް ދާނެ ކަމަށެވެ.

ހަމައެއާއެކު ބާވެފައިވާ އިމާރާތްތައް ނައްތާލުމުގައި ލުއިފަސޭހަ ގޮތްތަކެއް ހަމަޖައްސައިދީ ބޯހިޔާވަހިކަމުގެ ގައުމީ ނިންމުންތަކުގައި މާލެސިޓީ ކައުންސިލްގެ ދައުރު މިހާރަށް ވުރެ ބޮޑަށް ފުޅާ ކުރުމަށް ރޭވިފައިވާ ކަމަށް ވެސް މެނިފެސްޓޯގައި ބުނެފައިވެ އެވެ. 

މެނިފެސްޓޯގައި ވާ ގޮތުން، މާލޭގެ މަގުތައް ޒަމާނީ ފެންވަރަށް ތަރައްގީކޮށް ޕާކިންގެ މައްސަލައަށް ހައްލު ހޯދުމަށް މަލްޓިޕަރޕަސް ޕާކިން އިމާރާތްތަކާއި ގޭދޮށު ޕާކިން ތައާރަފް ކުރުން ހިމެނޭ ކަމަށެވެ. އަދި ހަނި ގޯޅިތައް ހިތްފަސޭހަ ތަންތަނަށް ހެދުމާއި، ޒަމާނީ ބަސް ހުއްޓިތަކާއި، ޓްރެފިކް ލައިޓްތައް ހަރު ކުރުމުގެ އިތުރުން އުޅަނދުތައް ގެންގުޅެވޭނެ ވަކި މިންވަރެއް ކަނޑައަޅައި ތަންފީޒު ކުރާނެ ކަމަށެވެ.  

އޭގެއިތުރަށް، ދީނީ ޚިދުމަތް ފުޅާ ކުރުމުގެ ގޮތުން މިސްކިތްތައް ޒަމާނީ ފެންވަރަށް ތަރައްގީ ކުރުމާއި، ބޮޑެތި މީހުންގެ ގުރުއާން ކްލާސްތަކާއި، ހާފިޒުން އުފެއްދުމުގެ ގުރުއާން ކްލާސްތަކާއި، ދީނީ ހޭލުންތެރިކަން އިތުރުކޮށް ތަފާތު މުބާރާތްތައް ބާއްވާނެ ކަމަށެވެ.

މެނިފެސްޓޯގައި ބުނީ، ސާފު މާލެސިޓީއަކަށް ހެދުމަށް ކުނި ނެގުމުގެ މަސައްކަތް ފުޅާ ކުރެވޭނެ ކަމަށާއި، ކުނީގެ މައްސަލައަށް ރައްޔިތުން ހޭލުންތެރި ކުރުވައި ޚިދުމަތްދޭ ފަރާތްތަކަށް ހުރި ހުރަސްތައް ނައްތާލާނެ ކަމަށެވެ.

ވިޔަފާރިވެރިންނަށް ފަހި ފުރުސަތުތައް ހޯދައިދޭނެކަން ފާހަގަކޮށް މެނިފެސްޓޯގައި ބުނީ، އެސްއެމްއީ ހަބާއި، ސްޓާޓާ ހަބް ގާއިމްކޮށް ޒުވާނުންނާ އަންހެން ވިޔަފާރިވެރިންނަށް އަމާޒުކޮށްގެން ބިޒްނަސް އެކްސްޕޯތައް ކުރިއަށް ގެންދާނެ ކަމަށެވެ. އަދި މާލެސިޓީ ގައި ފަތުރުވެރިކަން ފުޅާ ކުރުމަށްޓަކައި ވިލިމާލެ ލޯކަލް ޓޫރިޒަމަށް ޚާއްސަ ކުރާނެ ކަމަށެވެ. 

މީގެ އިތުރުން ކެޓްޝެލްޓަރގެ ހިންގުން ސިޓީ ކައުންސިލްގެ ދަށަށް ބަދަލު ކުރާނެ ކަމަށް މެނިފެސްޓޯގައި ބުނެފައިވެ އެވެ. 

ވަނީ، އަދި ވަށާޖެހޭ ގޮތަށް މުޅި މާލެސިޓީގެ ތަރައްގީއަށާއި، މައްސަލަތަކަށް ހައްލު ހޯދައިދޭނެ ކަމަށް ބުނެފައި އެވެ. އިތުރު ހަރަކާތްތައް ކުރިއަށް ގެންދިއުމާއި، އެންމެނަށް ހަމަހަމަ ފުރުސަތު ފަހިކޮށްދިނުމަށް ވެސް އެ މެނިފެސްޓޯގައި އެމްޑީޕީން ހިމަނާފައިވެ އެވެ. 

އެގޮތުން އަލަތު ކައިވެނީގެ ވަލީމާ ހިލޭ ބޭއްވޭނެ އިންތިޒާމާއި، ތަން ހަމައްޖައްސައިދިނުމުގެ މަސައްކަތާއި، ގައުމީ ސަގާފީ ހަރަކާތްތައް ކުރިއަށް ގެންދިއުމާއި، ހުރިހާ އުމުރުފުރައަކަށް އަމާޒުކޮށްގެން ކުޅިވަރު ހަރަކާތްތައް ހިންގުމާއި، ނަފްސާނީ ދުޅަހެޔޮ ކަމާއި، ކިޔަވާ ކުދީންނަށް ޚާއްސަ ސްޓަޑީ ހަބްތަކާއި، ވޯކް އިން ޑޭކެޔަރ، އަސާސީ ސިއްހީ ޚިދުމަތްތައް ގާއިމް ކުރުން ހިމެނެ އެވެ. އަދި ލޭ އަޅާ ފަރާތްތަކަށް ފަސޭހަ އިންތިޒާމްތަކެއް ހަމަޖެއްސުމާއި، ގެވެށި އަނިޔާ އާއި މަސްތުވާތަކެތީގެ މައްސަލަތަކަށް ޚާއްސަ ޔުނިޓެއް ގާއިމްކޮށް އަދި ބޯހިޔާވަހިކަމެއް ނެތުމުގެ ސަބަބުން މާލޭގައި މަގު މަތީގައި ދިރިއުޅޭ މުޖުތަމައުގެ ޚާއްސަ އެހީތެރިކަން ބޭނުންވާ ފަރާތްތަކަށް ޓްރާންސްސެޝަނަލް ސަޕޯޓު ސެންޓަރެއް ގާއިމް ކުރަން ވެސް ރާވާފައިވެ އެވެ.