އަންހެނުންގެ ދުވަހުގެ މުނާސަބަތުގައި ޝާހިދު، ޕާޓީގެ އަންހެން ކެންޑިޑޭޓުންނާ ބައްދަލުކުރައްވައިފި

މާޗް 8 ވަނަ ދުވަހު ފާހަގަކުރާ ބައިނަލްއަޤްވާމީ އަންހެނުންގެ ދުވަހުގެ މުނާސަބަތުގައި އެމްޑީޕީގެ ރައީސް ޢަބްދުﷲ ޝާހިދު، އެމްޑީޕީގެ ފަރާތުން ކުރިއަށް އޮތް ލޯކަލް ކައުންސިލް އިންތިޚާބުގައި ކައުންސިލްތަކަށާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް ވާދަކުރައްވާ އެމްޑީޕީ ކެންޑިޑޭޓުންނާއި ބައްދަލުކުރައްވަފި އެވެ.

އޮންލައިންކޮށް ބޭއްވި މި ބައްދަލުވުމުގައި ރާއްޖޭގެ ހުރިހާ ހިސާބަކުންވެސް އަންހެން ކެންޑިޑޭޓުން ބައިވެރިވި އެވެ.

މި ބައްދަލުވުމުގައި ވާހަކަ ދައްކަވަމުން ޝާހިދު ވިދާޅުވީ ސިޔާސީ ކަންކަމަކީ ފިރިހެނުންގެ ކަމެކޭ ހީވެފައި އޮންނަ އޮތުން ބަދަލުވެ، ދިވެހި އަންހެނުންގެ ކިބައިގައި ވެސް ސިޔާސީ ޖޯޝާއި ފޯރިހުރިކަން މިއަދު ހާމަވާކަމަށެވެ. އަދި ލާމަރުކަޒީ ނިޒާމުގެ ތެރެއިން ކައުންސިލްތަކަށް އަންހެނުންނަށް ޚާއްސަ ގޮނޑިތަކާއި އތމ. ކޮމިޓީތަކަށް މެމްބަރުން އިންތިޚާބުކުރުމުން އެކަމުގެ ފައިދާ މިހާރު ފެންނަމުންދާކަމަށްވެސް ޝާހިދު ވިދާޅުވި އެވެ. އަދި ލާމަރުކަޒީ ނިޒާމުގެ ތެރޭގައި އަންހެނުންގެ ބަސް އޮންނަން ޖެހޭނެ ގޮތަށް ނިޒާމު ބަދަލުކުރުމުގައި އެމްޑީޕީގެ ދައުރަށް ވެސް ޝާހިދު އަލިއަޅުއްވާލެއްވި އެވެ.

ދިވެހިރާއްޖެ އަކީ މީސް ކޮޅު މަދު، ކުޑަ ޤައުމެއް ކަމުގައި ވިޔަސް ރާއްޖޭގެ ތާރީޚުގައި އަންހެނުން އަދާކުރި އިސް ދައުރު ފާހަގަކުރެވޭ. އަންހެނުން ވެރިކަން ވެސް ކުރެއްވި. ޤައުމުގެ މުހިންމު އެކި ދާއިރާތަކުގައި ފާހަގަކޮށްލެވޭ މަސައްކަތްތައް ކޮށްފައި ހުރި އިރު، އިޤްތިޞާދީ ދާއިރާތަކުގައި، ޤައުމު ބިނާކުރުމުގައި އަންހެނުން މަސައްކަތްކޮށްފަވޭ. އަދި ޤައުމުގެ ތާރީޚާއި ސަޤާފަތް ރައްކާތެރިކުރުމުގައި ވެސް އަންހެނުން މަސައްކަތްކޮށްފައިވޭ.

އެމްޑީޕީގެ ރައީސް ޢަބްދުﷲ ޝާހިދު

ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އަންހެން ކެންޑިޑޭޓުންނާއެކު ޝާހިދު ބޭއްވެވި ބައްދަލުވުމުގައި އެމްޑީޕީގެ ނައިބު ރައީސާ ޙިސާން ޙުސެން އާއި، އަންހެނުންގެ ރޫޙުގެ ރައީސާ ރޮޒޭނާ އާދަމް އަދި އަންހެނުންގެ ރޫޙުގެ ނައިބު ރައީސާ މަރިޔަމް އީމާ ޝަފީޤް ވެސް ބައިވެރިވެވަޑައިގަތެވެ.

މި ބައްދަލުވުމުގައި ވާހަކަ ދައްކަވަމުން ރޮޒޭނާ ވިދާޅުވީ އަންހެނުންނަށް ޚާއްސަކުރެވިފައިވާ ކައުންސިލް ގޮނޑިތަކުގެ އިތުރުން އެހެން ގޮނޑިތަކަށްވެސް އަންހެން ބޭފުޅުން ކުރިމަތިލެއްވިކަމީ އަދި ކުރިން އތމ. ކޮމިޓީގައި ތިއްބެވި ބައެއް ބޭފުޅުން ކައުންސިލަށް ކުރިމަތިލެއްވި ކަމީ ލިބުނު ވަރަށް ބޮޑު ކުރިއެރުމެއް ކަމަށެވެ. އަދި ރަށްރަށުގައި އުފެދިގެން އަންނަ އަންހެން ބޭފުޅުންގެ ލީޑަރޝިޕް ކުރިއަށް އޮތްތަނުގައި ރައްޔިތުންގެ މަޖިލީހަށް ކުރިމަތިލައްވާނެކަމަށް އުއްމީދުކުރައްވާކަމަށް ވެސް ރޮޒޭނާ ވިދާޅުވި އެވެ. އަދި މީގެ އިތުރުން އަންހެނުން ބާރުވެރިކުރުވުމަށް ޕާޓީގެ ރައީސް ޢަބްދުﷲ ޝާހިދު ކުރައްވާ މަސައްކަތްޕުޅަށް ރޮޒޭނާ ތަޢުރީފްކުރެއްވި އެވެ.

އެމްޑީޕީގެ ނައިބު ރައީސާ ޙިސާން ޙުސެންގެ ވާހަކައިގައި، އަންހެނަކަށް ވީތީ ސިޔާސީ މަސްރަހުގައި ދިމާވާ ގޮންޖެހުންތަކުން އަރައިގަތުމަށް އެކަކު އަނެކަކު ގުޅިގެން، ހިތްވަރު ދީގެން މަސައްކަތްކުރުމަށް ކެންޑިޑޭޓުންނަށް ގޮވާލެއްވި އެވެ. އަދި އެމްޑީޕީގެ އަންހެން ކެންޑިޑޭޓުންނަކީ ސިޔާސީ މަސައްކަތުގައި ވަރަށް ގިނަ ދުވަހު މަސައްކަތްކުރެއްވި، ވަރަށް ހިތްވަރުގަދަ ބޭފުޅުންކަން ހިސާން ފާހަގަކުރެއްވި އެވެ. އަދި އެމްޑީޕީގެ ކުރިއެރުމުގައިވެސް އަންހެނުންގެ ހިއްސާއަކީ ބަލައިނުގަނެ ދޫކޮށްލެވޭނެ ކަމެއް ނޫންކަމަށްވެސް ހިސާން ވިދާޅުވި އެވެ.