އެމްޑީޕީ ޕިކަޕް ޖަލްސާ: "ފެންނަ ނުފެންނަ އިންތިޚާބުގައި އާއެކޭ ބުނެފި ނަމަ ރައްޔިތުންގެ ބާރު އެއްކޮށް ގެއްލޭނެ."
8 މާރިޗު 2026 | އާދީއްތަ 18:13ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ބާއްވާ ފެންނަ ނުފެންނަ ވޯޓަކީ ރައްޔިތުންގެ ބާރުތައް ހަނިކޮށް ޑިކްޓޭޓަރޝިޕަކަށް މަގުފަހިކުރުމަށް ކުރާ ކަމެއް ކަމަށް ކުރީގެ މެމްބަރު އިބްރާހިމް ޝަރީފް ވިދާޅުވެފައިވޭ.
އެމްޑީޕީ ޕިކަޕް ޖަލްސާ. 08.03.2026 | ރާއްޖެ އެމްވީ
ފެންނަ ނުފެންނަ އިންތިޚާބުގައި އާއެކޭ ބުނެފި ނަމަ ރައްޔިތުންގެ ބާރު އެއްކޮށް ގެއްލޭނެ ކަމަށް ކެލާ ދާއިރާގެ ކުރީގެ މެމްބަރު އިބްރާހިމް ޝަރީފް ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑީޕީފެ ޕިކަޕް ޖަލްސާގައި އާދިއްތަ ދުވަހުގެ ހަވީރު ވާހަކަދައްކަވަމުންނެވެ.
ޝަރީފް ވަނީ ފެށުނީއްސުރެ މި ސަރުކާރުން ދައްކަނީ ގަދަ ބަދަވިކަން ކަމަށް ފާހަގަކުރައްވާފަ އެވެ. އެޕްރިލް 4ގައި ލާ ވޯޓުގައި ރައްޔިތުން ސަރުކާރަށް ނޫނެކޭ ބުނަން ޖެހޭ ކަމަށް ޝަރީފް ވިދާޅުވި އެވެ. މީގެ އިތުރުން މިހާރު ނަގަން ނިންމާފައިވާ ފެންނަ ނުފެންނަ ވޯޓު ނަގަން މަޖިލީހުން ފާސްކޮށްފައި ވަނީ އިދިކޮޅު މެމްބަރުންނާއި މެދު ވަރަށް ނިކަމެތިކޮށް އަމަލުކުރުމަށް ފަހުގައި ކަމަށް އޭނާ ވިދާޅުވި އެވެ. އެގޮތުން މެމްބަރުން ދަމާ މަޖިލީހުގެ ޖލްސާކުރާ ހޯލުން ބޭރަށް ނެރުމަށް ފަހު އެ ވޯޓު ނަގަން ފާސްކޮށްފައިވާ ކަމަށް ޝަރީފް ވަނީ ވިދާޅުވެފަ އެވެ. އޭނާ ވިދާޅުވީ މި ސަރުކާރުން ފެށުނީއްސުރެ ގެންގުޅެނީ ބާރުތައް އެއްކޮށްލުމާއި ބާރުތައް މައި ސަރުކާރަށް ޖަމާކުރުމުގެ ސިޔާސަތެއް ކަމަށެވެ.
"މިއީ ޑިކްޓޭޓަރޝިޕް އެއްގެ ކުލަމަތި މި ފެންނަނީ. ބޭނުމަކީ ރައްޔިތުންގެ ބާރު ހަނިކުރުން. މިއީ އެއްގޮތަކަށް ވެސް ފަސޭހަކުރަން ކުރާ ކަމެއް ނޫން. ރައްޔިތުން ކައިރިއަށް ދާން އުނދަނގުލަކަށް ވާނެތީ. އެހެންވެގެން ރައްޔިތުން ކައިރި އަށް ނުދާނެ ދެ އިންތިޚާބު އެއްކޮށްލަނީ." ޝަރީފް ވިދާޅުވި އެވެ.
ޝަރީފް އިތުރަށް ވިދާޅުވީ ރިޔާސީ އިންތިޚާބާއި މަޖިލިސް އިންތިޚާބު އެކުގައި ބާއްވާފައި ނަމަ އެކަމުން އާއްމުންނަށް ވަރަށް ބޮޑަށް ގެއްލުން ވާނެ ކަމަށެވެ. އެކަން ކުރުމުގެ ބޭނުމަކީ އިންތިޚާބުތައް މަދުކޮށްލާ ރައްޔިތުންނަށް ބަސް ބުނަން ލިބޭ ފުރުސަތުތައް ހަނިކުރުން ކަމަށް އޭނާ ވަނީ ވިދާޅުވެފަ އެވެ. މި ސަރުކާރަކީ ރައްޔިތުން ރައްޔިތުންނަށް ބާރު ދޫކޮށްލަން ބޭނުންވާ ބައެއް ނޫން ކަމަށް ޝަރީފް ވަނީ ވިދާޅުވެފަ އެވެ.
