ބާރުތައް ޖަމާކުރާ ވެރިއަކަށް މާލެ ސިޓީ ހިންގޭނެ ގޮތެއް ނޯންނާނެ: ރައީސް ސޯލިހު
ރައީސް ޑރ. މުޙައްމަދު މުޢިއްޒަކީ ބާރުތައް ޖަމާކުރައްވާ ބޭފުޅެއް ކަމަށާއި، އެފަދަ ސިޔާސަތެއް ގެންގުޅުއްވާ ބޭފުޅަކަށް ލާމަރުކަޒީ ނިޒާމުން މާލެ ސިޓީއާއި ރާއްޖެ ނުހިންގޭނެ ކަމަށް ކުރީގެ ރައީސް އިބްރާހީމް މުޙައްމަދު ޞާލިޙު ވިދާޅުވެއްޖެ. އާންމު ވިޔަފާރިތަކުގެ ތެރެއަށް ސަރުކާރުން ވަދެ ކުންފުނިތައް އުފެއްދުމުގެ ބަދަލުގައި، އަމިއްލަ ފަރާތްތަކަށް ފުރުޞަތުތައް ފަހިކޮށްދޭންޖެހޭނެ ކަމަށް އެމަނިކުފާނު ފާހަގަކުރެއްވި. މީގެ އިތުރުން، ކުރީ ސަރުކާރުން ހިންގި ތަރައްޤީގެ މަޝްރޫޢުތައް މިހާރު ހުއްޓިފައިވާތީ، ކުރިއަށް އޮތް އިންތިޚާބުތަކުގައި ރައްޔިތުން ފުންކޮށް ވިސްނުމަށް ރައީސް ޞާލިޙު އިލްތިމާސްކުރެއްވި.
މާލެ ސިޓީ މެނިފެސްޓޯ ލޯންޗް ކުރުމަށް ބޭއްވި ޖަލްސާގައި ކުރީގެ ރައީސް އިބްރާހިމް މުހައްމަދު ސޯލިހު ވާހަކަފުޅު ދައްކަވަނީ. | އެމްޑީޕީ
ރައީސް ޑރ. މުހައްމަދު މުއިއްޒު ފަދަ ބާރުތައް ޖަމާކުރާ ވެރިއަކަށް މާލެ ސިޓީ ހިންގޭނެ ގޮތެއް ނޯންނާނެ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
މާލެ ސިޓީގެ މެނިފެސްޓޯ ލޯންޗް ކުރުމަށް ބޭއްވި ޖަލްސާގައި ވާހަކަ ދައްކަވަމުން ކުރީގެ ރައީސް އިބްރާހީމް މުހައްމަދު ސޯލިހު ވިދާޅުވީ މިހާރުގެ ރައީސް ޑރ. މުހައްމަދު މުއިއްޒު މާލެ ސިޓީގެ މޭޔަރުކަމަށް ވަޑައިގެން ކުރެއްވި މަސައްކަތްތައް މާލޭގެ މަގުމަތިން ފެންނަން ހުރި ކަމަށެވެ.
ރައީސް ސޯލިހު ވިދާޅުވީ ރައީސް މުއިއްޒު މާލޭގެ މަގުތައް ރޮނގުދަމާ ބައިބައިކޮށް އެކި ފަރާތްތަކަށް ކުއްޔަށް ދެއްވި ކަމަށެވެ. އެއިރު ޕާކިންގ އެކި ދާއިރާތައް ހަދައި ޕާކުކުރެވޭނެ ގޮތްތައް ހޯދައިދީފައި ހުރި ނަމަވެސް ރައީސް މުއިއްޒު މޭޔަރު ކަމަށް ވަޑައިގެން މާލޭގައި ހުރި ބޮޑެތި މަގުތައް ކޮށާ އެކި ފަރާތްތަކުގެ އަތުން ކުރިއަށް ފައިސާ ނަގައިގެން އެ ތަންތަން ދެއްވި ކަމަށް ރައީސް ސޯލިހު ވިދާޅުވި އެވެ.
ރައީސް ސޯލިހު ވިދާޅުވީ ނަސީބަކުން އެ ތަންތަން ސަލާމަތްކުރެވުނު ކަމަށާއި ދުވަސްކޮޅެއް ވީނަމަ އެ ތަންތަން ކުއްޔަށް ނެގި މީހުންގެ މައްޗަށް ރަޖިސްޓްރީކޮށްދީފައި ފަތްދީފައި ވަށާ ފާރު ވެސް ނަގާފައި ހުންނާނެ ކަމަށެވެ. މިއީ ރައީސް މުއިއްޒުގެ ސިޔާސަތުކަމަށް ރައީސް ސޯލިހު ވިދާޅުވި އެވެ.
އެ ނުކުންނަވަނީ ޓީމެއް ގޮވައިގެން، ލާމަރުކަޒީ ނިޒާމު މާލެ އާއި ރާއްޖެ ހިންގާނެ ވާހަކައާއިގެން. މިފަދަ ސިޔާސަތުތަކެއް ތަންފީޒުކުރައްވާ ބޭފުޅަކަށް ކިހިނެއްތޯ މާލެ ސިޓީ ހިންގޭނީ؟ މިއަދު ވެސް އެ ގެންދަވަނީ ބާރުތައް ޖަމާކުރަމުން. މިއަދު އެ މަނިކުފާނު ވެރިކަމުގައި ހުންނަވައިގެން އެ ކުރައްވާ ކަންތައްތައް ތިބޭފުޅުންނަށް ފެނިވަޑައިގަންނަވާނެ. ސަރުކާރެއްގެ ބޭނުމަކީ ރައްޔިތުންނަށް ނުކުރެވި ހުރި ކަންތައްތައް ކުރުން. ވީހާވެސް ބޮޑަކަށް ރައްޔިތުންނަށް މަގުފަހިކޮށްދީފައި މަސައްކަތްކުރުމުގެ ފުރުޞަތުތައް ހުޅުވައިދިނުން. އެއެއް ނޫން އަޅުގަނޑުމެންނަށް ޑރ މުޢިއްޒުގެ، ރައީސް މުޢިއްޒުގެ ފަރާތުން މި ފެންނަނީ. އެމަނިކުފާނުގެ ފުރަތަމަ ސިޔާސަތަކީ، ގާއަޅާ ކުންފުންޏެއް އުފެއްދުން. މާލޭގައި އާންމު، ވިޔަފާރި ނުލާހިކު ރަނގަޅަށް ކުރަމުން އަންނަ މަސައްކަތެއް. ދެވަނަ ކަމަކަށް، އައިނު ހަދާ ކުންފުންޏެއް އުފެއްދުން. ތިންވަނަ ކަމަކަށް، ސަރުކާރުން ރިސޯޓުތަކެއް ތަރައްޤީކޮށް، ރައްޔިތުންނަށް ހިއްސާދޭން ފެށުން. މި ހުރި ހުރިހާ ކަމަކީ، ސަރުކާރުގެ އެއްވެސް ކަހަލަ ބައިވެރިވުމެއް ނެތި މި ރާއްޖޭގައި މިހާރުވެސް ކުރަމުން އަންނަ މަސައްކަތްތައް.ކުރީގެ ރައީސް އިބްރާހީމް މުހައްމަދު ސޯލިހު
ރައީސް ސޯލިހު ވިދާޅުވީ މި ވިޔަފާރިތަކުގެ ތެރެއަށް ސަރުކާރުން ވަންނާކަށްނުޖެހޭނެ ކަމަށެވެ. ސަރުކާރުން ޖެހޭނީ ފުރުޞަތު ދޭން ކަމަށާއި، ވިޔަފާރިވެރިންނަށް ވެސް ފުރުޞަތުދީ ހިންގުމަށް ވެސް ޖާގަ ދޭންޖެހޭ ކަމަށެވެ.
ރައީސް ސޯލިހު ވިދާޅުވީ މާފުށީގެ ރައްޔިތުންނަށް ރައްޔިތުން ބޭނުންވެގެން ގޯތި ދިނުމަށްޓަކައި އަދި އިޤްތިޞާދީ މަސައްކަތް ކުރުމަށްޓަކައި 25 ހެކްޓަރުގެ ބިމެއް އެ މަނިކުފާނުގެ ވެރިކަމުގައި ހިއްކި ކަމަށެވެ. އެ ތަނަށް ގޮސް ބަލައިލުމުން އެތަން ފެންނަނީ އޭގެ ޒާތުގައި ކުށްވެރިވެފައި އޮތް ތަނެއްގެ ގޮތުގައި ކަމަށާއި ހިއްކާފައި އޮތް ވެލިގަނޑެއް ކަމަށް ރައީސް ސޯލިހު ވިދާޅުވި އެވެ. އެތަނަށް ފެނާއި ނަރުދަމާއާއި ކަރަންޓުގެ ހިދުމަތް ނުދީ އެތަން ކުށްވެރިވެފައި އަރުވާލާފައި ބަންދުކޮށްފައި އޮތް ކަމަށް ރައީސް ސޯލިހު ވިދާޅުވި އެވެ.
ރައީސް ސޯލިހު ވިދާޅުވީ ރައީސް މުއިއްޒު ފަދަ ބޭފުޅަކަށް ރާއްޖެ ލާމަރުކަޒީ ނިޒާމުން ހިންގޭނެ ގޮތެއް ނެތް ކަމަށެވެ. ރައީސް ސޯލިހު ވިދާޅުވީ ކުރިއަށް އޮތް ލާމަރުކަޒީ އިންތިޚާބުގައި މާލެ އާއި ރަށްރަށުގެ ރައްޔިތުން ވަރަށް ފުންކޮށް ވިސްނާވަޑައިގަންނަވަންވާނެ ކަމަށެވެ.
