ފަހު ވަގުތު މޮޅުވެ، ރެއާލް އިން ފަރަގު ކުޑަ ކޮށްފި

ސްޕެނިޝް ލީގުގައި ސެލްޓަ ވީގޯއާ ދެކޮޅަށް ކުޅުނު މެޗުން މޮޅުވެ، އެއް ވަނައިގައި އޮތް ބާސެލޯނާއާ ދެމެދު އޮތް ފަރަގު ރެއާލް މެޑްރިޑުން ކުޑަ ކޮށްފި އެވެ. 

ސެލްޓަގެ އަމިއްލަ ދަނޑުގައި ހުކުރު ދުވަހުގެ ރޭ ދަންވަރު ކުޅުނު މެޗު ރެއާލް އިން ކާމިޔާބު ކުރީ 2-1 އިންނެވެ. މެޗުގައި ރެއާލް އިން ލަނޑު ޖަހައި ކުރި ހޯދާފައި ވަނިކޮށް، ސެލްޓަ އިން ނަތީޖާ ހަމަހަމަ ވެސް ކުރި އެވެ. ނަމަވެސް، މެޗުގެ ފަހު ވަގުތުގައި ލަނޑު ޖަހައިގެން ރެއާލް ވަނީ މެޗުން މޮޅުވެފަ އެވެ. 

މެޗު ފަށައިގެން 11 ވަނަ މިނެޓުގައި ރެއާލް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ރެއާލް އަށް ޖަހައިދިނީ އައުރެލިން ޗުއަމެނީ އެވެ. އެ ލަނޑު ޖަހަން ޗުއަމެނީ އަށް ފުރުސަތު ތަނަވަސްކޮށްދިނީ އާޑާ ގުލާ އެވެ. ނަމަވެސް މެޗުގެ 25 ވަނަ މިނެޓުގައި، ބޯޖާ އިގްލީސިއަސް ވަނީ ލަނޑު ޖަހައި ސެލްޓަ އަށް ނަތީޖާ ހަމަހަމަ ކޮށްދީފަ އެވެ. 

މެޗުގެ ދެ ވަނަ ހާފުގައި ރެއާލް އިން ވަނީ އިތުރު ލަނޑު ޖަހަން މަސައްކަތް ކޮށްފަ އެވެ. އެ ޓީމަށް ލިބުނު ފުރުސަތުގެ ބޭނުން ނުކުރެވި، މެޗު އެއްވަރުވާން ދަނިކޮށް އެ ޓީމުން ލަނޑެއް ޖެހި އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ރެއާލް އަށް އެ ލަނޑު ޖަހައިދިނީ ފެޑެރިކޯ ވަލްވާޑޭ އެވެ. 

މޮޅާ އެކު ރެއާލް ދެ ވަނައިގައި އޮތީ، އެއް ވަނައިގައި އޮތް ބާސެލޯނާ އަށް ވުރެ އެއް މެޗު އިތުރަށް ކުޅެގެންނެވެ. މިހާތަނަށް ކުޅެފައިވާ 27 މެޗުން ރެއާލް އަށް 63 ޕޮއިންޓު ލިބޭއިރު، އެއް ވަނައިގައި ބާސެލޯނާ އޮތީ 26 މެޗުން 64 ޕޮއިންޓާ އެކު އެވެ. މެޗުގެ އަދަދު ހަމަކޮށް، ހަަތަރު ޕޮއިންޓަށް ފަރަގު ބޮޑު ކުރުމުގެ ފުރުސަތު ބާސެލޯނާ އަށް އޮންނާނެ އެވެ.